அரிஷ்டநேமி – Page 69 – உருவேறத் திருவேறும்

நகர மறுக்கும் நினைவுகள் – செம்பருத்தி

ஒரு நாள் பூ மார்கெட்டில் இருந்தேன்.

இதென்ன, செம்பருத்தி பூப்போல் இருக்கிறதே..

‘என்னா சார், அப்படி பாக்கிற. இது செம்பருத்தி பூ. எடுத்துக்க. 3 பத்து ரூபா. உனக்காக 4 தரேன்’.

டேய் மணி 4.30 ஆச்சு எழுந்திரி. போய் பூ எடுத்து கிட்டுவா.

தூக்கம் தூக்கமா வருது.

‘பூ எடுத்துகிட்டு வந்து சாமிக்கு போட்டா புண்ணியம்’. அன்று கட்டிய பூக்கள் இல்லாத காலம். (காலம் என்ன காலம் 1000 வருஷத்துக்கு முன்னாடியா, இப்பத்தான் 30 வருஷத்துக்கு முன்னாடி)

உறவுகளுடனும், நண்பர்களுடனும் பூவினை பகிர்தல் என்பது இல்லாத காலம்.

இன்னைக்கு எப்படியும் ராமு வீட்டு அரளியையும், செல்லமா அவர்கள் வீட்டில் செம்பருத்தியையும் அந்த செந்தில் பயல் எடுக்குறத்துக்கு முன்னாடி எடுத்துடனும். உடல் வேகம் கொண்டது.

அப்பாடா இன்னும் யாரும் வரல.அதால எல்லா பூவும் நமக்குத்தான்.

ஓஹோ, இன்னைக்கு நீ அரளிப்பூ எடுக்கறயா. இரு நான் போயி செம்பருத்திப் பூ எடுத்து முடிச்சிடுறேன்.

கொஞ்சம் தூங்கிட்டேன். அதனால எல்லாப் பூவையும் அவன் எடுத்துட்டான்.

இரண்டு விதமான செம்பருத்தி. ஒன்று சாதாரண செம்பருத்தி, மற்றொன்று அடுக்கு செம்பருத்தி, ஒவ்வொன்றும் இப்போதைய உள்ளங்கைகளை விட பெரியது. கொஞ்சம் பவழமல்லி(பாரிஜாதம் என்பதை விட பவழமல்லி என்றால் வாசனை கூடத்தான்). பவழமல்லியை ஊசி நூலில் கோர்த்து பட அளவுக்கு போட்டா தனி அழகுதான்.

பெரியவர்களின் பேச்சுக்கள்

1.பாத்துப் போ, பூச்சி பொட்டு (பாம்புதானே) ஏதாவது செடில கிடக்கப் போவுது.

2.ஏண்டா இப்படி இத்தனை விடியக் காலையில வந்து பூ எடுக்குறீங்க. இன்னைக்கு .உங்க வீட்ட சொல்றேன். விடிஞ்ச பிறகு வாங்கடா?

3ஏண்டி கண்ணுகளா, எல்லா பூவையும் எடுத்துகிட்டு போறீங்களே. எனக்கு கொஞ்சம் குடுக்கக் கூடாதா. செல்லம்மா மச்சி (யார் இப்படி ஒரு உறவை சொல்லி முதலில் அழைத்தார்கள்). இது தான் அதிக பட்ச கோவம். ஆனால் எந்த பெரியவர்களும் மனமார திட்டியதில்லை

டேய், மாப்ள ஒனக்கு ஒரு விஷயம் தெரியுமா? நம்ம கட செந்தில் அதாண்ட ஒன்னோட பூ எடுபான அவன் செத்துப் போயிட்டான் என்ற நண்பன் போனில் சொன்ன நிகழ்வும், போதும்பா எவ்வளவு நேரம் தான் பூவை பாத்துகிட்டே நிப்ப. சீக்ரம் வாங்கு. வீட்டுக்கு போகணும் என்ற மகனின் குரலும் ஒரு சேர ஒலிக்கின்றன.

மலர்கள் மரணிப்பதில்லை. ஏனெனில் அவைகளின் வாசம் எப்போதும் நீங்காமல் இருப்பதால்.

புகைப்படம் : SL Kumar

சமூக ஊடகங்கள்

திருவடி சார்பு

வெண்நிற மேகங்களுக்கு இடையில்

பால் நிலா சென்று மறைகிறது.

யாருமற்ற கடல் பரப்பிற்கு அருகினில்

நம் விளையாட்டுகள் தொடர்கின்றன.

நீ நீராகிறாய்

நானும் நீராகி உன்னைத் தொடர்கிறேன்.

நீ நிலமாகிறாய்

நானும் நிலமாகி உன் பாதம் தொடுகிறேன்.

நீ காற்றாகிறாய்

நானும் காற்றாகி உன்னைத் தொடர்கிறேன்.

நீ கனலாகிறாய்

நானும் கனலாகி உன்னைத் தொடர்கிறேன்.

நீ ஆகாயமாகிறாய்

நானும் ஆகாயமாகி உன்னைத் தொடர்கிறேன்.

பிறிதொரு காலங்களில்

மௌனத்தில் ஒன்றுகிறது

உன் கொலுசின் ஒலி

பிரபஞ்சத்தின் துடிப்புகள்

அடங்

கு

கின்

ற

ன.

ஓவியம் : Sumitha Sundaram

சமூக ஊடகங்கள்

சைவத் திருத்தலங்கள் 274 – திருஇலம்பையங்கோட்டூர்

தல வரலாறு(சுருக்கம்)/ சிறப்புகள் – திருஇலம்பையங்கோட்டூர்

•மூலவர் தீண்டாத் திருமேனி; சுயம்பு மூர்த்தி; கொன்றை மலரின் இதழைப்போன்று காட்சி

•சிவலிங்கத் திருமேனி வெளிர் நிறமுடைய, செம்மண் நிறம். பெரிய ஆவுடையார்; அடிப்பாகம் பத்மம் போன்ற அமைப்பு

•கோஷ்ட மூர்த்தமாக உள்ள தட்சிணாமூர்த்தி – யோக தட்சிணாமூர்த்தி. சின் முத்திரையை இதயத்தில் வைத்துள்ள அமைப்பு

•தலவிநாயகர் – குறுந்த விநாயகர், சுத்தான்னம் நைவேத்தியம்

•வருடத்தில் ஏப்ரல் 2 – 7 , செப்டம்பர் 5 – 11 வரையில் சூரியன் தனது ஒளிக்கற்றையைப்பரப்பி ஈசனை பூஜிக்கிறார்.

•திருஞானசம்பந்தர் இத்தலத்திற்கு அருகில் வரும் போது , இறைவன் ஒரு சிறு பிள்ளை போலவும், பின் ஒரு முதியவர் போலவும் வழிமறித்து இக்கோயிலை உணர்த்துதல், உடன் வந்த அடியார்களளின் அறியாமை, பின் இறைவனே வெள்ளைப் பசு வடிவில் வந்து திருஞானசம்பந்தரின் சிவியை முட்டிநிற்க, அப்போது திருஞானசம்பந்தர் வியந்து அப்பசு காட்டிய குறிப்பின் வழி செல்ல,தலத்தினருகில் வந்ததும் பசு மறைதல்.

•அரம்பை வழிபட்டத் தலம் – ரம்பையங்கோட்டூர் –இலம்பையங்கோட்டூர்

•இலம்பை – நீர்ப்பரப்பின் அருகிலுள்ள பசுமையான சோலை

தலம்	திருஇலம்பையங்கோட்டூர்
பிற பெயர்கள்	எலுமியன்கோட்டூர், அரம்பாபுரி, அரம்பையங்கோட்டூர், இலம்பையங்கோட்டூர்
இறைவன்	அரம்பேஸ்வரர், தெய்வநாயகேஸ்வரர், சந்திரசேகரர். ரம்பாபுரிநாதர்
இறைவி	கனககுஜாம்பிகை, கோடேந்து முலையம்மை, தாயினும் நல்லாள்,
தல விருட்சம்	மல்லிகை.
தீர்த்தம்	சந்திர தீர்த்தம், மல்லிகை தீர்த்தம், ரம்பை தீர்த்தம், நாகதீர்த்தம், தாமரை தீர்த்தம், பூதகண தீர்த்தம்
விழாக்கள்	குரு பெயர்ச்சி, மகாசிவராத்திரி, ஆருத்ரா தரிசனம், திருக்கார்த்திகை, ஆடிப்பெருக்கு.
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 6 மணி முதல் 8.00 மணி வரை, அருள்மிகு தெய்வநாயகேஸ்வரர் திருக்கோயில், திருஇலம்பையங்கோட்டூர்-631 553. காஞ்சிபுரம் மாவட்டம். +91 -44 – 2769 2412, 09444865714, 9444429775
வழிபட்டவர்கள்	அரம்பை, சந்திரன்
பாடியவர்கள்	திருஞானசம்பந்தர், ஸ்ரீசிவப்பிரகாச சுவாமிகள்
நிர்வாகம்
இருப்பிடம்	காஞ்சிபுரம்
இதர குறிப்புகள்	தேவாரத் தலங்களில் 246 வது தலம் தொண்டை நாட்டுத் தலங்களில் இது 13 வது தலம்.

தெய்வநாயகேஸ்வரர்

கனககுஜாம்பிகை

பாடியவர் திருஞானசம்பந்தர்

திருமுறை 1

பதிக எண் 76

திருமுறை எண் 3

பாடல்

பாலனாம் விருத்தனாம் பசுபதிதானாம்,

பண்டுவெங்கூற்றுதைத்து அடியவர்க்கருளும்

காலனாம்எனதுரை தனதுரையாகக், கனல் எரி

அங்கையில் ஏந்திய கடவுள்

நீலமா மலர்ச்சுனைவண்டு பண்செய்ய, நீர்மலர்க்

குவளைகள் தாதுவிண்டோங்கும்

ஏல நாறும் பொழில் இலம்பையங் கோட்டூர், இருக்கையாப்

பேணி என்எழில் கொள்வதியல்பே.

பொருள்

சிவன் பாலன், முதியவர் மற்றும் பசுபதி என்று பல வடிவங்கள் எடுத்து வந்தவன். அவன் கொடுமையான கூற்றுவனை காலால் உதைத்து அடியவர்களுக்கு அருளுபவன். அப்பெருமான எனது உரையை தனது உரையாக ஏற்றுக்கொண்டவன். எரியும் நெருப்பினை தனது கைகளில் ஏந்தியவன். பெரியதாகவும் இருக்கும் நீல மலர்களை உடைய நீர் சுனைகளுக்கு அருகில் வண்டுகள் பாடுகின்றன. நீரில் இருக்கும் குவளை மலர்கள் மகரந்தத்தைப் பொழிகின்றன. அந்த இடம் மிக்க நறுமணம் உடையதாக இருக்கிறது. இவ்வாறான எழில்களை உடைய இலம்பையங் கோட்டுர் தலத்தில் உறையும் ஈசன் என் எழில் கொள்வது நல்லியல்பு ஆகுமா?

கருத்து

· ஈசன், உயிர்களின் தன்மைக்கு ஏற்ப அவர்கள் விரும்பிய வடிவம் தாங்கி வருபவன்

பாடியவர் திருஞானசம்பந்தர்

திருமுறை 1

பதிக எண் 76

திருமுறை எண் 8

பாடல்

கிளர்மழை தாங்கினான் நான்முகம் உடையோன்

கீழ்அடிமேல் முடி தேர்ந்து அளக்கில்லா

உளம்அழை எனதுரை தனதுரையாக

ஒள்ளழல் அங்கையில் ஏந்தியஒருவன்

வளமழை எனக்கழை வளர்துளி சோர

மாகணம் உழிதரு மணியணி மாலை

இளமழை தவழ்பொழில் இலம்பையங் கோட்டூர்

இருக்கையாப் பேணி என்னெழில் கொள்வதியல்பே

பொருள்

மிகப் பெரியதாக கிளர்ந்து எழுந்த மழையை தன் கைகளால் தாங்கி துயர் துடைத்த திருமாலும், பிரம்மாவும் ஈசனின் திருவடியையும் மேல் முடியையும் தரிசிக்க விரும்பி அதனை அடைய இயலாதவர்களாக இருந்தார்கள். அந்த ஈசன் எனது உரையை தனது உரையாக ஏற்றவன். அவன் ஒளிரும் நெருப்பினை தன் கரங்களில் ஏந்தியவன். மூங்கில் இலைகளிலிருந்து மழையெனத் துளிகள் வீழவும் மலைப்பாம்புகள் பக்கம் சார, அழகிய மணி மாலைகள் போல் தவழ் பொழில் திகழும் இலம்பையங்கோட்டூரில் உறையும் அப்பெருமான் என் எழில் கொள்வது நல்லியல்பு ஆகுமா?

புகைப்படம் : தினமலர்

சமூக ஊடகங்கள்

புறம் அறுத்தல்

விண் நோக்கி விழி வைத்து இருக்கும்

யாசகம் விரும்பா

யாசகன் ஒருவனை சந்தித்தேன்.

சிந்தனைகள் அற்று

நாணயம் ஒன்றை ஈகிறேன்.

பார்வையினில் பெரும் மாற்றங்கள் இல்லை.

சில நாணயங்களை ஈகிறேன்.

பார்வையினில் பெரும் மாற்றங்கள் இல்லை.

சில காகித நோட்டுக்களை ஈகிறேன்.

பார்வையினில் பெரும் மாற்றங்கள் இல்லை.

மதிப்பு மிக்க காகித நோட்டுக்களை ஈகிறேன்.

பார்வையினில் பெரும் மாற்றங்கள் இல்லை.

வியப்பால் எனக்கான சிந்தனைகள் விரிகின்றன.

‘பொருள் வரின் மகிழ்வில்லையா’ என்கிறேன்.

‘யாசகனுக்கு எதிலும் எப்பொழும் மகிழ்வு தான்’ என்கிறான்.

உயிரின் ஒலி அடங்கும் காலம் உடலில்

புகைப்படம் : SL Kumar

சமூக ஊடகங்கள்

சைவத் திருத்தலங்கள் 274 – திருமாகறல்

தல வரலாறு(சுருக்கம்)/ சிறப்புகள் – திருமாகறலீஸ்வரர்

• இறைவன் நவபாஷாணத்தால் ஆன‌ சுயம்பு மூர்த்தி

• கஜ பிருஷ்ட விமான அமைப்பு

• முருகனும், தெய்வயானையும் வெள்ளையானையில் அமர்ந்து மகாவிஷ்ணுவுக்கு காட்சி

• திருஞானசம்பந்தர் வினை தீர்க்கும் பதிகம் பாடிய தலம்

• இறைவன் மாகறலீஸ்வரர் உடும்பின் வால் போன்ற காட்சி.

• பிரம்மா தலம் எல்லையில் பலா மரம் தோற்றுவித்தது. இராஜேந்திர சோழன் அப்பழங்களை தினமும் சிதம்பரம் நடராஜருக்கு நிவேதனம் செய்தது. அந்தணன் மகன் அதனை வெட்டியது. இராஜேந்திர சோழன் அதற்காக நாடு கடத்தியது. உறுதி செய்து திரும்பும் போது பொன்னிற உடும்பைக் கண்டது. அதனை வெட்ட முயன்று மயக்கம் அடைந்த தருணம் இறைவன் வெளிப்பட்டு ஆலயம் எழுப்ப உத்தரவிட்டது.

• பைரவர் – அர்த்தநாரி பைரவர் வடிவம்

தலம்	திருமாகறல்
பிற பெயர்கள்	அடைக்கலம் காத்த நாதர், மகம் வாழ்வித்தவர், உடும்பீசர், பாரத்தழும்பர், புற்றிடங்கொண்டார், நிலையிட்ட நாதர், மங்கலங்காத்தவர், பரிந்து காத்தவர், அகத்தீஸ்வரர், நிலையிட்ட நாதர், தடுத்தாட்கொண்டவர்
இறைவன்	திருமாகறலீஸ்வரர்
இறைவி	திரிபுவனநாயகி
தல விருட்சம்	எலுமிச்சை
தீர்த்தம்	அக்னி
விழாக்கள்	மாசி மாதம் – பிரம்மோற்ஸவம்.
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 7 மணி முதல் 12.00 மணி வரை மாலை 6 மணி முதல் இரவு 8 மணி வரை அருள்மிகு திருமாகறலீஸ்வரர் திருக்கோயில், திருமாகறல் -631 603, காஞ்சிபுரம் மாவட்டம். +91- 044-27240294
வழிபட்டவர்கள்	பிரம்மா , மகாவிஷ்ணு, மாகறன், மலையன் என்னும் அசுரர்கள்
பாடியவர்கள்	திருஞானசம்பந்தர்
நிர்வாகம்
இருப்பிடம்	காஞ்சிபுரம் பேருந்து நிலையத்தில் இருந்து 2கி.மீ
இதர குறிப்புகள்	தேவாரத் தலங்களில் 239 வது தலம் தொண்டை நாட்டுத் தலங்களில் இது 7 வது தலம்.

திருமாகறலீஸ்வரர்

திரிபுவனநாயகி

பாடியவர் திருஞான சம்மந்தர்

திருமுறை 3

பதிக எண் 72

திருமுறை எண் 9

பாடல்

தூயவிரி தாமரைக ணெய்தல்கழு நீர்குவளை தோன்றமதுவுண்
பாயவரி வண்டுபல பண்முரலு மோசைபயின் மாகறலுளான்
சாயவிர லூன்றியவி ராவணன தன்மைகெட நின்றபெருமான்
ஆயபுக ழேத்துமடி யார்கள்வினை யாயினவு மகல்வதெளிதே

பொருள்

தூய்மையான தாமரை மலர்கள், கழு மலர்கள், நெய்தல் மலர்கள், குவளை மலர்கள் போன்ற மலர்கள் மலர்ந்திருக்கின்றன. அதில் இருக்கும் தேனை பருகுவதற்காக வரிகளை உடைய வண்டுகள் பாடி வருகின்றன. இத்தகைய திருத்தலத்தில் சிவபெருமான் வீற்றிருக்கிறான். அவன் தனது கால் பெருவிரல் ஊன்றி இராவணின் வலிமையை அழித்தவன்.இவ்வாறாக வீற்றிருக்கும் பெருமானின் புகழை பாடுவதால் வினைகள் யாவும் நீங்கும் என்பது முடிவானது.

கருத்து

சாய – வலி குறையும்படி.

பாடியவர் திருஞான சம்மந்தர்

திருமுறை 3

பதிக எண் 72

திருமுறை எண் 10

பாடல்

காலினல பைங்கழல்க ணீண்முடியின் மேலுணர்வு காமுறவினார்

மாலுமல ரானுமறி யாமையெரி யாகியுயர் மாகறலுளான்

நாலுமெரி தோலுமுரி மாமணிய நாகமொடு கூடியுடனாய்

ஆலும்விடை யூர்தியுடை யடிகளடி யாரையடை யாவினைகளே

பொருள்

சிவன், பைம் பொன்னால ஆன வீரக் கழல்களை அணிந்தவாறும், நீண்ட சடை முடியும் உள்ளவனாக விருப்பமுடன் காண வேண்டும் என்ற எண்ணம் கொண்ட திருமாலும், பிரம்மாவும் அறியாதவாறு நெருப்பு பிழம்பாகி இத்தலத்தில் வீற்றிருக்கிறான்.நாலிடத்தில் எரிகின்ற நெருப்பை கொண்டும், தோலை உரித்து மாணிக்கத்தை கக்கும் பாம்பை அணிந்தும், அசைந்து நடக்கும் இடபத்தை வாகனமாக உடைப அந்த சிவபெருமானின் அடியார்களை வினைகள் வந்து அடையாது.

புகைப்படம் : இணையம்,தினமலர்

சமூக ஊடகங்கள்

நகர மறுக்கும் நினைவுகள் – மழைக்கால பக்கோடா

மயிலாடுதுறை பெரிய கடைத் தெருவின் வழியே நடக்கிறேன். நகரின் பிரதான் வீதிகளில ஒன்று அது.

லேசான மழைத் தூறல் தொடங்குகிறது.

கண் முன்னே டிபன் காளியாகுடியும், வானொலி பிரஸும் (மாத வானொலி நிகழ்ச்சிகள் புத்தக வடிவில்) நினைவில் ஆடுகின்றன.

அதிலிருந்து 10 அடி வலது புறத்தில் தள்ளூ வண்டியில் பக்கோடா கடை. பெரும்பாலும் உதிரி பக்கோடா மட்டுமே. அந்த நாளில் சமோசா போன்ற சமாச்சாரங்கள் கிடையாது. (இது என்ன ஊர் பற்றி எழுத ஆரம்பித்த உடன் அந்த நாள் என்று ‘தானே’ வருகிறது).அத் தெருவில் செல்பவர்கள் அந்த வாசனையை நுகர முடியாமல் செல்ல முடியாது மெல்லியதாய் மொறு மொறு என்று எண்ணை அதிகம் குடிக்காமல் இருக்கும்

டேய் தம்பி(மகனிடத்தில்) சாருக்கு என்ன வேணும்னு கேளு(நான் அப்போது 7வது)

‘எவ்வளவுங்க’.

‘என்ன புதுசா கேட்கிறீங்க. 50 பைசாதான்’. (அப்பா மாதம் தரும் 10ரூபாயில் இது நிச்சயம்.)

என்ன தம்பி பாத்துகிட்டே போர?

40 காசு தான் இருக்கு.

சரி சரி இங்க வா. இப்ப சாப்பிடு. நாளைக்கு மீதி 10 பைசா கொடு. (நாளைக்கு கடைக்கு போய் ஏதாவது வாங்கிட்டு வர சொன்னா, 10 பைசா கமிஷன் வாங்கிட வேண்டியது தான்)

மழைக்கும் அந்த சூடான பக்கோடாவும் ரொம்ம மேட்ச். பஹூ ருசி.(கடன் வாங்கிய வார்த்தைகள் – லாசரா).

தம்பி இன்னொரு பொட்லம் வேணுமா‘

மத்யமாய் தலை ஆட்டுகிறேன்.

2 நிமிடம்இரு. சூடா போட்டுத் தரேன்.

கேட்கவா வேணும். வயறும் மனமும் நிறைந்த காலங்கள்.

இப்பொழுதும் மழை பெய்து கொண்டிருக்கிறது. நினைவு வாசனைகள் நீள்கின்றன.

புகைப்படம்: R.s.s.K Clicks

சமூக ஊடகங்கள்

ஓய்வுறுதல்

தாயத்தில் தொடங்குகிறது

பரமபத வாழ்வு.

சில நேரம் ஏணிகள்

சில நேரம் பாம்புகள்

சில நேரம் சலனங்கள் அற்று.

அடைந்தபின்

மறுபடியும் தாயம் ஒன்று.

விடியலுக்குப் பின்

ஒய்வு பெருகின்றன

தாயக் கட்டைகளும்.

புகைப்படம் : R.s.s.K Clicks

சமூக ஊடகங்கள்

சேதித்தல்

அடர்ந்த பெருங்காடு ஒன்றில்

பயணப்பட முற்படுகிறேன்.

சில மரங்களும் கொடிகளும்

பேசத் துவங்கி பின் தொடர்கின்றன.

சில மரங்களின் இலைகள் துளிர் விட ஆரம்பித்து இருகின்றன.

சில மரங்கள் பூத்து இருக்கின்றன.

சில மரங்கள் காய்ந்து இருக்கின்றன.

சில மரங்கள் வேரோடு சாய்ந்து இருக்கின்றன.

‘காண இயலா பெரும்காடு

கடந்திடவும் வழியில்லை

திரும்பி செல்லவும் காலமில்லை‘ என்கின்றன.

‘காலம் கடந்தவன்‘ என்கிறேன்

‘பயணப்பட்டுஎதைக் காண விழைகிறாய்‘ என்கின்றன.

‘பயணமே என் பணி‘ என்கிறேன்.

‘எங்கள் வாக்கினை மறுதலித்தவர்கள்

எங்களில் ஒருவராகி விடுவார்‘ என்கின்றன.

‘மௌனத்தில்வெற்றி கிட்டுவதில்லை‘

என்று கூறி பாதங்களை மாற்றி பதிய வைக்கிறேன்.

வெளிர் பச்சை நிற கொடி ஒன்று

என் கால்களை சுற்றத் துவங்குகிறது.

பின் தொடர்கின்றன கொடிகளும், மரங்களும்.

பிறிதொரு நாளில்

மற்றொருவன் பெரும் காட்டில்

பயணப்பட எத்தனிக்கிறான்.

அப்போது

மரங்களின் எண்ணிக்கையில் ஒன்று அதிகமாகி இருந்தது.

*சேதித்தல் – வெட்டுதல் – திருவந்தியார்மெய்கண்ட சாத்திரம்

புகைப்படம் : Karthik Pasupathi

சமூக ஊடகங்கள்

தரித்தல்

சலனமற்ற நீர்ப்பரப்பின் மேல்

பறந்து செல்லும் பறவை ஒன்று

வாயினில் இருக்கும் இரையினை

நழுவ விட்டுச் செல்கிறது.

பெரும் அலைகளுக்குப் பின்

தன் முனைப்பின்றி

அடங்குகின்றன அலைகள்.

*தரித்தல் – ஆதாரமாதல்

புகைப்படம் : R.s.s.K Clicks

சமூக ஊடகங்கள்

I.T என்னும் பம்மாத்து – மயானம்

என்னா JK, rest room போய்ட்டு வரத்துக்குள்ள system lock ஆகிடிச்சி?

நீ இப்பத்தான சேர்ந்து இருக்க. உனக்கு நம்ம office பத்தி தெரியல. உனக்கு இது முதல் தடவ. அதால project manager ஐ பார்த்து unlock பண்ண சொல்லு. அடுத்த தடவை unlock செய்யறத்துக்கு நீ president ஐ தான் பாக்கணும்.

—————————

டேய் தம்பி, சீக்கிரம் டீய குடுடா,

ஏன் சார்.

நான் monitor ஐ விட்டுவந்து 1.31478 ஆகிடுச்சி. இன்னும் 1.21567 செகண்ட போகலேன்னா, ‘monitor ஐ பாக்கல’ன்னு மைக்ல announce பண்ண ஆரம்பிச்சிடுவாங்க.

——————–

என்னா SM , rest room ல இருக்கும் போது ‘wake up, wake up, it’s brand new day ‘ அப்படீன்னு சத்தம் வருது.

நீ அங்க போயி 32.31567 செகண்ட்ஸ்க்கு மேல ஆகிடுச்சினா, அப்படித்தான் வரும். 1.21.000023 செகண்ட்ஸ்க்கு மேல இருந்து பாரு, கெட்ட வார்த்தைகள் எல்லாம் வரும்.

————————————

நேத்து ஏன் வீட்டுக்கு போகும் போது அவ்வளவு சந்தோஷமா இருந்த

Card punch ஆகிடுச்சி. அதான நான் வேலைல இன்னும் இருக்கேன்னு நிம்மதிதான். ஆமா, நீ ஏன் இவ்வளவு சந்தோஷமா இருக்க?

எனக்கு இன்னைக்கு in time க்கு card punch ஆகிடுச்சி

————————————

நாங்க ‘உத்தம பருந்து’ கம்பெனியில் இருந்து பேசறோம். அது ‘ABXY’ consultancy தானே?

எங்களுக்கு ஒரு candidate recruitment செய்து தரணும்

Details, சொல்லுங்க சார்.

Job, contact job தான்.. அவர் எங்க கிட்ட 1 மாசம், 3 நாள், 7 மணி நேரம், 10 நிமிடம், 1 செகண்ட் தான் work பண்ணப்போரார். Oracle 12c, SQL Server 12.1.4100.1, Oracle E-Business Suite 12.1, SAP EHP 7 for SAP ERP 6.0, PHP 5.6.9, Version 8 Update 45 are mandatory. Black box testing, White box testing,Unit testing,Incremental integration testing,Integration testing,Functional testing,System testing,End-to-end testing,Sanity testing,Regression testing,Acceptance testing,Load testing, Stress testing, Performance testing, Usability testing செய்யணும். Quality standard படி documentation செய்ய தெரிஞ்சி இருக்கணும. Solaris certification இருந்தா, perl development தெரிஞ்சி இருந்தா added advantage.

Salary எவ்வளவு கொடுப்பீங்க?

We are lower middle segment company (அட பாவிகளா). Job ம் contact job தான். அதனால 9823.47 தான் கொடுக்க முடியும். இதுல உங்க consultancy fees ம் included.

————————————

என்னா RS கவலையா இருக்க.

1ம் தேதி தான் சேர்ந்தேன். இன்னைக்கு 31ம் தேதி. Retirement.

இதுக்கு போய் கவல படுறீங்க. பல பேர், 1ம் தேதி சேர்ந்து, 1ம் தேதியே retire ஆகி இருக்காங்க.நீங்களாவது 31 நாள் வேல பார்த்து இருக்கீங்க.

————————————

இக்கட்டுரைகளின் நோக்கம் I.T துறை பற்றி கனவுகளுடன் வாழ்ந்து கொண்டிருக்கும் பலருக்கு அதன் உண்மையின் சாராம்சத்தை விளக்குவது மட்டுமே. ‘இத்துறையில் மட்டுமா இப்படி நிகழ்கிறது’ என்பவர்களுக்கு, ‘இத்துறையில் மட்டுமே மிக அதிகமாக நிகழ்கிறது’ என்பதே என் பதில்.

சமூக ஊடகங்கள்

மீதானப் பெருவெளி

மருத நில மொன்றில்

மனிதன் ஒருவன் எதிர்ப்படுகிறான்.

கருத்த மேனியுடன்

ஆடைகளும் கறுத்து காணப்படுகிறது.

பல ருத்ராட்ஷ மாலைகளில்

ஒன்று மட்டும் மிகவும் கருமை நிறமுடையதாய்.

ஸ்னேகமாய் புன்னைக்கிறான்.

கைகளை யாசிப்பது போல்

குவிக்கச் சொல்கிறான்.

தன் கைகளில் இருக்கும் நீரை

என் கைகளில் இடுகிறான்.

வெண்நிற மேகங்கள்

நீரில் பிரதிபலிக்கின்றன.

கைகளில் இருப்பது ‘நீரா அல்லது ஆகாயமா’ என்கிறான்.

விடை பகர துவங்குகையில்

தூரத்தில் நாய்கள் விளையாடத்

துவங்கி இருக்கின்றன.

மீதானப் பெருவெளி – ஞெயம் அளக்கப்படு பொருள்
புகைப்படம் : இணையம்

சமூக ஊடகங்கள்

சைவத் திருத்தலங்கள் 274 – திருகச்சிநெறிக்காரைக்காடு

தல வரலாறு(சுருக்கம்)/ சிறப்புகள் – திருகச்சிநெறிக்காரைக்காடு – காஞ்சிபுரம்

பஞ்சபூத தலங்களில் – பிருத்வி நிலம்

• 7 சீடர்களுடன் தட்சிணா மூர்த்தி

• சுவாமி சற்றே சிவந்த நிறம்

• நந்தியின் கழுத்து மட்டும் தெற்கு நோக்கி

• உடல் முழுவதும் கண் கொண்ட இந்திரனின் சாபம் விலகிய முக்தி அடைந்த தலம்

• ஆலயம் இருக்கும் பகுதி காரைச் செடி காடாக இருந்ததால் காரைக்காடு

தலம்	திருகச்சிநெறிக்காரைக்காடு
பிற பெயர்கள்	திருக்காலிமேடு
இறைவன்	சத்யநாதர், திருக்காலீஸ்வரர், காரைத்திருநாதர், சத்தியவிரதேஸ்வரர், சத்தியநாதேஸ்வரர்.
இறைவி	பிரமராம்பிகை, காரார்குழலி
தல விருட்சம்	காரைச்செடி
தீர்த்தம்	இந்திர, சத்யவிரத தீர்த்தம்
விழாக்கள்	மார்கழி திருவாதிரை, சிவராத்திரி, அன்னாபிஷேகம்.
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 7 மணி முதல் 1 மணி வரை, மாலை 4 மணி முதல் இரவு 7 மணி வரை அருள்மிகு சத்யநாதசுவாமி திருக்கோயில், காஞ்சிபுரம் – 631 502. காஞ்சிபுரம் மாவட்டம். +91- 44 – 2723 2327, 2722 1664.
வழிபட்டவர்கள்
பாடியவர்கள்	திருஞானசம்பந்தர் – 11 பதிகங்கள்,
நிர்வாகம்
இருப்பிடம்	காஞ்சிபுரம்
இதர குறிப்புகள்	தேவாரத் தலங்களில் 237 வது தலம் தொண்டை நாட்டுத் தலங்களில் இது 5 வது தலம். காஞ்சிபுரம் பேருந்து நிலையத்தில் இருந்து 2 கி.மி

சத்யநாதர்

பாடியவர் திருஞானசம்பந்தர்

திருமுறை 3ம் திருமுறை

பதிக எண் 65

திருமுறை எண் 8

பாடல்

ஏழ்கடல்சூழ் தென்னிலங்கைக் கோமானை யெழில்வரைவாய்த்

தாழ்விரலால் ஊன்றியதோர் தன்மையினார் நன்மையினார்

ஆழ்கிடங்குஞ் சூழ்வயலு மதில்புல்கி யழகமரும்

நீள்மறுகிற் கலிக்கச்சி நெறிக்காரைக் காட்டாரே

பொருள்

ஏழு கடல்களால் சூழப்பட்ட இலங்கை அரசனான இராவணனை, அழகிய கயிலையின் கீழ் தனது பெருவிரலால் ஊன்றி அழித்த பெருமை உடையவர். அவர் எல்லா உயிருக்கும் நன்மை செய்பவர். அப்பெருமான் ஆழ்ந்த அகழியும், அதை சுற்றி இருக்கும் வயல்களும், மதில்களும், நீண்ட அழகிய வீதிகளை உடைய திருக்கச்சிநெறிக் காட்டில் உறைகின்றார்.

கருத்து

உவர்நீர் (உப்புத் தண்ணீர்க் கடல்), நன்னீர் (நல்ல தண்ணி), பாற்கடல், தயிர்க்கடல், நெய்க்கடல், கருப்பஞ்சாற்றுக் கடல், தேன் கடல் என்று ஏழு வகைக் கடல்கள் குறிப்பிடப்படுகின்றன. இவை அனைத்தும் அந்த தேசம் செழுமையாக இருப்பதையே குறிக்கின்றன.

பரா பட்டாரிகையான அம்பிகை உறையும் மணித்வீபம் மத்தியில்

என்பர் சாக்தர்.

பாடியவர் திருஞானசம்பந்தர்

திருமுறை 3ம் திருமுறை

பதிக எண் 65

திருமுறை எண் 9

பாடல்

ஊண்டானும் ஒலிகடல்நஞ் சுடைதலையிற் பலிகொள்வர்

மாண்டார்தம் எலும்பணிவர் வரியரவோ டெழிலாமை

பூண்டாரும் ஓரிருவ ரறியாமைப் பொங்கெரியாய்

நீண்டாருங் கலிக்கச்சி நெறிக்காரைக் காட்டாரே.

பொருள்

சிவபெருமான், மிகுந்த சப்தங்களுடன் தோன்றிய ஆலகால விஷத்தை உண்டவர். பிரமனின் தலையினை கொய்து, அதனை கபாலமாக ஏந்தியவர்; இறந்தவர்களின் எலும்புகளை மாலையாக அணிந்தவர். வரிகளை உடைய பாம்பினை அணிந்தவர்; திருமால், ப்ரம்மா இருவரும் அறிய முடியாதவாறு நீண்ட ஒளிப் பிழம்பாகி நின்றவர். அத்தகைய சிவபெருமான், கலிக்கச்சி நெடுங்காட்டில் உறைகிறார்.

புகைப்படம் : தினமலர்

சமூக ஊடகங்கள்

அகளம்

எனக்கான வாசகங்களை

யாரோ எழுதிக் கொண்டு இருக்கிறார்கள்

பலர் கவிதையாகவும்

சிலர் மௌனமாகவும்.

*அகளம் – வடிவம் அற்றது – திருவந்தியார்மெய்கண்ட சாத்திரம்

புகைப்படம் : R.s.s.K Clicks

சமூக ஊடகங்கள்

மேலாம் எழுத்து

பஞ்ச பூத கவிதை வரிசையில் – நெருப்பு

காலத்தின் சுழற்சியில்

நான் என்னில் இருந்து விலகுகிறேன்.

உடல் மட்டும் பிரகாசமாய் நெருப்பில்

எரிந்து கொண்டு இருக்கிறது.

தோழமையாய் ஒரு பேச்சினை

தொடங்குகிறது ஆதி நெருப்பு.

சுற்றிலும் மணி ஓசைகள் ஒலிக்கின்றன

‘உன் உருவாக்கத்திற்கு காரணம் நானே

என்னில் புனிதப்படாதவை எதுவும் இல்லை’ என்கிறது

சுற்றிலும் தாள வாத்தியங்கள் ஒலிக்கின்றன.

‘ஆதி பசியினை நீ அறிவாயா,

நெற்றிக்குள் சுடர் கொண்டவன்

இன்னுமா நீ அறியவில்லை என்கிறது

சுற்றிலும் வண்டுகள் ஒலிக்கின்றன.

பொருள்களை தூய்மை செய்வது என் பொருப்பு.

உலகப் பொருள்களில் நீ இருப்பதால் நீயும் என் பொருப்பு என்கிறது.

சுற்றிலும் சங்க நாதம் தொடர்கிறது.

இடம் பெயர்தலில் என் பங்கு முக்கியமானது என்கிறது.

சுடர் அடங்க தொடங்குகிறது.

தொடர்கிறது பிரணவ கார ஒலி.

முற்றுப் பெறுகிறது நீண்ட நெடும் பயணம்.

தொடங்குகிறது புதிய விதிமுறைகளுடன்

ஆட்டம் ஒன்று.

* மேலாம் எழுத்து – பரநாத ஒலி – திருமந்திரம் – 1212

புகைப்படம் : Virtualcitizen India

சமூக ஊடகங்கள்

காற்றில் ஆடும் சருகுகள் – 18

Ethnic and party wear for your infants. உங்க வியாபார அழிச்சாட்டியத்துக்கு அளவே இல்லையாடா?

———————————————————————————————————————————————————————–

ஆசிரியர்: பிரளய காலம் – உதாரணம் தருக.

மாணவன் : சமையல் குறிப்பை TVல் பார்த்து எங்க அம்மா எழுத ஆரம்பிக்கும் தருணங்கள்.

செத்தாண்டா சேகரு.

———————————————————————————————————————————————————————–

சில மாதங்களுக்கு முன்

உங்க பேஸ்ட்ல உப்பு இருக்கா?

சில தினங்களுக்கு முன்

உங்க பேஸ்ட்ல ஸுகர் இருக்கா?

சில மாதங்களுக்கு பின்

ஏங்க, வீட்ட உப்பு மொளா, புளீ இல்லீங்க.

இருடி, பேஸ்ட் கம்பெனி காரணுக்கு சொல்லி அனுப்புறேன்.

உங்க கண்டுபிடிப்புல தீய போட்டு கொளுத்த.

———————————————————————————————————————————————————————–

கிளினிக் வாசல் board -ல்

தொல்காப்பியன், தொண்டை சிகிச்சை நிபுணர்(தங்க மெடல் பெற்றவர்)

உங்க அழிச்சாட்டியத்துக்கு அளவே இல்லையாடா?

———————————————————————————————————————————————————————–

Coca Cola – Train Advert 2015

ஒரு மனிதன் ரயில் ஏற முயற்சிக்கிறான். இடம் பிடிக்கிறான். அருகில் இருப்பவர்கள் தொல்லை செய்கிறார்கள். பல கஷ்டங்களுக்கு பிறகு குளிர் பானம் அருந்த செல்கிறான். அங்கும் அவனுக்கு அவன் விரும்பியது கிடைக்கவில்லை.

கடைசியாக தான் விரும்பிய பானத்தை குடித்துவிட்டு ஏப்பம் விட்டுச் செல்கிறான்.

1. பன்னாட்டு குளிர் பானங்கள் குடித்த பிறகு இப்படித்தான் ஏப்பம் வருமா?

2. இதே விளம்பரத்தை தனது தாய் திருநாட்டில் இதை போன்றே வெளியிடுவார்களா?

3. இந்தியாவில் மட்டும் தான் இப்படி இந்த பானம் குடித்தபிறகு ஏப்பம் வருமா?

இதை விட coca cola தன்னைத்தானே அசிங்கப்படுத்திக் கொள்ள முடியாது.

———————————————————————————————————————————————————————–

குழந்தைகள் வளர்கிறார்கள் என்பதே பயத்தின் முதன்னைக் காரணமாக இருக்கிறது.

———————————————————————————————————————————————————————–

எனது மகன் வீட்டில் நுழைகிறான். நோயுற்று படுத்திருக்கிறேன்.

மிகக் கலவரமாக ‘ என்னா ஆச்சு’

இயலாமையை கைகளால் காண்பிக்கிறேன். ‘பேச முடியவில்லை’

அவன் கண்களில் ஒளிக்கீற்று.

அப்ப இன்னைக்கு ஜாலியா T.V பாக்கலாம், system எடுத்துக்கிட்டு games விளையாடலாம், tab வச்சி விளையாடலாம். உங்க மொபைல்லயும் games ஆடலாம். Thank you GOD.

———————————————————————————————————————————————————————–

மனைவி:

இன்னைக்கு ஞாயிற்று கிழம. அதால நீங்க என்ன செய்றீங்கன்னா துணி எல்லாம் தொவைக்கிறீங்க, வீட்ட க்ளீன் பண்றீங்க……….

என்னங்க, சொல்லி முடிக்கிறத்துக்குள்ள சாயங்காலம் ஆகிடுச்சி.

கணவன்: ????

சமூக ஊடகங்கள்

இறைச் சார்பு

தூக்கத்திலும், துக்கதிலும்

தொலைகிறது இளமைகள்.

கடன் வாங்கி கழித்த

இளமை நினைவுகள் பற்றி
கழிகிறது முதுமைகள்.

இறைச் சார்பு – மரணம்

சமூக ஊடகங்கள்

உவாதி

பிஞ்சுக் கைகளால்

ரோஜாப் பூ ஒன்றினை

வரைந்து முடிக்கிறாய்.

பின் வரும் நிமிடங்களில்

அழத் தொடங்குகிறாய்.

காரணம் வினவுகிறேன்.

பூக்கள் வாசனை அற்று இருக்கின்றன என்கிறாய்.

மகளின் வார்த்தைகளின் முடிவில்

தொட்டுத் திரும்புகிறது

எனது இளமைக் காலங்கள்.

*உவாதி – த்யானிப்பவன். திருமந்திரம் – 1202
வடிவ அமைப்பு : சம்யுக்தா செந்தில்

சமூக ஊடகங்கள்

காற்றில் ஆடும் சருகுகள் – 17

ஃப்ஸ்ட் செமஸ்டர் மேக்ஸ் அரியரையே இன்னும் முடிக்கல. இந்த புரபசர் எல்லாம் எப்படி ‘Post Dr.’ பண்றாங்க?. இப்படிக்கு மேக்ஸ் புக்கை பரிச்சைக்கு முன் தினம் எந்திரன் ஸ்டைலில் ஸ்கேன் செய்வோர் சங்கம்.

*****************************************************************************

வாகனத்தில் போகும் போது ‘Horn’ அடித்துவிட்டு, நாமே ஒதுங்கி செல்வது இந்த தாய் திரு தமிழ் நாட்டில் மட்டும் தான். இப்படிக்கு புதுப்பேட்டை போய் வாகனம் வாங்கலாமா என்று 30 மாதங்களாக யோசிப்போர் சங்கம்.

*****************************************************************************

நாம ஜெராக்ஸ் எடுக்க இவ்வளவு கஷ்ட பட வேண்டியதாக இருக்கு. இவிங்க எப்படி இந்த 750 பக்கம் புத்தகம் எழுதி இருப்பாங்க? இப்படிக்கு எக்ஸாம் முதல் நாள் ஜெராக்ஸ் எடுக்க காத்திருக்கையில் கரண்ட் போனபின் புத்தகம் படிப்பது பற்றி யோசிப்போர் சங்கம்.

*****************************************************************************

Pre-paid sim card வச்சிகிட்டு rate cutter முடிச்சி 7.01, 9.01 ன்னு முடிற காலுக்கு 1 ரூ இழக்கறவனுக்குத் தான் தெரியும் 1 ரூ வலி. இவன் Rate cutter முடிஞ்து நண்பனிடன் வாங்கிய பத்து ரூபாய்க்கு recharge செய்து.Call பேசி. அதில் ஒன்பது ரூபாயை இழந்தவர்கள் சங்கம்.

*****************************************************************************

நண்பரின் குமுறல்.

பொண்டாட்டிகிட்ட நல்ல பேர எடுக்க முடியாது போலடா.

ஏண்டா?

‘நேத்து ராத்ரி மாடியில காய்ர துணிய எடுத்துகிட்டு வர சொன்னா. ராத்ரி எடுத்துகிட்டு வரல. திட்டுவான்னு காலைல எடுத்துகிட்டு வந்தேன். குளிர்ல எல்லா துணியும் நனைஞ்சி போய் இருக்கு. இத போய் எடுத்துகிட்டு வந்து ஒட்டிக்கி ரெட்டி வேல வக்கிறீங்களே’ அப்படீங்கறா. நான் என்னடா செய்ய?

செத்தாண்டா சேகரு.

*****************************************************************************

Printer ink எவ்வளவு கெடுதல்ன்னு பேசுறோம். ஆனா, அது பிரிண்ட் ஆன பேப்பரை, பேப்பர் ப்ளேட்டாக பயன் படுத்துகிறோம். இதுல எதாவது கெடுதல் இருக்குமா? இவன் பிரிண்ட் ஆன பேப்பரில் சமோசா சாப்பிட்டு விட்டு, அதில் உள்ள கெமிக்கல் பற்றி ஆராய்ச்சி செய்து முனைவர் பட்டம் பெற துடிப்போர் சங்கம்.

*****************************************************************************

ஊட்டச்சத்து மிகுந்த குடிநீர். ஒரு வேளை ஏதாவது அரசியல்வாதி இந்த ‘Ad’ ready செய்திருப்பானோ?

11ரூ டிக்கெட்டுக்கு 10 ரூ குடுத்தா 1ரூ சில்லறைய கரிட்டா கேக்கிறான் கண்டக்டர். ஆனா 11ரூ டிக்கெட்டுக்கு 12 ரூ குடுத்தா மீதி சில்லறை இல்லேங்கிறான். அதோட கூடவே நம்மை பிச்சைக்காரனை விட மோசமா பாக்கிறான். இது தான் வாழ்க்கை. இவன் மனைவியிடம் வாங்கிய காசில் தண்ணி அடித்து விட்டு மீதி சில்லறை வாங்காமல் தத்துவவாதி ஆக முயற்சிப்போர் சங்கம்

*****************************************************************************

சாதாரண பிரசவ செலவில் cesarean டெலிவரி செய்யப்படும். உங்க வியாபார ஆர்வத்திற்கு ஒரு அளவே இல்லையாடா?

*****************************************************************************

Srusti Montessori School – Drawing, Painting, Music, spoken English/Hindi, abacus etc., உங்க ஆர்வத்துக்கு அளவே இல்லயாடா. விட்டா வயத்துல வளர்ர குழந்தைக்கு கூட IIT class க்கு training குடுப்பீங்க போல இருக்குடா.

சமூக ஊடகங்கள்

வியோமம்

கைகளில் இருக்கும் குழந்தை ஒன்று

விழி உயர்த்தி ஆகாயம் காட்டுகிறது.

ஆகாயத்தின் கூறுகள்

என்னில் பிரதிபலிக்கின்றன

காற்று மண்டலம் தாண்டிய

அது பேசத் துவங்குகிறது.

‘ஒலிகளின்மூலப் பிரதி நானே,

‘ஒளிகளும்என்னுள் அடங்கும்‘ என்கிறது.

வார்தைகள் மௌனத்தில் உறைகின்றன.

‘என்னில்கரையாதவை எவையும் இல்லை‘ என்கிறது

‘நானே முதல் படைப்பு.

எல்லை கடந்த பொருள்’ என்றும் கூறுகிறது

உன் உலகம் என் உலகம்

உன் படைப்பு என் படைப்பு ‘ என்கிறது.

‘எனில் எப்பொழுது உன் முழுமையை உணர முடியும்’ என்கிறேன்

‘ஓடு உடைத்தால் நீயே நான்’ என்கிறது.

தொடர்கிறது சங்க நாதம்.

வியோமம் – ஆகாயம், திருமந்திரம் – 1152

புகைப்படம் : Gayu

சமூக ஊடகங்கள்

சைவத் திருத்தலங்கள் 274 – திருக்கச்சி அனேகதங்காவதம்

தல வரலாறு(சுருக்கம்)/ சிறப்புகள் – கச்சிஅனேகதங்காவதேஸ்வரர்

•இறைவன் சுயம்பு மூர்த்தி

•விநாயகர் வல்லபையை மணமுடித்த தலம்

•குபேரன், தன் முற்பிறவி புண்ணியபலனால், அருந்தமனின் மகனாப்பிறந்து, அளகைக்கு அரசனாதல்,.சுக்கிரன், அவன் மீது பொறாமை கொண்டு தொல்லைகள் கொடுத்தல், சிவன், குபேரனுக்காக சுக்கிரனை விழுங்கி அவனது கர்வத்தை அடக்குதல்

தலம்	அனேகதங்காவதம்
பிற பெயர்கள்	திருக்கச்சி அனேகதங்காவதம்
இறைவன்	கச்சிஅனேகதங்காவதேஸ்வரர்
இறைவி	காமாட்சி
தல விருட்சம்
தீர்த்தம்	தாணு தீர்த்தம்
விழாக்கள்
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 6 மணி முதல் 8.00 மணி வரை, அருள்மிகு கச்சிஅனேகதங்காவதேஸ்வரர் திருக்கோயில், அனேகதங்காவதம் – 631 501. காஞ்சிபுரம் மாவட்டம். +91- 44 – 2722 2084
வழிபட்டவர்கள்
பாடியவர்கள்	சுந்தரர்
நிர்வாகம்
இருப்பிடம்	காஞ்சிபுரம் பேருந்து நிலையத்தில் இருந்து 2கி.மீ
இதர குறிப்புகள்	தேவாரத் தலங்களில் 237 வது தலம் தொண்டை நாட்டுத் தலங்களில் இது 4 வது தலம்.

கச்சிஅனேகதங்காவதேஸ்வரர்

பாடியவர் சுந்தரர்

திருமுறை 7 ம் திருமுறை

பதிக எண் 010

திருமுறை எண் 7

பாடல்

கட்டு மயக்கம் அறுத்தவர் கை தொழுது ஏத்தும் இடம்; கதிரோன் ஒளியால்

விட்ட இடம்; விடை ஊர்தி இடம்; குயில் பேடை தன் சேவலொடு ஆடும் இடம்;

மட்டு மயங்கி அவிழ்ந்த மலர் ஒரு மாதவியோடு மணம் புணரும்

அட்ட புயங்கப்பிரானது இடம் கலிக் கச்சி அனேகதங்காவதமே

பொருள்

கச்சி அனேகதங்காவதம் என்னும் இவ்விடம் பல சிறப்புகளை உடையது. மும்மலங்களின் ஒன்றான மாயை(மயக்கம்) அறுத்தவர்கள் கைகளால் தொழும் இடம் இது. கதிரவன் தனது ஒளி குன்றிய இடம். இறைவன் ரிஷப வாகனத்தை ஊர்தியாக கொண்ட இடம். குயில்கள் பேடைகளும் சேவல்களும் ஆடும் இடம். பூத்த மணம் வீசும் மலர்கள்களை உடைய தேவியுடம் அட்டமா நாகங்களை அணிந்த இறைவன் சேரும் இடம்

கருத்து

கதிரவன் தனது ஒளி குன்றிய இடம்.

இறைவன் தன் பேரொளிக்கு முன் கதிரவன் ஒளி மங்கும் என்பது ஒரு கருத்து.

அடர்ந்த காடுகளால் சூழப்பட்டிருப்பதால் கதிரவன் ஒளி உட்புக முடியாமல் உள்ளது என்பது மற்றொரு பொருள்.

குயிற் பேடை; இளவேனிற் காலத்தே ஓயாது அகவும் இயல்புடையது

அட்டமா நாகங்களை – அட்டமா சித்தி

பாடல்

புல்லி இடம்; “தொழுது உய்தும்” என்னாதவர் தம் புரம் மூன்றும் பொடிப்படுத்த

வில்லி இடம்; விரவாது உயிர் உண்ணும் வெங்காலனைக் கால் கொடு வீந்து அவியக் கொல்லி இடம் குளிர் மாதவி, மவ்வல், குரா, வகுளம், குருக்கத்தி, புன்னை,

அல்லி இடைப் பெடை வண்டு உறங்கும் கலிக் கச்சி அனேகதங்காவதமே.

பொருள்

கச்சி அனேகதங்காவதம் என்னும் இவ்விடம் பல சிறப்புகளை உடையது.. வீடு பேற்றை அளிக்கின்ற இறைவனை தொழுது ‘உய்வோம்’ என்று எண்ணாமல் அவற்றை நிலைத்த பொருள் என்று கொண்டவர் கோட்டைகளை அழித்தவன் உறையும் தலம் இது. உயிர்கள் இடத்து வினைகளின் பாரபட்சம் பாராமல் அவைகளின் உயிரை நீக்கும் காலனை அழிக்கும் படியாக தனது கால்களால் கொன்றவன் வாழும் இடம். குளிர்ந்த வனமல்லிகை, முல்லை, குரா, மகிழ், குருக்கத்தி, புன்னை இவற்றின் மலர்களது இதழ்களில் பெண் வண்டுகள் உறங்குகின்ற, ஆரவாரத்தை யுடையது இத்தலம்

புகைப்படம் : தினமலர்

சமூக ஊடகங்கள்