அரிஷ்டநேமி – Page 67 – உருவேறத் திருவேறும்

சைவத் திருத்தலங்கள் 274 – திருஇடைச்சுரம்

தல வரலாறு(சுருக்கம்)/ சிறப்புகள் – திருஇடைச்சுரம்

•மூலவர் – மரகத (பச்சைக்கல்) சிவலிங்கத் திருமேனி; சுயம்பு மூர்த்தி, சதுரபீட ஆவுடையார்

•பார்வதிதேவி பசுவடிவில் பால் சொரிந்து இறைவனை வழிபட்டத் தலம்

•அகழி அமைப்புடைய கருவறை

•சிவஸ்தல யாத்திரையின் போது நீண்ட தூரம் நடந்து வந்ததாலும், வெயில் ஏறியதாலும் மிகவும் களைப்படைந்த திருஞானசம்பந்தருக்கு இறைவன் இடையன் வடிவில் வந்து தயிர் தந்த ஸ்தலம்

சிவன் மறைந்த குளக்கரை காட்சிகுளம்

தலம்	திருஇடைச்சுரம்
பிற பெயர்கள்	திருவடிசூலம்
இறைவன்	ஞானபுரீஸ்வரர், இடைச்சுரநாதர்
இறைவி	கோவர்த்தனாம்பிகை, இமயமடக்கொடி அம்மை
தல விருட்சம்	வில்வம்
தீர்த்தம்	மதுரா தீர்த்தம்
விழாக்கள்
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 8 மணி முதல் பகல் 12 மணி வரை மாலை 4 மணி முதல் இரவு 7 மணி வரை அருள்மிகு ஞானபுரீஸ்வரர் திருக்கோவில் திருவடிசூலம் வழி செம்பாக்கம் காஞ்சீபுரம் மாவட்டம் PIN – 603108 044 – 27420485, 09444523890
வழிபட்டவர்கள்	அம்பாள் ,கௌதமர், பிருங்கி முனி ,சனற்குமாரர்
பாடியவர்கள்	திருஞானசம்பந்தர் – 1 பதிகம்
நிர்வாகம்	திருக்கழுக்குன்றம் அருள்மிகு வேதகிரீஸ்வரர் தேவஸ்தானத்தின் கட்டுப்பாடு
இருப்பிடம்
இதர குறிப்புகள்	தேவாரத் தலங்களில் 271 வது தலம் தொண்டை நாட்டுத் தலங்களில் இது 27 வது தலம்.

இடைச்சுரநாதர்

இமயமடக்கொடி

புகைப்படம் : தினமலர்

பாடியவர் திருஞானசம்பந்தர்

திருமுறை 1

பதிக எண் 78

திருமுறை எண் 8

பாடல்

தேம் கமழ் கொன்றை அம் திருமலர் புனைவார்;

திகழ்தரு சடைமிசைத் திங்களும் சூடி,

வீந்தவர் சுடலை வெண் நீறு மெய் பூசி,

வேறும் ஓர் சரிதையர்; வேடமும் உடையர்;

சாந்தமும் அகிலொடு முகில் பொதிந்து அலம்பி,

தவழ் கன மணியொடு மிகு பளிங்கு இடறி,

ஏந்து வெள் அருவிகள் எழில் திகழ் சாரல்

இடைச்சுரம் மேவிய இவர் வணம் என்னே?

பொருள்

தேன் மணம் கமழும் அழகிய கொன்றை மலர் மாலையைச் சூடுபவரும், சடைமுடியில் பிறை மதியைச் சூடியவரும், இறந்தவர்களை எரித்து அந்த சுடுகாட்டுச் சாம்பலைத் தம் திருமேனி மீது பூசியவரும், பல்வேறு விதமான புராண நிகழ்வுக்குக் காரணமானவரும், புராண நிகழ்வின் காரணமாக பலப்பல வேடம் வேடம் ஏற்று காட்சி தருபவரும், சந்தனம், அகில் போன்ற வாசனை மிக்க மரங்களின் வாசனைகளை வாங்கி அவற்றின் மணத்தினை ஏற்று மழையாக பொழிய வைத்து அதன் காரணத்தால் உருண்டு வரும் பெரிய மணிகளையும் (ஸ்படிகம்) போன்ற பளிங்குகளையும் வெள்ளமென அடித்து வரும் அருவிகள் விளங்கும் மலைச் சாரலை உடைய இடைச்சுரத்தில் உறையும் பெருமானது இயல்பு யாதோ?

கருத்து

வீந்தவர் – இறந்தவர்.

சாந்தம் – சந்தனம்.

பாடியவர் திருஞானசம்பந்தர்

திருமுறை 1

பதிக எண் 78

திருமுறை எண் 9

பாடல்

பலவிலமிடுபலி கையிலொன்றேற்பர்

பலபுகழல்லது பழியிலர்தாமும்

தலையிலங்கவிரொளி நெடுமுடியரக்கன்

றடக்கைகளடர்த்ததோர் தன்மையையுடையர்

மலையிலங்கருவிகண் மணமுழவதிர

மழைதவழிளமஞ்ஞை மல்கியசாரல்

இலையிலவங்கமு மேலமுங்கமழு

மிடைச்சுரமேவிய விவர்வணமென்னே.

பொருள்

பல வீடுகளுக்கு சென்று அவர்கள் இடும் பிச்சையினை தனது ஒரு கையினால் ஏற்பவரும், பலவிதமாக புகழ்ச்சிகள் அல்லது இகழ்ச்சிகள் இல்லாதவரும்(இருமைகள் அற்றவர் எனும் பொருள்) ஏற்பவரும், நீண்ட முடிகளையிம் ஒளி பொருந்திய மகுடங்களையும் தரித்த பத்து தலை இராவணனின் நீண்ட கைகளை நெரித்த வலிமை உடையவரும், மலையில் விழும் ஆர்ப்பரிக்கும் அருவிகள் கொண்டதுமான இளமயில்கள் நிறைந்ததும், மேகங்கள் தவழும் சாரலை உடையதும், இலைகளை உடைய இலவங்கம் ஏலம் கமழ்வதுமான திருஇடைச்சுரத்தில் எழுந்தருளிய இப்பெருமானது இயல்பு யாதோ?

கருத்து

பல இலம் இடு பலி – பல வீடுகளுக்கு சென்று அவர்கள் இடும் பிச்சை.

(இக் கோயில் பற்றி மேலும் விபரம் தெரிந்தால் தெரியப்படுத்தவும்.)

சமூக ஊடகங்கள்

புனைவுகளின் அரிதாரங்கள்

ஆதியின் நாள் ஒன்றில்

பிறப்பொன்று நிகழ்ந்தது உயிருக்கு.

நிர்வாணத்தின் தன்மை அறியாது

தினமும் வீதியினில் விளையாடிது அக்குழந்தை.

எவரும் அறியா இரவுப் பொழுதில்

வீதியினை நனைத்தது மழையொன்று.

நிகழ்வறியாது விளையாட்டினை

தொடர்ந்தது அக்குழந்தை.

தொலைவு செல்லும் வாகனமொன்று

வீதி வழி சேற்றை

வாரி இறைத்துச் சென்றது அக் குழந்தைமேல்.

பெருங்கோபமுடன் மழலையில் கோபச்

சொற்களை வீசியது.

பின் தொடரும் வாகனங்களும்

தொடர்ந்தன அந் நிகழ்வை.

பிறிதொரு நாளில்

சொற்கள் அற்று இருந்தது அக்குழந்தை

உடலெங்கும் சேற்றின் படிமங்களை வாங்கியபடி.

புகைப்படம் : சித்திரம் நிழற்படம்

சமூக ஊடகங்கள்

படைப்புகள் – அகம் புறம் – ஒரு சிறு பார்வை

(எவரையும் முன்வைத்து எழுதப்படவில்லை)

அகம்

· நாம எல்லாம் எழுதினா போட மாட்டாங்க சார். அவங்களுக்குன்னு ஒரு குருப் வச்சிருக்கிறாங்க, அவன்க எழுதினாத்தான் போடுவாங்க.

· நானும் 15 வருஷமா எழுதிகிட்டுத்தான் இருக்கேன் சார். ஒரு பயலும் மதிக்கிறதே இல்லை சார்.

· சார், இவன்க எல்லாம் உள்ளுர் எழுத்தாளர்களை கொண்டா மாட்டாங்க, ரஷ்யா எழுத்துக்களை மட்டும் கொண்டாடுவாங்க.

· முழு நேர படைப்பாளிகள்ன்னு யாரும் இல்ல சார். பொழுது போக்குக்காக படைக்கிறாங்க சார். அப்புறம் என்ன படைக்க முடியும்?

· ஒரு வார பத்திரிக்கைக்கு ஒரு கவிதை எழுதி அனுப்சேன். நல்லா இருக்கு, நல்லா இல்ல அப்படீன்னு கூட பதில் அனுப்ப மாட்டேங்கறாங்க சார்.

· எல்லாரும் ஈகோ புடிச்சவங்களா இருக்காங்க சார். அவன் தான், அவன் குருப்புதான் ஒஸ்தின்னு நினைக்கிறாங்க.

புறம்

· படைப்பாளிகள் யாருமே படிக்கிறதே இல்ல சார். நினைச்சத எல்லாம் எழுதினா எப்படி சார் பத்திரிக்கையில போட முடியும்.

· தடி எடுத்தவன் எல்லாம் தண்டல்காரனோ இல்லையோ, பேனா புடிச்சவன் எல்லாம் கவித, கட்டுரைன்னு எழுத ஆரம்பிச்சா என்ன செய்ய முடியும். எல்லாருக்கும் சுஜாதான்னு நெனப்பு சார்.

· இலக்கிய பத்திரிக்கைன்னு போட்டேன் சார். 1000 கவிதை வந்திருக்கிறது. என்னா செய்யறது சொல்லுங்க.

· கதை, கவிதை கட்டுரைன்னு எழுதறாங்க சார், வல்லினிம் ஒற்று, மெய் எழுத்து மிகும் இடம், மிகா இடம் எதுவுமே தெரியல, அப்புறம் எப்டி நாங்க படிச்சி பப்ளிஷ் பண்ண முடியும்.

· இருக்கும் ரோஜா தோப்பில் அழகான் ஒரு செடி நீ மட்டுமே – இப்படி கவிதை எழுதினா என்ன சார் செய்யறது? (காதுகளில் மெதுவாக – அழகான் – அழகானன்னு கூட தெரியல. அதுல கூட தப்பு பார்த்தீங்களா )

· ஒரு புஸ்தகம் போடறது எவ்வளவு கஷ்டம்ன்னு இவன்களுக்கு தெரிய மாட்டேங்குது. அதான் சார் ப்ராபளமே

· லாசரா வோட ஜனனி படிச்சிருக்கிறியா, குபாரா வோட விடியுமா படிச்சிருக்கிறியா, 4 படைப்பாளிகள் பேரை சொல்லி கேட்டா இவங்கள் எல்லாம் யாரு அப்படீங்கறாங்க. என்ன செய்ய சொல்றீக.

· புஸ்தகம் போட்டா Review பண்றேன்னு ஒரு குருப் எல்லாதையும் வாங்கிட்டு போயிடுது. இதுல என்னா மிஞ்சும்ன்னு நினைக்கிறீங்க?

TRB Rating கம்மியாக இருப்பதால் இந்நிகழ்ச்சி இத்துடன் முடிவடைகிறது.

புகைப்படம் : R.s.s.K Clicks

சமூக ஊடகங்கள்

மகார ப்ரியை – சக்தி பீடங்கள் – 1 – ஹிங்குலாஜ் மாதா

மகாரம் – சக்திச் சுடர் – வாலை சூட்சம்

ஆமப்பா சிவயோகம் செய்வதற்கு

அப்பனே அகாரமுடன் உகாரஞ் சொன்னேன்

தாம்ப்பா மகார மென்ற வாலை தன்னை

தாரணியில் ஆர றிவார் சங்கை மார்க்கம்

காமப்பால் கொண்ட சிவகெங்கை யான்

கன்னி மனோன் மணியின் நாதமென்றும்

நாமப்பா சொல்லுகின்றோம் செந்தேனென்றும்

நாதாந்த நாதமென்றும் காரமாமே

அகத்தியர் அந்தரங்க தீஷா விதி

சிவயோகம் போன்ற கடுமையான யோகமுறை மார்கங்கள் செய்யும் போது விலங்குகள் மற்றும் மனிதர்களால் தொல்லைகள் ஏற்பட வாய்புண்டு. இதற்காக சித்தர்கள் நெற்றியில் வசிய திலகம் அணிவார்கள். அப்படிப்பட்ட சிவயோகம் செய்ய அகார விளக்கமும் உகார விளக்கமும் சொன்னேன். மகாரம் என்ற வாலையை இந்த பூமியில் யார் அறிவார். (சிவயோக முறைக்கு விளக்கம் உண்டு, வாலை முறைக்கு விளக்கம் இல்லை என்பது மறைபொருள் – எனவே எளிதில் அறியப்பட முடியாதது. குருமுகமாகத் தான் அறிய வேண்டும் என்பதும் மற்றொரு பொருள்). அமுத தாரணை அறிய மகார மென்ற வாலையை அறிய வேண்டும். அவ்வாறு அறிய நீர் வேண்டும். அதுவே சிவ கெங்கைத் தீர்த்தம். இதுவே கன்னி மனோன்மணித் தாயாரின் நாதமென்றும், செந்தேன் என்றும், நாதாந்த நாதமென்றும் நாம் உரைக்கின்றோம்.-

ஹிங்குலாஜ் மாதா

புகைப்படம் : தினமணி

எண்	குறிப்பு	விளக்கம்
1	தேவியின் பெயர்	ஹிங்குளா / சர்ச்சிகா / கோத்தரி / மஹாலக்ஷ்மி / கோடரீ
2	உடல் பகுதி	ப்ரம்மராந்தரம் (தலையின் ஒரு பகுதி அல்லது உச்சந்தலைப் பகுதி) அல்லது சகஸ்ராரம் (செந்தூரம் வைக்கும் நெற்றிப் பகுதி
3	பைரவர்	பீமலோசன பைரவர் அல்லது சிவபாரி பைரவர்
4	இருப்பிடம்	பாகிஸ்தான் – பலூசிஸ்தான் – லாஸ் பெலா அருகில் – ஹிங்கோல் ஆற்றங்கரை – ஹிங்குளாஜ் மலைக்குகை – ஹிங்குலாஜ் மாதா சக்தி பீடக் கோவில்
5	வழித்தடம்	பாகிஸ்தான் – கராச்சி – குவெட்டா (quetta) சாலையில் 120 கி.மீ – ஜீரோ பாய்ண்ட்-மேற்கு நோக்கி லியாரி (lyari) டவுன்- பௌஜி கேம்ப் (fauji camp) – அஸப்புரா சரை (asha pura sarai)
6	வடிவம்

புராணத் தொடர்பு

· ஹிங்குலி – முன் வகிட்டுக் குங்குமப் பொட்டு (அல்லது) செந்தூரம்

· ராமன்,சீதை மற்றும்ம் இலக்குவன் ஆகியோர்கள் தங்கள் வனவாசத்தின் போது தரிசித்த தலம்

புராணம் – 1

தற்போதைய சிந்துப் பகுதியை ரத்னசேன் என்ற மன்னன் ஆண்டு வந்தான். அவன் பரசுராமர் காலத்தைத் சார்ந்தவன். அவனுக்கு ஐந்து மனைவிகள் அவர்களின் பெயர்கள் சந்திரமுகி, பத்மினி, பத்மா, சுகுமாரி மற்றும் குசாவதி என்பனவாகும். அவர்களின் மகன்கள் முறையே ஜெய்சேன், பிந்துமான், விஷால், சந்திரசால் மற்றும் பரத் ஆகியோராவர். பரசுராமர் இம்மன்னனின் சமகாலத்தவர். எனவே பரசுராமரின் சபதம் (உலகின் அனைத்து சத்திரியர்களையும் அழிப்பேன்) முடிக்கும் காரணமாக இங்கு அவர் வருவது குறித்து அனைவரும் கவலை உற்றனர்.

அதனால் சரஸ்வதி நதிக்கரையில் ஆஸ்ரமம் அமைத்து வாழ்ந்திருந்த ததீசி முனிவரிடம் இவர்கள் அனைவரும் அடைக்கலம் புகுந்தனர்.ரிஷிகளின் ஆஸ்ரம எல்லைக்குள் போரிடக் கூடாதென்று விதியிருந்ததால் பரசுராமர் அங்கு செல்லவில்லை

மன்னன் ஆஸ்ரம எல்லை அறியாது வெளியே சென்றுவிட பரசுராமர் அவனைக் கொன்றார். அவனது மனைவிகள் மன்னனுடன் உடன்கட்டை ஏறினார்கள். ததீசி முனிவர் சேய்களை பாதுகாத்து, அந்த ஐவருக்கும் பிராமணர் போல் வேடமிட்டு வேதங்கள் மந்திரங்கள் முதலிய பல பயிற்சிகளை அளித்திருந்தார். அதனால் பரசுராமர் அவர்களை அடையாளம் காணாது கொல்லாமம் விட்டுச் சென்றார்.

ததீசி முனிவர் அனைவருக்கும் அவர்கள் பாதுகாப்பிற்காக ஹிங்குலா தேவி மந்திரத்தை உபதேசித்தார்.

தன் தம்பிகளுடன் நாட்டிற்கு திரும்பிச் சென்ற ஜெய்சேன் ஹிங்குலா தேவி மந்திரத்தை பாராயணம் செய்து தேவியின் அனுக்ரகம் பெற்று ஆட்சி செய்தான். இதனால் அவனை அடையாளம் கண்ட பரசுராமர் அவனை அழிக்க எண்ணி விரைந்தார். ஹிங்குலா தேவி ஜெய்சேன் பற்றி ‘நல்லுள்ளம் படைத்தவனென்றும் அவன் தன் பக்தனென்றும்‘ கூறி பரசுராமரைத் தடுத்தாள். அதனால் பரசுராமர் கோபம் தணிந்து தேவியை வணங்கித் திரும்பிச் சென்றார். அதனால் ஜெய்சேன் ‘ப்ரம்மகுல க்ஷத்ரியன்‘ ஆனான். ஹிங்குலா தேவி ப்ரம்மகுல க்ஷத்ரியர்களின் குலதெய்வமானாள்

புராணம் – 2

முன்னொரு காலத்தில் கோயில் பகுதியில் ஹிங்கோலி என்ற ஒரு பிரிவினரை விச்சதர் என்ற மன்னன் ஆட்சி செய்தான். அவனுக்கு ஹிங்குல் மற்றும் சுந்தரன் என்ற இரு மகன்கள் இருந்தனர்.

இளவரசன் சுந்தரன் அண்டை நாட்டின் மீது படையெடுத்து அந்நாட்டு மக்கள் பலரைக் கொன்று பெரும் செல்வத்தைக் கொள்ளை அடித்தால் அப்பகுதி மக்கள் சிவனிடம் தங்கள் குறைகளை முறையிட்டதால் சிவன் விநாயகனை அனுப்பி சுந்தரனை சம்ஹாரம் செய்ய வைத்தார்.

ஹிங்குல் தன் சகோதரன் இறப்பிற்கு பழிவாங்க நினைத்து பல வருடங்கள் தவம் செய்து மூவுலகத்திலும் உள்ள எந்த உயிர்களாலும் தனக்கு மரணம் நிகழக் கூடாதென்றும் சூரிய ஒளி புக இயலாத இடத்தில்தான் தன் உயிர் போக வேண்டுமென்றும் வரம் பெற்றான். pin அனைவரையும் கொடுமைப்படுத்தி பெண்களின் கற்பையும் சூறையாடினான். அதனால் ஹிங்கோலி மக்கள் பவானி மாதாவின் மீது பக்தி செலுத்தி, வழிபட்டு, அரசனின் தவறான எண்ணத்திலிருந்து தங்களைக் காக்க தேவியிடம் உதவி கோரிப் ப்ரார்த்தித்தனர்.

ஒரு நாள் தேவியானவள் அவனை காட்டிற்கு அழைத்து வந்து தோன்றி, மறைந்து, மீண்டும் தன் எட்டுக் கரங்களிலும் வாள், சூலம் போன்ற ஆயுதங்கள் ஏந்தி சிவந்த கோபமான கண்களுடன் இருள் சூழ்ந்திருந்த தோன்றிளாள்.

தனது இறுதி கணம் அறிந்து தேவியிடம் மன்னிப்பு வேண்டி பின் ஒரு, சிலை அமைத்து தன் பெயரிலே வழங்க வேண்டும் என்றும், யார் இவ்விடத்தில் தேவியை உண்மையான பக்தியுடன் வணங்குகிறார்களோ அவருக்கு மீண்டும் பிறவாத வரமருள வேண்டுமெனவும் , மனந்திருந்தி நல்லெண்ணத்துடன் இங்கு வருவோர் நல்லவரோ கெட்டவரோ நீ அவர்களுக்கு உதவ வேண்டும் என்று வேண்டினான்.அவனை அழித்த அன்னை அவ்விடத்திலேயே என்றும் நீங்காது அமர்ந்தாள்.

புராணம் – 3

கிராமம் ஒன்றில் மூன்று சகோதரர்கள் ஒவ்வொருவரும் ஒவ்வொரு வேலையைச் செய்து வந்தனர். ஒருவன் துணி தைப்பவன். ஒருவன் போர்வீரன். மற்றொருவன் பொற்கொல்லன் (சோனி ஸொனி) இருந்தனர். அவர்கள் ஒவ்வொரு நாளும் அன்னையை பூஜித்து அவளின் ஆசி பெற்று தம் வேலையைச் செய்து அவரவர் சம்பாதித்ததை வைத்துக் கொண்டு சந்தோஷமாக வாழ்ந்தனர்.

போர் வீரனால் மட்டும் அதிகம் சம்பாதிக்க முடியவில்லை. அதனால் அவன் மனமுடைந்து அன்றிரவு ஹிங்குலாஜ் மாதா கோவிலுக்குச் சென்று தன்னை ஏன் பிடிக்கவில்லை என்று தாயிடம் முறையிட்டு அழுது புலம்ப ‘யாருக்கு என் கையிலுள்ள குங்குமத்தை முதலில் வைக்கிறேனோ அவனே எனக்கு மிகவும் பிடித்தமான பக்தன்’ என்று சொன்னாள்.

மறுநாள் காலை அவர்கள் வீட்டு வாசலில் தேவி தோன்றினாள்.

துணி தைப்பவன் கைகால் அலம்பச் சென்றான். பொற்கொல்லன் பூப்பறிக்கச் சென்றான். தேவி போர்வீரனை நோக்கி வந்து குங்குமத்தை அவன் நெற்றியில் வைத்தாள். பின் பொற்கொல்லனுக்கும், துணி தைப்பவனுக்கும் குங்குமம் வைத்தாள்.

(இக் கோயில் பற்றி மேலும் விபரம் இருந்தால் தெரியப்படுத்தவும்)

சமூக ஊடகங்கள்

உறு பொருள்

என்னை முழுவதுமாய் அறிந்தாலும்

விளையாட்டாய் ஆரம்பிக்கின்றன வார்த்தைகள்

சொல் ஒன்றில் விஷம் ஒன்றை ஏற்றி

இதயத்தில் நுழைக்கிறாய்.

கடக்கும் காலமொன்று

கட்டளை இடப்பெற்று கட்டப்படுகிறது.

உனக்கான நாள் ஒன்றில்

மீன்களால் உண்ணப்பட்டு

காத்திருக்கும் எச்சங்களை

கைகளில் எடுத்துக் கொள்.

தேவைகள் அற்று கடலால் வீசி எறியப்பட்ட

பொருள்களில் எனக்கான நினைகளும் இருக்கலாம்.

இரண்டும் இணையும் தருணங்களில்

உனக்கான கண்ணீரில்

முழுமை அற்ற மரணத்தில் முழுமை அடைவேன்.

* புகைப்படம் : Karthik Pasupathy* உறு பொருள் – தியானிப்பவர்க்கு வந்து உறுவதாகிய பரம்பொருள். – திருமந்திரம் – 4ம் தந்திரம். 952

சமூக ஊடகங்கள்

சைவத் திருத்தலங்கள் 274 – திருகாளத்தி

•மூலவர், சுயம்பு – தீண்டாத் திருமேனி. கங்கைநீர் மட்டும் படுமாறு அமைப்பு

•மிகவும் உயரமான சிவலிங்கத் திருமேனி. அடிப்பாகம் – சிலந்தி வடிவம், மத்தியில் யானையின் இருதந்தங்கள், வலப்பக்கம் கண்ணப்பர் கண் அப்பிய வடு, மேற்புறம் ஐந்து தலை நாகம் போலவே காட்சி அமைப்பு. ஆவுடையார் பிற்காலத்தில் கட்டப்பட்டது. சுவாமி மீது கரம் தீண்டாமல் இருக்க இருபத்தேழு நட்சத்திரங்களும் பொறிக்கப்பட்ட தங்கக் கவசம். அகழி அமைப்புடைய கருவறை

•அம்பாள் – ஞானப்பூங்கோதை நின்ற திருக்கோலம்; திருவடியில் ஸ்ரீ ஆதிசங்கர பகவத் பாதரால் பிரதிஷ்டை செய்யப்பட்ட ‘அர்த்த மேரு ‘. அம்பாள் இருப்பு ஒட்டியாணத்தில் ‘கேது ‘ உருவம்.

•அகத்தியர் விநாயகரைப் பிரதிஷ்டை செய்து வழிபட்டு அருள் பெற்ற தலம் – பாதாள விநாயகர் சந்நிதி

•பஞ்சபூத தலங்களுள் – வாயுத் தலம் ஆதலால் மூலவர் எதிரில் கதவருகில் உள்ள இரு தீபங்கள் காற்றினால் மோதப்பெற்றதுபோல் எப்போதும் அசைந்து கொண்டு

•சுவர்ணமுகி எனப்படும் பொன்முகலி ஆறு வடக்கு முகமாகப் பாய்ந்து ஓடுவதால் உத்தரவாகினி

•நக்கீரர் இங்கு தங்கி பொன்முகலி நதியில் நீராடி இறைவனைத் தொழுது வெப்பு நோயிலிருந்து முழுமையாக நீக்கம் பெற்றத் தலம்

•ராகு, கேது க்ஷேத்ரம்

•வேடனான (திண்ணன்) கண்ணப்பருக்கு அருள் காட்சி கிடைத்தத் தலம்

•சிலந்தி – பாம்பு – யானை ஆகிய மூன்றும் வழிபட்டுப் பேறு பெற்ற சிறப்புடைய தலம்

•சண்டேசுவரர் சந்நிதி – மூலவர் பாணம் (முகலாயர் படையெடுப்பின்போது மூல விக்ரகங்களையும்,செல்வத்தையும் காப்பாற்றுவதன் பொருட்டு அமைக்கப்பட்டது)

•கோயில் அமைப்பு – அப்பிரதக்ஷண வலமுறை(வலமிருந்து இடம்)

•இரு கொடி மரங்கள் – ஒன்று கவசமிட்டது; மற்றொன்று ஒரே கல்லால் ஆன 60 அடி உயரமுள்ள கொடி மரம்

•சர்ப்ப தோஷம் நீங்கும் தலம்

•ஸ்படிகலிங்கம் – ஆதிசங்கரர் பிரதிஷ்டை செய்தது

•‘இரண்டு கால் மண்டபம் ‘ – 2 கால்களை நிறுத்தி சுவரோடு சேர்த்துக் கட்டப்பட்ட சிறிய மண்டபம் சுவரோரமாக

•சொக்கப்பனை கொளுத்தி, எரிந்தவற்றை அரைத்து (ரக்ஷை) சுவாமிக்கு கறுப்புப் பொட்டாக இடும் வழக்கம்

•பிரதான கோபுரம் ‘தக்ஷிண கோபுரம்’

•சம்பந்தர், இங்கிருந்தவாறே கயிலாயம், கேதாரம், கோகர்ணம், திருப்பருப்பதம், இந்திரநீலப்பருப்பதம் முதலிய தலங்களைப் பாடித் தொழுதார்.

•அப்பர் காளத்தி வந்து தொழுதபோது வடகயிலை நினைவு வர, கயிலைக் கோலம் காண எண்ணி, யாத்திரையைத் தொடங்கினார்.

•சுந்தரர் இறைவனைப் பாடி, இங்கிருந்தவாறே திருப்பருப்பதம், திருக்கேதாரம் முதலிய தலங்களைப் பாடிப் போற்றினார்.

•நதி-நிதி-பர்வதம். நதி என்பது சந்திரகிரிமலையில் தோன்றிப் பாய்ந்து வருகின்ற சுவர்ணமுகி-பொன்முகலி ஆறு, நிதி – அழியாச் செல்வமான இறைவி, இறைவன், பர்வதம் – கைலாசகிரி.

•நம் ஆறு ஆதாரங்களில் விசுத்தி(இதயம்) − திருகாளத்தி என்று பரஞ்சோதி முனிவரால் குறிப்பிடப்படும் இடம்

தலம்	சீகாளாத்தி, திருகாளாத்தி, காளஹஸ்தி
பிற பெயர்கள்	தட்சிண (தென்) கயிலாயம், கைலாசகிரி, கண்ணப்பர் மலை, அகண்டவில்வாரண்யம், பாஸ்கரக்ஷேத்திரம்
இறைவன்	ஸ்ரீ காளஹஸ்தீஸ்வர சுவாமி, காளத்திநாதர், குடுமித்தேவர்
இறைவி	ஞானப்பிரசுன்னாம்பிகை, ஞானப் பூங்கோதை
தல விருட்சம்	மகிழம்
தீர்த்தம்	ஸ்வர்ணமுகி, பொன்முகலியாறு.
விழாக்கள்
மாவட்டம்	சித்தூர்
திறந்திருக்கும் நேரம் / முகவரி	காலை 6 மணி முதல் 8.00 மணி வரை, அருள்மிகு காளஹஸ்தீஸ்வரர் திருக்கோயில் காளஹஸ்தி – அஞ்சல் – 517 644 சித்தூர் மாவட்டம் – ஆந்திர மாநிலம்.
வழிபட்டவர்கள்	பாம்பு, யானை, சிவகோசரியார், கண்ணப்பர் ,கிருஷ்ணதேவராயர், சிலந்தி, அவருடைய மனைவி, சீதை, லட்சுமணன், ஆஞ்சநேயர், சப்தரிஷிகள், சித்திரகுப்தர், யமன், தருமர், அர்ஜுனன், வியாசர்,முசுகுந்தன், பரத்வாஜ மகரிஷி,
பாடியவர்கள்	வீரைநகர் ஆனந்தக் கூத்தர் – திருக்காளத்திப் புராணம்; கருணைப் பிரகாசர், ஞானப் பிரகாசர், வேலப்ப தேசிகர் ஆகிய மூவரும் சேர்ந்து பாடிய தலபுராணம், திருஞான சம்மந்தர் – 2 பதிகங்கள், திருநாவுக்கரசர் – 1 பதிகம், சுந்தரர் – 1 பதிகம்
நிர்வாகம்
இருப்பிடம்	ஆந்திரா மாநிலத்தில் சித்தூர் மாவட்டம். ரேணிகுண்டா – கூடூர் இரயில் மார்க்கத்தில் உள்ள இருப்புப்பாதை நிலையம். திருப்பதியிலிருந்து 40 கி. மீ. தொலைவு
இதர குறிப்புகள்	தேவாரத் தலங்களில் 251 வது தலம் தொண்டை நாட்டுத் தலங்களில் இது 19 வது தலம்.

ஞானப் பூங்கோதை உடனாகிய ஸ்ரீ காளஹஸ்தீஸ்வர சுவாமி

புகைப்படம் : தினமலர்

பாடியவர் திருநாவுக்கரசர்

திருமுறை 6

பதிக எண் 08

திருமுறை எண் 7

பாடல்

கரியுருவு கண்டத்தெங் கண்ணு ளான்காண்

கண்டன்காண் வண்டுண்ட கொன்றை யான்காண்

எரிபவள வண்ணன்காண் ஏகம் பன்காண்

எண்டிசையுந் தானாய குணத்தி னான்காண்

திரிபுரங்கள் தீயிட்ட தீயா டிகாண்

தீவினைகள் தீர்த்திடுமென் சிந்தை யான்காண்

கரியுரிவை போர்த்துகந்த காபா லிகாண்

காளத்தி யானவனென் கண்ணு ளானே.

பொருள்

கரிய நிறமுடைய கண்டத்தை உடையவனாகவும், எனது விழிகளுக்குள் இருப்பவனாகவும், (அடியவர்களுக்காக அவர்களின் அன்புக்கு கட்டுப்பட்டு) வரையறைப்பட்டவனாக இருப்பவனாகவும், வண்டுகள் நுகரும் கொன்றைப் பூக்களை சூடியவனாக இருப்பவனாகவும், ஒளி வீச்சுடைய பவள வண்ணனாக இருப்பவனாகவும், ஏகம்பனாக இருப்பவனாகவும், எட்டு திசைகளையும் தன் குணமாக கொண்டவனாக இருப்பவனாகவும், முப்புரங்களையும் தீயினால் எரித்து அவ்வண்ணம் எரித்த பின்னரும் அதில் கூத்து நிகழ்த்துபவனாக இருப்பவனாகவும், எனது தீவினைகளை அழித்து என் சிந்தனையின் இருப்பவனாகவும், யானையின் தோல் உரித்து அதை தனது ஆடையாக அணிந்தவனாக இருப்பவனாகவும், காபால கூத்து ஆடுபவனாக இருப்பவனாகவும் இருக்கும் காளத்தியான் என் கண் உள்ளான்.

கருத்து

· கரி உருவு-கரிபோன்ற நிறம்; கரிந்த உருவம்

· ‘எம் கண் உளான்’ – எம்மைப் போன்ற அடியவர் கண்ணில் உள்ளான்

· கண்டன்-வரையறைப்பட்டவன்

· எரி பவளவண்ணன்-நெருப்பும் பவழமும் போன்ற நிறமுடையவன்

· ‘குணம்’ – முற்றும் உணர்தல். இயக்குதலும் தானே எனப் பொருள் பெறப்படும்.

· தீர்த்திடும்’ – எச்சம், தீர்த்திடுவான்

பாடியவர் சுந்தரர்

திருமுறை 7

பதிக எண் 26

திருமுறை எண் 8

பாடல்

நீறார் மேனியனே நிமலாநினை யன்றிமற்றுக்

கூறேன் நாவதனாற் கொழுந்தேயென் குணக்கடலே

பாறார் வெண்டலையிற் பலிகொண்டுழல் காளத்தியாய்

ஏறே யுன்னையல்லால் இனிஏத்த மாட்டேனே.

பொருள்

திருநீறு அணிந்த திருமேனியை உடையவனே, தூயவனே, மிகவும் உயர்ந்தவனே, முதன்மையானவனே, தசை நீங்கிஎலும்பு மாத்திரமாகிய தலை பிச்சை பாத்திரமாக ஏற்று திரிபவனே,எட்டு வகையான குணங்கள் கொண்டவனே அடியேன் உன்னை யறிந்தபின் உன்னையன்றிப் பிறர் ஒருவரைப் போற்றுதலே இலன் ; என் நாவால் ஒன்று செய்வதாயின் , உன்னையன்றி மற்றொரு பொருளைச் சொல்லுதல்தானும் இலேன் ; ஆகவே நீ எனக்கு அருள் செய்தல் வேண்டும்

கருத்து

கொழுந்து – உச்சிக்கண் நிற்பதாகலின் உயர்ந்த பொருளை – கொழுந்து உவமம்

என் குணக் கடலே – எட்டு வகையான குணங்களுக்கு உரியவன், சிவன்

Reference

· ‘அட்டமாசித்திகள் அணைதரு காளத்தி ‘ எனச் சிறப்பிக்கப்படும் அற்புதத் தலம்.

· ‘கயிலை பாதி காளத்தி பாதி ‘ என்று நக்கீரரால் பாடப்பட்டபெருமை உடைய தலம்.

இக் கோயில் பற்றி மேலும் விபரம் இருந்தால் தெரியப்படுத்தவும்.

சமூக ஊடகங்கள்

கூடு அடைதல்

தனித்து பறக்கும் பறவை ஒன்று

கானகத்தின் இருளில்

தன் குரலில் ஒலினை மீட்டு எழுப்பி

தன்னை விட்டுச் சென்றது.

புகைப்படம் : Gayu Venkat

சமூக ஊடகங்கள்

மகார ப்ரியை – சக்தி பீடங்கள் – 51- முன்னுரை

எங்கும் உளபொருளாய், ஓங்கார வடிவமாய், குலத் தெய்வமாக இருக்கும் கணபதியை வணங்குகிறேன்.

‘விழிக்குத் துணை முருகா எனும் நாமங்கள்‘ என்பதாய், சிவனின் மைந்தனுமாய், சிவனுக்கு உபதேசம் ஈந்தவனுமாகிய குமரவேலின் திருத் தாளினை பணிகிறேன்.

சகல உயிர்களிலும், சகல காலங்களிலும் சதா சர்வ காலமும் உறைந்திருக்கும் ஈசனும், எண்ணமும் சொல்லும் மாறாது என்றும் ஈசனிடம் உறைந்திருக்கும் என் தாயும், அகில நாயகியுமான கருணை நாயகியின் திருவடியினைப் பற்றுகிறேன்.

என் தாழ் நிலை அறிந்தும், வினாடிக்கும் குறைவான நேரமும் அகலாது என்னை சேய் போல் காத்து, என்னின் அனைத்து நிகழ்வுகளையும் அறிந்து, எக்காலத்திலும் நிறை பொருளாக என்னுள் இருந்து என்னை இயக்கும் எனது குருநாதரின் திருத்தாள் திருவடிகளைப் பணிகிறேன்.

‘சக்தி உரை செய் சக்தி எமக்கில்லை’ என்பதால் இது குறித்து பலநாட்களாக எழுதாமல் இருந்தேன். ‘உயிர் உறை குருநாதன்’ உத்திரவின் படியே இத் தொடரை துவங்குகிறேன்.

மிகப் பெரிய சக்தியை தன்னுள் இருக்கும் இறை சக்தி மகாரமாக இருக்கிறது. பிரணவ எழுத்துக்களில் மகாரம் முடிவு என்று கொண்டாலும், முழு மந்திர சக்தியினை வெளிப்படுத்தும் எழுத்தாகவே மகாரம் இருக்கிறது.

ஓம் மகார ரூபாய நம என்பதும் மகாரப் ப்ரியை என்பதும் ஒரு பொருளில் வருகிறது. திருமந்திரத்திலும் மகார எழுத்தின் தன்மையும் விளக்கங்களும் மிக நீண்டதாகவே காணப்படுகிறது.

அகரம், உகரம், மகரம், விந்து, நாதம் என்னும் ஐந்துங் கூடிப் பிரணவமாகும்; இவை சூக்கும பஞ்சாக்கரம் எனவும் பெறும்;

“அகார வுகார மகங்காரம் புத்தி

மகார மனஞ்சித்தம் விந்துப் – பகாதிவற்றை

நாம முளவடிவா நாடிற் பிரணவமாம்

போதங் கடற்றிரையே போன்று” – சிவஞானபோத வெண்பா

இவ்வாறு பிரணவப் பொருளின் நாயகமாக இருப்பது மகாரமே.

மகாரத்தின் போது(அதாவது மகார உச்சரிப்பில் ம்– பீஜம் ) கும்பகம்எளிதில் கைவரப் பெறும்.இதில் பூரண கும்பகமும், கேவல கும்பகமும் எளிதில் கைகூடும்.

தந்தையால் அவமானப்படுத்தப்பட்ட தாட்சாயிணி யாகம் அழியுமாறு சாபம் விடுத்தாள். சிவனால் படைக்கப்பட்ட வீரபத்திரர் அந்த யாகத்தை அழித்தார்.. இது தந்தை தந்த உடல் என்று நினைந்து தீயினில் தனது உடலை எரித்தாள். தாட்சாயிணியின் மரணத்திற்குப் பிறகு சிவன் இறந்த உடலை எடுத்துக் கொண்டு ஊர்த்துவ தாண்டவம் ஆடினார். அது நிலைபெறாமல் நிகழ்ந்து கொண்டிருந்தது. அதை நிறுத்துவதன் பொருட்டு திருமால் தனது சக்ராயுதத்தால் தாட்சாயணியின் இறந்த உடலை 51 துண்டுகளாக வெட்டினார். இவ்வாறு உடல் விழுந்த பகுதிகள் சக்தி பீடங்களாயின.

இவற்றில் ஐம்பத்தியொரு சக்தி பீடங்கள் அட்சர சக்தி பீடங்கள் என்று கூறப்படுகின்றன. ஐம்பத்தியொரு அட்சரங்கள் பற்றி எல்லா சித்தர்களும் குறிப்பிட்டிருக்கிறார்கள்.

அவளை அறியா அமரரும் இல்லை

அவளன்றிச் செய்யும் அருந்தவம் இல்லை

அவளன்றி ஐவரால் ஆவதொன்று இல்லை

அவளன்றி ஊர்புகும் ஆறறி யேனே.

எனும் திருமந்திரம் பாடலுக்கு ஏற்ப அவளை வணங்காத சித்தர்கள் இல்லை.

இந்த பீட நிர்ணயமும் அதற்கான தோத்திர முறைகளையும் பற்றி சிவபெருமான் தேவியிடம் கேட்க, தேவியே தனக்குரிய சக்தி பீடங்கள் பற்றிக் கூறுவதாக அமைந்துள்ளது.

இக்காரணங்கள் பற்றியே மகார ப்ரியை – சக்தி பீடங்கள் எனும் இக்கட்டுரைகள்.

சமூக ஊடகங்கள்

சைவத் திருத்தலங்கள் 274 – திருஊறல்

தல வரலாறு(சுருக்கம்)/ சிறப்புகள் – திருஊறல்

•இறைவன் – சுயம்பு மூர்த்தி

•நந்தியின் வாயிலிருந்து ஒரு காலத்தில் நீர் விழுந்து கொண்டிருந்ததாலும், இறைவன் திருவடியில் நீர் சுரப்பதாலும் இவ்வூருக்கு திருஊறல்

•தக்கன் நடத்திய யாகத்தை அழித்து அவன் தலையை வீரபத்திரர் தலையைக் கொய்த தலம்

•தக்கன் தனக்கு அழிவு வரும் நிலையைக் கண்டு “ஓ” என்று ஓலமிட்டதால் தக்கோலம்

•பிரகஸ்பதியின் தம்பி உத்தி முனிவரின் மகன் தீர்க்கதா. அவர் யாகம் நடத்தும் சமயம் அங்கு வந்த காமதேனு பசுவினை அங்கு தங்க கூறுதல். காமதேனு மறுத்தல், அதனால் காமதேனுவினை கட்ட முயல சாபம் பெறுதல். நாரதரின் அறிவுரைப்படி ஈசனை பூஜித்து சாப விமோசனம் பெறுதல். உததி முனிவர் வழிபட்டு வேண்டிக்கொண்டதால் நந்தியெம்பெருமான் தன்வாய் வழியாக கங்கையை வரவித்த சிறப்புடையது இத்தலம்

•நர்த்தன நிலையில்(உக்கடி ஆசனத்தில்) தட்சிணா மூர்த்தி

•நிறம் மாறும் லிங்கம்(உத்ராயணம் – சிகப்பு நிறம், தட்சிணாயனம் – வெண்மை நிறம்)

தலம்	திருஊறல்
பிற பெயர்கள்	தக்கோலம்
இறைவன்	ஜலநாதேஸ்வரர், ஜலநாதீஸ்வரர் உமாபதீசர்
இறைவி	கிரிராஜ கன்னிகாம்பாள்(மோகன வல்லியம்மை)
தல விருட்சம்
தீர்த்தம்	பார்வதி சத்ய கங்கை தீர்த்தம், குசத்தலை நதி
விழாக்கள்	வைகாசி விசாகம், ஆனிதிருமஞ்சனம், ஆடிப்பூரம், மார்கழி திருவாதிரை, மாசிமகம், தைப்பூசம், திருக்கார்த்திகை.
மாவட்டம்	வேலூர்
திறந்திருக்கும் நேரம் / முகவரி	காலை 8.00 மணி முதல் 12 மணி வரை மாலை 4.30 மணி முதல் இரவு 8.00 மணி வரை அருள்மிகு ஜலநாதேஸ்வரர் திருக்கோவில் தக்கோலம் அஞ்சல் அரக்கோணம் வட்டம் வேலூர் மாவட்டம் PIN – 631151.
வழிபட்டவர்கள்	சம்வர்த்த முனிவர், காமதேனு, இந்திரன், சந்திரன், எமன், திருமால், பாண்டவர்கள், சப்த கன்னியர், உததி முனிவர், தீர்க்கத முனிவர்
பாடியவர்கள்	திருஞானசம்பந்தர் – 1 பதிகம், அருணகிரிநாதர்
நிர்வாகம்
இருப்பிடம்	அரக்கோணம் காஞ்சிபுரம் செல்லும் வழியில் தக்கோலம் கூட்ரோட்டில் இருந்து 4 கி.மி
இதர குறிப்புகள்	தேவாரத் தலங்களில் 244 வது தலம் தொண்டை நாட்டுத் தலங்களில் இது 12 வது தலம்.

ஜலநாதீஸ்வரர்

கிரிராஜ கன்னிகாம்பாள்

புகைப்படம் : தினமலர்

பாடியவர் திருஞானசம்பந்தர்

திருமுறை 1

பதிக எண் 106

திருமுறை எண் 7

பாடல்

கறுத்த மனத்தினொடுங் கடுங்காலன்வந்தெய்துதலுங் கலங்கி

மறுக்குறு மாணிக்கருள மகிழ்ந்தா னிடம்வினவில்

செறுத்தெழு வாளரக்கன் சிரந்தோளு மெய்யுந்நெரிய வன்று

ஒறுத்தருள் செய்தபிரான் றிருவூறலை யுள்குதுமே.

பொருள்

(கோபம் கொண்டதால்) கறுத்த மனம் உடையவனாகிய காலன் தன் உயிரை பறிப்பதற்காக வரும் போது அது கண்டு கலங்கிய மார்கண்டேயனுக்கு அருளியவனும், கோபத்தினால் சினம் கொண்டு வந்த வாள் வித்தையில் வல்லவனாகிய இராவணனின் தலை, தோள், உடல் ஆகியவற்றை நெரித்து அவனுக்கு அருள் செய்தவனுமாகிய சிவபெருமான் விரும்பி உறையும் இடம் திரு ஊறல் ஆகும். அதனை நாம் நினைவோமாக.

கருத்து

சினம் கொண்ட இருவருக்கு அவர்களின் சினம் அடக்கி அவர்களை ஆட்கொண்டு அருளிய திறம் இங்கு சிறப்பாக விளக்கப்படுகிறது.

பாடியவர் திருஞானசம்பந்தர்

திருமுறை 1

பதிக எண் 106

திருமுறை எண் 8

பாடல்

நீரின் மிசைத்துயின்றோன் நிறைநான் முகனும்மறியா தன்று

தேரும் வகைநிமிர்ந்தான் அவன்சேரும் இடம்வினவில்

பாரின் மிசையடியார் பலர்வந் திறைஞ்சமகிழ்ந் தாகம்

ஊரும் அரவசைத்தான் திருவூறலை உள்குதுமே.

பொருள்

கடல் மீது துயில் கொள்ளும் திருமாலும், ஞானத்தினால் நிறைவுபெற்ற நான்முகனும் தேடி அறிய முடியாதவாறு நிமிர்ந்து நின்றவனும், இப்பரந்து பட்ட நில உலகில் அடியவர்கள் மகிழ்ந்து வணங்க தக்கதாகவும் பாம்பினை இடையில் கட்டியவனும் ஆகிய சிவபிரான் உறையும் இடம் திரு ஊறல் ஆகும். அதனை நாம் நினைவில் கொள்வோமாக.

கருத்து

· நிறைநான் முகனும் – ஞானத்தால் நிறைவு பெற்றவன். முற்றிலும் உணர்ந்தவன்.

· அரவம் – பாம்பு. கொடிய விலங்குகளும் அவனிடத்தில் அதன் தன்மைகளை இழந்து விடும். மற்றொரு பொருள் யோக மார்க்கத்தில் இருப்பவன்.

· உள்குதல் – உள் முகமாக நினைத்தல்

இக் கோயில் பற்றி மேலும் விபரம் இருந்தால் தெரியப்படுத்தவும்.

சமூக ஊடகங்கள்

சளம்

கடந்த காலங்களின்

கடைசி கட்டங்களில்

உயிர் ஒன்று துடித்துக் கொண்டிருந்தது.

தேகம் மாற்றம் கொள்ள ஆரம்பித்தது.

வசந்தங்களின் சாயல் அற்று

வயதானவள் ஒருவள் வருகிறாள்.

‘யார் நீ‘ என வினவுகிறான்.

‘உன்னின்சொல் அம்புகள் வாங்கியவள்

திருப்பித் தர வந்திருக்கிறேன்‘ என்கிறாள்.

‘இத்தருணத்திலா‘ என்கிறான் அவன்‘

‘இதுவே தருணம் என்கிறாள்‘ அவள்.

‘யாரும் அறியா சொற்களை வீசி எறிகிறாள்‘

அவன் கண்கள் பனிக்க துவங்கின.

மீண்டும் தேகம் மாற்றம் கொள்ள ஆரம்பித்தது.

மீண்டு வந்த உயிர் ஒன்று

தன் சொற்களை திருப்பி தர யத்தனிக்கிறது.

வினாடிக்கும் குறைவான நேரத்தில்

விரைவாக பல மாற்றம் அவ்வுயிரில்.

வரிசை குறையாமல் வருகிறது பெருங் கூட்டமொன்று.

‘விலகிச்செல்லுங்கள்‘ என்று கட்டளை இட்டு

தன் மடியினில் இருத்திக் கொள்கிறது மூத்த உயிரொன்று.

துடித்த உயிரின் கைகள் கூப்புகின்றன.

காசி பயணத்தின் மந்திரங்கள் உயிரின் காதுகளில்.

யாவற்றையும் கவனியாது

வெய்யில் பார்த்து உறங்கிகொண்டிருந்தது

கருமை நிற நாயொன்று.

சளம் – துன்பம், சளத்தில் பிணிபட்டு – கந்தர் அலங்காரம் பாடல் – 7
புகைப்படம் : Vinod V

சமூக ஊடகங்கள்

சைவத் திருத்தலங்கள் 274 – திருமாற்பேறு

தல வரலாறு(சுருக்கம்)/ சிறப்புகள் – திருமாற்பேறு

•மூலவர் – தீண்டாத் திருமேனி(பார்வதியால் விருதசீர நதிக்கரையில் அமைக்கப்பட்டது)

•ததிசி முனிவரை கொல்ல திருமால் ஏவிய சக்ராயுதம், முனிவரின் தெய்வீக தன்மையால் செயலிழத்தல், அதன் பொருட்டு சக்ராயுதம் பெற ஆயிரம் இதழ் தாமரைகளால் பூசை செய்தல், இறைவன் அருளால் ஒரு தாமரை மறைதல், திருமால் தனது கண்களை தாமரையாக மாற்றி பூசித்தல். அக்காரணம் பற்றி திருமால் பார்வையும் சக்ராயுதமும் பெறுதல்.

•திருமாலின் உற்சவத் திருமேனி – ஒரு கையில் தாமரை மலர், மறு கையில் ‘கண்’, நின்ற திருக் கோலம்

•வல்லபை விநாயகர் – பத்துக் கரங்களுடன் காட்சி

•நந்தி எம்மான் நின்ற திருக்கோலம்

•முன் காலத்தில் கடவுளர்களுக்கு மாலைகள் – வெள் எருக்கு மலர்கள் (கோயிலுக்கு அருகில் உள்ளது)

தலம்	திருமாற்பேறு
பிற பெயர்கள்	ஹரிசக்கரபும், திருமால்பூர், மாற்பேறு
இறைவன்	மணிகண்டீஸ்வரர், தயாநிதீஸ்வரர், பிரவாளேஸ்வரர், சாதரூபர், பவளமலையார், வாட்டந்தவிர்த்தார், மால்வணங்கீசர்.
இறைவி	அஞ்சனாட்சி, கருணாம்பிகை
தல விருட்சம்	வில்வம்
தீர்த்தம்	சக்கர தீர்த்தம்
விழாக்கள்	மாசிமாதம் நடக்கும் 10 நாள் பிரமோற்ஸவத்தில் மகம் நட்சத்திரத்தன்று தீர்த்தவாரி (பெருமாளுக்குரிய கருட சேவை),ஆடி வெள்ளி, ஆடிப்பூரம், ஆனித்திருமஞ்சனம், திருக்கார்த்திகை, மார்கழி திருவாதிரை
மாவட்டம்	வேலூர்
திறந்திருக்கும் நேரம் / முகவரி	காலை 6.00 மணி முதல் 12.00 மணி வரை, மாலை 4.00 மணி முதல் இரவு 9.00 மணி வரை, அருள்மிகு மணிகண்டேஸ்வரர் திருக்கோயில் திருமால்பூர் -அஞ்சல் – 631 053 அரக்கோணம் வட்டம் வேலூர் மாவட்டம். 04177 – 248220, 09345449339
வழிபட்டவர்கள்	திருமால், சந்திரன்
பாடியவர்கள்	திருஞானசம்பந்தர் 2 பதிகங்கள், ,திருநாவுக்கரசர் 4 பதிகங்கள். சுந்தர மூர்த்தி நாயனார் இத்தலத்திற்கு எழுந்தருளி உள்ள குறிப்பு பெரிய புராணத்தில் இருக்கிறது. ஆனால் பதிகங்கள் கிடைக்கவில்லை
நிர்வாகம்
இருப்பிடம்	அரக்கோணம் – காஞ்சிபுரம் இருப்புப் பாதையில் இத்தலம் அமைவிடம்
இதர குறிப்புகள்	தேவாரத் தலங்களில் 243 வது தலம் தொண்டை நாட்டுத் தலங்களில் இது 11 வது தலம்.

மணிகண்டீஸ்வரர்

அஞ்சனாட்சி

புகைப்படம் : தினமலர்

பாடியவர் திருஞானசம்பந்தர்

திருமுறை 1

பதிக எண் 55

திருமுறை எண் 8

பாடல்

அரச ளிக்கும் அரக்கன் அவன்றனை

உரைகெ டுத்தவன் ஒல்கிட

வரமி குத்தவெம் மாற்பேற் றடிகளைப்

பரவி டக்கெடும் பாவமே.

பொருள்

இலங்கையினை ஆளும் இராவணனின் புகழ் கெடுமாறு செய்து, அவன் தனது பிழையினை உணர்ந்தபின் அவன் விரும்பி வேண்டிய வரங்களை அளித்த எமது திருமாற்பேறு பெருமானின் திருவடிகளை வணங்க பாவங்கள் கெடும்.

கருத்து

பாடியவர் திருநாவுக்கரசர்

திருமுறை 5

பதிக எண் 59

திருமுறை எண் 10

பாடல்

நாடி நாரணன் நான்முக னென்றிவர்

தேடி யுந்திரிந் துங்காண வல்லரோ

மாட மாளிகை சூழ்தில்லை யம்பலத்

தாடி பாதமென் நெஞ்சு ளிருக்கவே.

பொருள்

எம் பெருமான் ஈசனை திருமாலும், பிரம்மனும் முறையே திருவடியினையும், வானில் பறந்தும் காண இயலாதவர்களாக ஆயினர். மாட மாளிகைகள் சூழ்ந்த தில்லை அம்பலத்தாடுவான் திருவடிகள் அன்பால் நெஞ்சினில் நிறைந்திருக்கும்.

கருத்து

இறைவனை அகத்தே காணவேண்டும் என்பதை இது காட்டுகிறது.

Reference

காஞ்சிப் புராணம்

பதிகங்கள்:

ஊறியார்தரு -1 -55 திருஞானசம்பந்தர்

குருந்தவன் -1 -114 திருஞானசம்பந்தர்

மாணிக்குயிர் -4 -108 திருநாவுக்கரசர்

பொருமாற் -5 -59 திருநாவுக்கரசர்

பாரானைப் -6 -80 திருநாவுக்கரசர்

(இக் கோயில் பற்றி மேலும் விபரம் தெரிந்தால் தெரியப்படுத்தவும்)

சமூக ஊடகங்கள்

சைவத் திருத்தலங்கள் 274 – திருவல்லம்

· மூலவர் – சுயம்புத் திருமேனி,; சதுரபீட ஆவுடையார்.

· மூலவர் கருவறை அகழி அமைப்புடையது; கருவறைச் சுவர்கள் நிறைந்த கல்வெட்டுக்கள்

· இறைவன், தீர்த்தத்தின் பொருட்டு, ‘நீ, வா’ என்றழைக்க, இந்நதி அருகில் ஓடிவந்து பாய்ந்ததால் நதியின் பெயர் ‘நீ வா ‘ நதி. தற்போதைய பெயர் ‘பொன்னை’ ஆறு

· பாம்புப் புற்றுக்குப் பசு நாள்தோறும் பாலைச் சொரிந்து வழிபட புற்று கரைந்து சிவலிங்கம் தோன்றியது என்றும் ஒரு நம்பிக்கை

· மூலஸ்தான விமானத்தில் 27 நட்சத்திரங்களுக்கும் தனித்தனியே திருவுருவங்கள்

· இறைவனுக்கு கஞ்சன் மலையில் இருந்து அபிஷேக நீர் கொண்டு வரும் அர்ச்சகரை தொல்லை செய்ததற்காக கஞ்சனை நந்தி எப்பெருமான் பாகங்களாக கிழித்தல்

· அதன் பொருட்டு அவன் மீண்டும் வராமல் இருக்க வாசல் நோக்கிய நந்தி

· உக்கிர வடிவிலிருந்த இந்த அம்பாளை ( ‘தீக்காலி அம்பாள்’ (ஜடாகலாபாம்பாள்)), சாந்தப்படுத்தியது ஆதி சங்கரர்.

· விநாயகர் சிவபெருமானைச் சுற்றிவந்து அற்புத மாங்கனியை இத்தலத்தில் பெற்ற சிறப்புடையது இத்தலம். தல வினாயகர் ‘கனி வாங்கிய வினாயகர்’ கையில் மாங்கனியுடன்

· இறைவனருளால் காஞ்சனகிரியில்(கஞ்சன் மலை) அசுரனின் குருதி பட்ட இடத்திலெல்லாம் அவ்விடத்தைப் புனிதப்படுத்த சிவலிங்கங்கள் உண்டாயின

· வலது துவாரபாலகர் அழகிய புன்னகையுடன் கூடிய திருமுகம்

· இங்குள்ள பெருமானை விஷ்ணு வழிபட்டதால், விஷ்ணுவின் பாதம் பத்மபீடத்தில் கொடிமரத்தின் முன்பு

· சனகாதி முனிவர்களில் ஒருவரான சனகரின் ஜீவ சமாதி அமைந்துள்ள இடம்

· ஒளவையார் நெல்லிக்கனியைப் பெற்ற தலம்

· சிவானந்த மௌனசுவாமிகள் தலம்

தலம்	திருவல்லம்
பிற பெயர்கள்	திருவலம், வில்வவனம்,வில்வாரண்யம், தீக்காலி வல்லம்
இறைவன்	வில்வநாதீஸ்வரர், வல்லநாதர்.
இறைவி	தனுமத்யாம்பாள், வல்லாம்பிகை.
தல விருட்சம்	வில்வம்
தீர்த்தம்	நீவாநதி, கௌரி தீர்த்தம்
விழாக்கள்	பிரம்மோற்சவம்
மாவட்டம்	வேலூர்
திறந்திருக்கும் நேரம் / முகவரி	காலை 6 மணி முதல் 12 மணி வரை மாலை 4 மணி முதல் இரவு 8 மணி வரை அருள்மிகு வில்வ நாதேஸ்வரர் திருக்கோவில் திருவலம் அஞ்சல் வழி இராணிப்பேட்டை காட்பாடி வட்டம் வேலூர் மாவட்டம் PIN – 632515 சிவாச்சாரியார் உமாபதி – 9894922166, 0416 – 2236088, சிவன் 9245446956
வழிபட்டவர்கள்	கௌரி, மஹாவிஷ்ணு, சனகமுனிவர்
பாடியவர்கள்	திருஞானசம்பந்தர், திருநாவுக்கரசர், அருணகிரிநாதர்
நிர்வாகம்
இருப்பிடம்	சென்னை – காட்பாடி ரயில் பாதையில் உள்ள திருவல்லம் ரயில் நிலையத்தில் இருந்து 2 கி.மி. ஆற்காட்டிலிருந்து ராணிப்பேட்டை வழியாக காட்பாடி செல்லும் சாலையில் இத்தலம் உள்ளது.
இதர குறிப்புகள்	தேவாரத் தலங்களில் 242 வது தலம் தொண்டை நாட்டுத் தலங்களில் இது 10 வது தலம்.

வில்வநாதீஸ்வரர்

வல்லாம்பிகை

புகைப்படம் : தினமலர்

பாடியவர் திருஞானசம்பந்தர்

திருமுறை 1

பதிக எண் 113

திருமுறை எண் 8

பாடல்

இகழ்ந்தரு வரையினை எடுக்கலுற்றாங்

ககழ்ந்தவல் லரக்கனை அடர்த்தபாதம்

நிகழ்ந்தவர் நேடுவார் நேடச்செய்தே

திகழ்ந்தவன் உறைவிடந் திருவல்லமே.

பொருள்

கையிலை மலையை இகழ்ந்து பேசி அதை எடுத்து அப்புறப்படுத்தலின் பொருட்டு முயன்ற இராவணனை அடக்கிய திருவடியை உடையவனும், திருவடியை உண்மை பொருளாக உடைய அன்பர்கள் தேடி வருந்தும் அவர்கள் உள்ளத்தில் திகழ்பவனும் ஆகிய சிவபெருமான் உறையும் தலம் திருவல்லமாகும்.

கருத்து

அடந்த திருவடி – மிகப்பெரிய திருவடி

பாடியவர் திருஞானசம்பந்தர்

திருமுறை 1

பதிக எண் 113

திருமுறை எண் 9

பாடல்

பெரியவன் சிறியவர் சிந்தைசெய்ய

அரியவ னருமறை யங்கமானான்

கரியவ னான்முகன் காணவொண்ணாத்

தெரியவன் வளநகர் திருவல்லமே.

பொருள்

பெரியவனும்(எல்லாவற்றிலும், எல்லாரிலும்), அறிவில் சிறந்தவர்களால் சிந்தித்து அறிய இயலாதவனும், அரிய வேதங்கள் மற்றும் அதன் அங்கங்களும் ஆனவனும், கரிய நிறமுடைய திருமால் மற்றும் பிரம்மா ஆகியவர்களால் காணப்படா முடியாதவனும், அன்பில் சிறந்தவர்களால் காணக்கூடியவனும் ஆகிய சிவன் உறையும் நகர் திருவல்லமாகும்

கருத்து

தெரியவன் – தெரியநிற்பவன். பக்குவப்பட்ட ஆன்மாக்களுக்கு தெரிபவன்.

இக் கோயில் பற்றி மேலும் விபரம் இருந்தால் தெரியப்படுத்தவும்.

சமூக ஊடகங்கள்

2016 – பொங்கல் – பயணவழிக் குறிப்புகள் – அகம் புறம்

சென்னையில் இருந்து சிதம்பரம் வரை நின்று கொண்டே பயணம்

அகம்

· நின்று கொண்டே வந்ததில் 10 வயது சிறுவர்களும் அடக்கம்.

· பெரும்பாலானவர்வகள் மொபைலில் whatsapp பார்த்துக் கொண்டே வந்தார்கள்.

· சிலர் Tab ல் சிவாஜி படப்பாடல், சண்டி வீரன் படப்பாடல் எனப்பார்த்துக் கொண்டே வந்தார்கள். இன்னும் சிலர் எட்டிப்பார்த்து அந்த பாடல்களைப் பார்த்துக் கொண்டே வந்தார்கள்.

· சிலர் bubbles விளையாடிக் கொண்டிருந்தார்கள்.

· ‘பய புள்ளங்க என்னமா பேர் வைக்குதுங்கடா, Darling, Chellam’ என்று சிறு மாணவர்கள் குழு பேசிக் கொண்டு வந்தது.

· அடுத்த இருக்கையில் இருப்பவர்களுக்கு தனது சிறு பிஸ்கட் போன்றவற்றை கூட தராமல் மற்றவர்களை பற்றி நினைக்கக் கூட மனமில்லாமல் தானே உண்டார்கள்.

· பேருந்தில் இருக்கும் எல்லா பைகளையும் விடுத்து ஒரே ஒருவரிடம் இருக்கும் ஒரு பையை போலீஸ்கார் சோதனை செய்கிறார். அதில் ஒரு Full. (அதை இழக்கையில் அவன் சலனமே கொள்ளவில்லை ) – பாவம் அவன் மனசு என்ன பாடு பட்டிருக்கும் என்று சிலர் பேசிக் கொண்டு வந்தார்கள்.

புறம்

· ஒரு நிமிடத்திற்கு சராசரியாக 25 கார்கள் ஒரு பேருந்தினைக் கடக்கின்றன.

· Toyota Fortuner போன்ற கார்களில் பின்னிருக்கையில் ஒருவர் மட்டுமே அமர்ந்திருக்கிறார்கள்

· Alto போன்ற கார்களில் சராசரியாக ஓட்டுபவர் தவிர்த்து 6 பேர் அமர்ந்திருக்கிறார்கள்.

· பெரிய சொகுசுக் கார்களில் பெரும்பாலும் அன்றைய தினசரிகள் கலைந்து கிடக்கின்றன.

· ‘‘5 பெண்களை திருமணம் செய்து மோசடி செய்த சென்னை போலீஸ்காரர்‘ போன்றவை செய்திகளில் முதன்மையான செய்திகளாக படிக்கிறார்கள்

· சிறிய மற்றும் விலை குறைவான கார்களில் சிறிய தெய்வங்களின் விக்ரகங்கள் வைக்கப்பட்டுள்ளன. அதில் 2ல் இருந்து 3 முழம் வரை சாமந்தி மற்றும் மல்லிகை போன்ற மாலைகள் தொங்குகின்றன.

· விலை குறைவான கார்களில் மனைவி ஓட்டுனர் இருக்கைக்கு அருகினில் அமர்ந்திருக்கிறார், குழந்தைகள் dash board ல் சாய்ந்துதூங்குகின்றன. பின்னிருக்கை காலியாகவே இருக்கிறது.

· பெரும்பாலும் காரில் பயணிப்பவர்கள் பேருந்தில் இருக்கும் கூட்டதை கண்டு வியப்புற்று அது குறித்து பேசிச் செல்கிறார்கள்

· 2 சக்ர வாகனங்களில் குறைந்தது 3 பேர் பயணிக்கிறார்கள். சில வாகனங்களில் குடும்ப உறுப்பினர்கள் 5 பேரும் பயணிக்கிறார்கள். இது நீண்ட தொலைவு பயணம் என்பது அவர்களுக்கு மறந்து விடுகிறது.

புகைப்படம் : Karthik Pasupathy

சமூக ஊடகங்கள்

சைவத் திருத்தலங்கள் 274 – திருப்பனங்காடு

தல வரலாறு(சுருக்கம்)/சிறப்புகள் – திருப்பனங்காடு

· அகத்தியர் தான் ஸ்தாபித்த ஈசன் தாலபுரீஸ்வரருக்கு பனம்பழம் படைத்து வழிபட்டதால் பனைமரமே தல விருட்சம். இதனாலேயே இறைவன் தாளபுரீஸ்வரர் என்கிற பனங்காட்டீர்

· அகத்தியர் பூசித்தபோது, இறைவன் சடாமுடியிலுள்ள கங்கை, தீர்த்தமாக வெளிப்பட்டதால் இது சடாகங்கை தீர்த்தம்

· அகத்திய முனிவரின் சீடரான புலத்தியர் ஸ்தாபித்து வழிபட்து கிருபாநாதேஸ்வரர்

· சுந்தரருக்கு உண்ண உணவும் பருக நீரும் கொடுத்த இடம்

· வடலூர் வள்ளற்பெருமானின் வாக்கிலும், பட்டினத்தடிகளின் திருவேகம்பர் திருவந்தாதியிலும் இத்தலம் குறிக்கப்பட்டுள்ளது

· உள் மண்டபத்தில் கல் தூண்களில் மிக அரிய சிற்பங்கள் – நாகலிங்கம் சிற்பம், ராமர் சிற்பம், வாலி – சுக்ரீவர் போரிடும் சிற்பம். இராமர் சிற்பத்திடம் நின்று பார்த்தால் வாலி சுக்ரீவ போர்ச்சிற்பம் தெரியும்; ஆனால் வாலி சுக்ரீவ சிற்பத்தின் பார்வைக்கு இராமர் சிற்பம் தெரியவில்லை.

· கஜப்பிரஷ்ட விமான அமைப்பு

தலம்	திருப்பனங்காடு
பிற பெயர்கள்	வன்பார்த்தான் பனங்காட்டூர், திருவன் பார்த்தான் பனங்காட்டூர், திருப்பனங்காடு
இறைவன்	தாளபுரீஸ்வரர் (பனங்காட்டீஸ்வரர்), கிருபாபுரீஸ்வரர், சோமாஸ்கந்தர்
இறைவி	கிருபாநாயகி, அமிர்தவல்லி
தல விருட்சம்	பனை
தீர்த்தம்	ஜடாகங்கை தீர்த்தம், சுந்தரர் தீர்த்தம்
விழாக்கள்
மாவட்டம்	திருவண்ணாமலை
திறந்திருக்கும் நேரம் / முகவரி	காலை 7 மணி முதல் 12 மணி வரை மாலை 4 மணி முதல் இரவு 8 மணி வரை அருள்மிகு தாளபுரீஸ்வரர் திருக்கோவில் திருப்பனங்காடு அஞ்சல் வழி வெம்பாக்கம் செய்யாறு வட்டம் திருவண்ணாமலை மாவட்டம் PIN – 604410 044-2431 2801, 98435 68742
வழிபட்டவர்கள்	அகஸ்தியர், புலஸ்தியர், கண்வ முனிவர்
பாடியவர்கள்	சுந்தரர் – 1 பதிகம்
நிர்வாகம்
இருப்பிடம்	காஞ்சிபுரத்திலிருந்து சுமார் 7 கி.மி. வந்தவாசி சாலை -> ஐயன்குளம் கூட்டுசாலை -> வலதுபுறம் திரும்பி சுமார் 7 கி.மி. நேராக செல்ல, திருப்பனங்காட்டூர் குறுக்கு சாலை சந்திப்பு -> வலதுபுறம் திரும்பி சுமார் 2 கி.மி. -> திருப்பனங்காடு கிராமம் -> ஆலயம்
இதர குறிப்புகள்	தேவாரத் தலங்களில் 241 வது தலம் தொண்டை நாட்டுத் தலங்களில் இது 9 வது தலம். அம்பிகை, திருமால் மற்றும் சந்திரன் ஆகியவர்கள் வழிபட்ட தலம்

தாளபுரீஸ்வரர்

அமிர்தவல்லி

புகைப்படம் : தினமலர்

பாடியவர் சுந்தரர்

திருமுறை 7ம் திருமுறை

பதிக எண் 086

திருமுறை எண் 7

பாடல்

மெய்யன்வெண் பொடிபூசும் விகிர்தன்வே தமுதல்வன்

கையின்மான் மழுவேந்திக் காலன்கா லம்மறுத்தான்

பைகொள்பாம் பரையார்த்த படிறன்றன் பனங்காட்டூர்

ஐயன்எங் கள்பிரானை அறியாதார் அறிவென்னே

பொருள்

மெய்ப் பொருளாய் இருப்பவனும், வெண்ணீற்றைப் பூசுகின்றவனும், மாறுபட்ட இயல்பினனும், வேதங்களுக்கு முதல்வனும், கையில் மான் மழுக்களை ஏந்துபவனும், காலனது காலத்தை இடைமுரிவித்தவனும், படத்தைக் கொண்ட பாம்பினை இடுப்பில் அணிந்தவனும் யாவர்க்கும் தலைவனும் ஆகி பனங்காட்டூரில் எழுந்தருளியிருக்கின்ற எங்கள் கள்ளப் பெருமானை அறியாதவரது அறிவுதான் என்னே !

கருத்து

காலன்கா லம்மறுத்தான் – காலங்களை ஆட்சி செய்யும் காலனையும் முடிவு செய்பவன்

பாடியவர் சுந்தரர்

திருமுறை 7ம் திருமுறை

பதிக எண் 086

திருமுறை எண் 9

பாடல்

மழையானுந் திகழ்கின்ற மலரோனென் றிருவர்தாம்

உழையாநின் றவருள்க உயர்வானத் துயர்வானைப்

பழையானைப் பனங்காட்டூர் பதியாகத் திகழ்கின்ற

குழைகாதற் கடிமைக்கட் குழையாதார் குழைவென்னே

பொருள்

மேகம் போன்ற நிறத்தை உடைய திருமால், தாமரை மலர் மேல் இருப்பவராகிய பிரம்மன் ஆகிய இருவரும் பணி செய்கின்றவராய் நினைந்து நிற்க, உயர்ந்த வானத்தை விட உயராமாக இருப்பவனும், எல்லாரையும் விட மூத்தவனும், பனக்காட்டூரில் உறையும் பதியாகிய குழை அணிந்த காதுகளை உடைய பெருமானுக்கு அடிமையாய் தொண்டு செய்து மனம் குழையாதவர் மன நெகிழ்ச்சி தான் என்னே?

கருத்து

உயர் வானம் – வானத்தினது இயல்பை கூறி அதனினும் உயர்தல் என்றது

பழையானை – காலங்களுக்கு முற்பட்டு நிற்பதால் எல்லாரையும் விட மூத்தவன்

Ref :

நிலாவு புகழ் திருவோத்தூர் திரு ஆமாத்தூர் நிறைநீர்

சுலாவு சடையோன் புலிவலம் வில்வலம் கொச்சை தொண்டர்

குலாவு திருப்பனங்காடு நன் மாகறல் கூற்றம் வந்தால்

அலாய் என்று அடியார்க்கு அருள்புரி ஏகம்பர் ஆலயமே.”

(பட்டினத்தடிகள்)

(இக் கோயில் பற்றி மேலும் விபரம் இருந்தால் தெரியப்படுத்தவும்)

சமூக ஊடகங்கள்

பொன்னான மந்திரம்

எச்சில் பட்டு தெறிக்கும்

வார்த்தைகளுக்கு

கட்டுப்படுகிறதோ இல்லையோ மனம்

மகளின் மௌனங்களுக்கு மட்டும்.

*பொன்னான மந்திரம் – பொன் பொன் போன்றது. வாயால் ஓதக் கூடா மந்திரம். திருமந்திரம் – 4ம் திருமுறை – 906

புகைப்படம் : அபிதா சுந்தர்

சமூக ஊடகங்கள்

மகேசுவரமூர்த்தங்கள் 21/25 நீலகண்டர்

வடிவம்

• உருவத்திருமேனி

• இம் மூர்த்தம் சிவனின் அகோர மூர்த்தத்தை முன்னிருத்தியது.

• ஆலால நஞ்சை உண்டபின் கருங்கழுத்துடன் ஈசன் காட்சிதரும் கோலம்

• முன்னிரு கரங்கள் – அஞ்சல், அபயம்

• பின்னிரு கரங்கள் – மான், மழு

• திருமுடி – நிலவு

• கரிய கழுத்து

• உமையவள் அருகிருக்கும் கோலம்

• நீல கண்டம் என்ற பெயரின் மீது கொண்ட காதலாலே திரு நீலகண்ட நாயனார் புகழ் பெற்றார்

வேறு பெயர்கள்

• கறைக்கண்டன்

• நீலகண்டன்

• விசாபகரண மூர்த்தி

• காலகண்டன்

• சிறீகண்டன்

வடிவம் அமையப் பெற்ற திருக்கோயில்கள்

• திருநீலக்குடி,கும்பகோணம்

• திருப்பைஞ்ஞீலி, திருச்சி வட்டம்

• நீலகண்டேசுவரர் கோவில், திருமண்ணிப்படிக்கரை (இலுப்பைப்பட்டு)

• கொண்டீசுவரர் கோயில்,சுருட்டப்பள்ளி

• பூடா நீல்கண்ட் கோயில் ,காட்மாண்டு, நேபாளம்

• நீலகண்டர் கோவில் ,ரிஷிகேஷ்

இதரக் குறிப்புகள்

மச்சபுராணம் கூர்ம புராணம், லிங்க புராணம், வாமன புராணம், பவிஷ்ய புராணம், மார்கண்டேய புராணம்

புகைப்படம் : இணையம்

சமூக ஊடகங்கள்

சைவத் திருத்தலங்கள் 274 – திருவோத்தூர்

தல வரலாறு(சுருக்கம்)/ சிறப்புகள் – திருவோத்தூர்

•சதுர ஆவுடையார்

•இறைவன் தேவர்களுக்கும், முனிவர்களுக்கும் வேதத்திற்குப் பொருள் சொன்ன இடமாதலின் ஓத்தூர் – ‘திரு’ அடைமொழி சேர்ந்து ‘திருஓத்தூர் ‘ – திருவோத்தூர்

•சிவபெருமான் வீரநடனம் புரிந்த தலம்

•ரத ஸப்தமி அன்று சூரிய ஒளி சுவாமி மீது விழும்.

•முருகப் பெருமான் இறைவனை பூஜித்த தலங்களில் இத்தலமும் ஒன்று

•திருஞானசம்பந்தர் பதிகம் பாடி, ஆண்பனை, பெண்பனையான தலம்

•தேவர்களுக்கும், முனிவர்களுக்கும் வேதத்தை கற்றுத்தரும் போது அவர்கள் தவிர வேறு யாரும் உள்ளே வராமல் தடுக்கவே இவ்வாறு நந்தி திரும்பி இருப்பதாக வரலாறு

•தொண்டைமான் விசுவாவசு என்னும் மன்னனிடம் தோற்ற பொழுது அவன் வெற்றிபெறுவதற்காக நந்தியை படைத் துணையாக அனுப்பிய இடம். இதன் பொருட்டு நந்தி முன் கோபுரம் நோக்கியவாறு.

தலம்	திருவோத்தூர்
பிற பெயர்கள்	செய்யாறு, திருவத்திபுரம், திருவத்தூர்
இறைவன்	வேதபுரீஸ்வரர், வேதநாதர்
இறைவி	பாலகுஜாம்பிகை, இளமுலைநாயகி
தல விருட்சம்	பனை
தீர்த்தம்	ஆலயத்திற்கு வெளியே சேயாறு, வெளிப் பிராகாரத்தில் கல்யாணகோடி தீர்த்தம், மானச தீர்த்தம்,
விழாக்கள்	தை மாதம் – பிரம்மோற்சவம், ஆடி மாதம் – லட்ச தீபம், ஆடி விசாகம் – ஞானசம்பந்தர் விழா, சுந்தரர் மோட்சம் சித்ரா பவுர்ணமி, பங்குனி உத்திரம், மாசி மகம், அப்பாத்துரை தோப்பு திருவிழா பிரதோஷம்
மாவட்டம்	திருவண்ணாமலை
திறந்திருக்கும் நேரம் / முகவரி	காலை 6 மணி முதல் 12 மணி வரை மாலை 4 மணி முதல் இரவு 8-30 மணி வரை அருள்மிகு வேதபுரீஸ்வரர் திருக்கோவில் திருவத்திபுரம் செய்யாறு வட்டம் திருவண்ணாமலை மாவட்டம் PIN – 604407 04182 – 224387
வழிபட்டவர்கள்	தொண்டைமான்
பாடியவர்கள்	திருஞானசம்பந்தர் – 1 பதிகம்
நிர்வாகம்
இருப்பிடம்	காஞ்சிபுரம் பேருந்து நிலையத்தில் இருந்து 2கி.மீ
இதர குறிப்புகள்	தேவாரத் தலங்களில் 250 வது தலம் தொண்டை நாட்டுத் தலங்களில் இது 8 வது தலம்.

வேதபுரீஸ்வரர்

இளமுலைநாயகி

பாடியவர் திருஞானசம்பந்தர்

திருமுறை 1

பதிக எண் 54

திருமுறை எண் 8

பாடல்

என்றா னிம்மலை யென்ற வரக்கனை

வென்றார் போலும் விரலினால்

ஒன்றார் மும்மதி லெய்தவ னோத்தூர்

என்றார் மேல்வினை யேகுமே.

பொருள்

கயிலை மலை குறித்து குறைவாக மதிப்பிட்டு செறுக்கு கொண்ட இராவணனை தனது கால் பெருவிரலால் வென்றவரும், தனது மனதில் இருந்து மாறுபட்டவர்களான மூன்று கோட்டைகள் கொண்ட மூன்று அசுரர்களை திரிபுர தகனம் அழித்தவரும் ஆகிய ஈசன் உறையும் தலமாகிய திருவோத்தும் எனும் ஊர்ப் பெயரைச் சொன்ன அளவில் அவர்களிடத்து இருக்கும் வினைகள் நீங்கும்.

கருத்து

என்தான் – எம்மாத்திரம். ஒன்னார் – பகைவர்

பாடியவர் திருஞானசம்பந்தர்

திருமுறை 1

பதிக எண் 54

திருமுறை எண் 9

பாடல்

நன்றா நான்மறை யானொடு மாலுமாய்ச்

சென்றார் போலுந் திசையெலாம்

ஒன்றா யொள்ளெரி யாய்மிக வோத்தூர்

நின்றீ ரேயுமை நேடியே.

பொருள்

திருவோத்தூரில் விளங்கும் இறைவரே! நான்கு வேதங்களை அதன் பொருள் உணர்ந்து ஓதுபவனாகிய பிரமன், திருமால் ஆகியோர் நீ ஏக உருவில் தீப்பிழம்பாய் இருத்தலை கண்டு அறியாமையினால் திசைகள் எல்லாம் தேடி அலைந்தனர். அவர்களது அறிவுநிலை யாது?

கருத்து

நன்றாம் நான் மறையான் – நல்லன செய்யும் நான்மறைகளை ஓதியும்

Reference

தவர்வாள் தோமர சூலம் காதிய சூருந் – எனத் தொடங்கும் திருப்புகழ்

‘ உலகியலின் உறுமயலின் அடைவுபெறும் எனதிதயம் ‘ எனத் தொடங்கும் திருஅருட்பிரக்காச வள்ளளாரின் ஐந்தாம் திருமுறை

புகைப்படம் : தினமலர்

இக் கோயில் பற்றி மேலும் விபரம் இருந்தால் தெரியப்படுத்தவும்.

சமூக ஊடகங்கள்

ஆதி சித்தனின் அரங்கேற்றம்

நமசிவாய வாழ்க, நாதன் தாள் வாழ்க

சம்பவம்

தேவர்களும் அசுரர்களும் பாற்கடலை கடைந்த போது வாசுகி ஆலகால விஷத்தை வெளிப்படுத்தியது. அதனை ஈசன் உண்டான். சத்தி தடுத்து நிறுத்தியதால் அது கழுத்தில் தங்கி விட்டது.

விளக்கம்

ஈசனானவர் எங்கும் நிறைந்தவர், பிறப்பிலி. மனித வாழ்வின் பிறப்பு மற்றும் இறப்பினை அவர்களின் மூச்சுக் காற்றே தீர்மானிக்கிறது.கழுத்தின் கண்டத்திற்கு மேல் வாசி பயில்பவர்கள் இறை தன்மையினை அடைவார்கள். இவர்களுக்கு பிறப்பில்லை. கழுத்துக்கு கீழே வாசி பயில்பவர்கள் உடல் ரீதியான மற்றும் மனரீதியான முன்னேற்றம் அடைவார்கள். இவர்களுக்கு பிறப்பு உண்டு.

இறை தன் நிலையிருந்து என்றும் வழுவாதிருக்க வாசியோகத்தின் முழுமையினை வெளிப்படுத்த ஈசனும் இறைவியும் நடத்திய நாடகம் அது.

மேலும் அறிய விரும்புவர்கள் குரு முகமாக அறிந்து கொள்க.

புகைப்படம் : இணையம்

சமூக ஊடகங்கள்

ஆதி ஆகுதி

தன் மீது அமரும்

வண்ணத்துப் பூச்சியின்

வலிஅறிந்து இருக்குமா அம்மலர்கள்

புகைப்படம் : SLKumar

சமூக ஊடகங்கள்

சைவத் திருத்தலங்கள் 274 – திருகுரங்கணில் முட்டம்

தல வரலாறு(சுருக்கம்)/ சிறப்புகள் – திருகுரங்கணில் முட்டம்

•இறைவன் சுயம்பு மூர்த்தி

•வாலி குரங்கு உருவிலும், இந்திரன் அணில் உருவிலும், எமன் காகம் (முட்டம்) உருவிலும் இறைவனை தனித்தனியே வழிபட்டு தங்களது சாபம் நிவர்த்தியடையப் பெற்ற தலம்

•விஷ்ணு துர்க்கை – வலது கையில் பிரயோகச் சக்கரம்,இடக்கையில் சக்கர முத்திரை, காலுக்கு கீழே மகிஷாசுரனும் அற்று.

•சித்திரை மாதத்தில் குறிப்பிட்ட சில நாட்களில் சுவாமி மீது சூரிய ஒளி விழுகிறது

தலம்	திருகுரங்கணில் முட்டம்
பிற பெயர்கள்	கொய்யாமலை
இறைவன்	வாலீஸ்வரர், கொய்யாமலைநாதர், திருக்குரங்கணில் முட்டமுடைய நாயனார், கொய்யாமலர் ஈசுவரதேவர்
இறைவி	இறையார் வளையம்மை, இளையாளம்மன், ஸ்ரீ பூரணகங்கணதாரணி
தல விருட்சம்	இலந்தை மரம்
தீர்த்தம்	காக்கை தீர்த்தம், வாயசை தீர்த்தம்
விழாக்கள்
மாவட்டம்	திருவண்ணாமலை
திறந்திருக்கும் நேரம் / முகவரி	காலை 7 மணி முதல் 9 மணி வரை மாலை 4 மணி முதல் இரவு 7 மணி வரை அருள்மிகு வாலீஸ்வரர் திருக்கோவில் குரங்கனில் முட்டம் கிராமம் தூசி அஞ்சல் செய்யாறு வட்டம் திருவண்ணாமலை மாவட்டம் – 631703 ஸ்ரீதர் குருக்கள், கைபேசி:9629050143, 9600787419
வழிபட்டவர்கள்	வாலி, இந்திரன், யமன்
பாடியவர்கள்	திருஞானசம்பந்தர் – 1
நிர்வாகம்
இருப்பிடம்	காஞ்சிபுரம் – வந்தவாசி சாலையில் காஞ்சீபுரத்திலிருந்து சுமார் 11 கி.மி
இதர குறிப்புகள்	தேவாரத் தலங்களில் 238 வது தலம் தொண்டை நாட்டுத் தலங்களில் இது 6 வது தலம்.

வாலீஸ்வரர்

இறையார் வளையம்மை

பாடியவர் திருஞானசம்பந்தர்

திருமுறை 1

பதிக எண் 31

திருமுறை எண் 8

பாடல்

மையார்நிற மேனி யரக்கர்தங் கோனை

உய்யாவகை யாலடர்த் தின்னருள் செய்த

கொய்யாமலர் சூடி குரங்கணின் முட்டங்

கையால்தொழு வார்வினை காண்ட லரிதே.

பொருள்

மையின் நிறத்தை ஒத்து இருக்கும் கரிய நிறமுடைய மேனியை உடையவனாகிய அரக்கர்களின் தலைவனாகிய இராவணை பிழைக்க முடியாதபடி செய்து, அவனது கர்வத்தை அடக்கி, அவனுக்கு இனிய அருளைச் செய்தவனும், அடியவர் அணிவித்த மலர் மாலைகளை சூடி குரங்கணில்முட்டத்தில் எழுந்தருளிக்கும் சிவபெருமானை கைகளால் தொழுபவர்களின் வினைப்பயன்கள் இல்லாது போகும். அஃதாவது இத்தலம் கண்டவர்களின் வினைகள் நீங்கும்

கருத்து

மையார்மேனி – கரியமேனி.

அரக்கன் – இராவணன். .

கொய் ஆர் மலர் – கொய்தலைப் பொருந்திய மலர்.

பாடியவர் திருஞானசம்பந்தர்

திருமுறை 1

பதிக எண் 31

திருமுறை எண் 9

பாடல்

வெறியார்மலர்த் தாமரை யானொடு மாலும்

அறியாதசைந் தேத்தவோர் ஆரழ லாகுங்

குறியால்நிமிர்ந் தான்றன் குரங்கணின் முட்டம்

நெறியால்தொழு வார்வினை நிற்ககி லாவே.

பொருள்

மணம் உடைய தாமரை மலரில் உறையும் நான்முகனும், திருமாலும் முறையே திருமுடியையும், திருவடியையும் அறிய முடியாது வருந்தி நிற்க தீயின் உருவமாய் நிற்கும் சிவபெருமான் விளங்கும் குரங்கணில் முட்டத்தை முறையாக தொழுபவர்களது வினைகள் முற்றிலும் நீங்கப் பெறும்.

கருத்து

அறியாது அசைந்து – முதற்கண் இறைவன் பெருமையையறியாமல் சோம்பி இருந்து

ஏத்த – பின்னர் அறிந்து துதிக்க

ஓர் ஆர் – தனக்கு ஒப்பில்லாதவன்

நெறி – ஆகமவிதி – தனக்கு விதிக்கப்பட்டவாறு தொழுதல்

புகைப்படம் : தினமலர்

சமூக ஊடகங்கள்