அந்தக்கரணம் – Page 65 – அரிஷ்டநேமி

மகேசுவரமூர்த்தங்கள் 14/25 தட்சிணாமூர்த்தி

பல இடங்களில் கோஷ்டத்தில் இருக்கும் தட்சிணாமூர்த்தியும், நவகிரக சன்னதிகளில் இருக்கும் குரு பகவானும் ஒன்றாகவே கருதப்படுகிறது. என் சிற்றறிவுக்கு எட்டியவரையில் இரண்டும் வேறு வேறானவை.

வடிவம்(பொது)

· தட்சிணம் என்றால் தெற்கு, த-அறிவு, க்ஷ-தெளிவு, ண-ஞானம் என இம்மூன்றும் சேர்ந்து தட்சிணா மூர்த்தி

· பஞ்சகுண சிவமூர்த்திகளில் சாந்த மூர்த்தி

· பிரம்மாவின் குமார்களான சனகர், சனந்தனர், சனாதனர், சனற்குமாரர் ஆகியவர்களுக்கு குரு

· நான்கு கைகள்

· இருப்பிடம் – ஆலமரத்தின் கீழ் தென்திசையை நோக்கி

· திருமேனி – பளிங்கு போன்ற வெண்ணிறம் – தூய்மை

· வலதுகால் கீழ் – ‘அபஸ்மரா’ (அறியாமையை / இருளை )என்ற அரக்கனை(முயலகன்) மிதித்த நிலையில் – அனைத்து தீமைகளையும் அடக்கி ஆளும் வலிமை

· ஒரு மேல் கையில் ஒரு ருத்திராட்ச மாலை(36 அல்லது 96 தத்துவங்கள்) / ஒரு பாம்பு

· அவரது மற்றொரு மேல் கையில் நெருப்பு

· கீழ் இடது கையில் தர்பைப் புல் / ஓலைச்சுவடி(சிவஞான போதம்) / அமிர்தகலசம் – அனைத்து உயிர்களுக்கும் பேரின்பம் அளிக்க வல்ல ஆற்றல்

· கீழ் வலது கையில் ஞான முத்திரை(மும்மலங்களை விலக்கி இறைவன் திருவடி அடைதல்)

· ஆடை – புலித்தோல் – தீயசக்திகளை அடக்கியாளும் பேராற்றல்

· தாமரை மலர்மீது அமர்ந்த கோலம் – இதயதாமரையில் வீற்றிருத்தல்(ஓங்காரம்)

· நெற்றிக்கண் – காமனை எரித்தல்; புலனடக்கம் உடையராதல் – துறவின் சிறப்பு

· ஆலமரமும் அதன் நிழலும் – மாயையும் அதன் காரியமாகிய உலகம்

· அணிந்துள்ள பாம்பு – குண்டலினி சக்தி

· வெள்விடை – தருமம்

· சூழ்ந்துள்ள விலங்குகள் – பசுபதித்தன்மை

· த்யான ரூபம்

· ஆசனம் – மகாராஜலீலாசனம், அர்த்தபத்மாசனம், யோகாசனம், உத்குடிக்காசனம்

வேறு பெயர்கள்

தெக்கினான்

ஆலமர் செல்வன்

தெற்கு நோக்கி இருப்பதால் தென் திசைக் கடவுள்

வடிவம் அமையப் பெற்ற திருக்கோயில்கள்

· புளியறை,செங்கோட்டை வட்டம், திருநெல்வேலி மாவட்டம்

· பட்டமங்கலம் – சிவகங்கை மாவட்டம்

· ஆலங்குடி ஆபத்சகாயேசுவரர் கோயில்

· சிவதட்சிணாமூர்த்தி – காசி விஸ்வநாதர் கோயில்,மதுரை பழங்காநத்தம் பஸ்ஸ்டாண்ட்

· திருவெண்காடு சுவேதாரண்யேஸ்வரர் கோயில் – சனகாதி முனிவர்களுக்கு பதில் பிரம்மா அமர்ந்த கோலம்

· ஈசன் தட்சிணாமூர்த்தி கோலத்தில் அன்னை உமையைத் தன் மடியில் தாங்கிய கோலம் – திருகன்னீஸ்வரர் கோயில்,திருக்கண்டலம்,சென்னை ரெட்ஹில்ஸ் – பெரியபாளையம் சாலை

· பள்ளிகொண்டீஸ்வரர் – தட்சிணாமூர்த்தி மனைவி தாராவுடன் , சுருட்டப்பள்ளி

· சிவபுரி எனும் திருநெல்வாயை(திருக்கழிப்பாலை), சிதம்பரம்

· திருவிடைமருதூர் மகாலிங்க சுவாமி கோயில், ராஜ அலங்காரத்தில் சிம்மாசனத்தில் மனைவியுடன்

· தாயுமான சுவாமி கோயில்,திருச்சி மலைக்கோட்டை(தர்ப்பாசனம்)

· பட்டமங்கலம் தட்சிணாமூர்த்தி கோயில்(கிழக்கு நோக்கி),திருப்புத்தூர்,சிவகங்கை மாவட்டம்

· திருலோக்கி, திருப்பனந்தாள் (அஞ்சலி முத்திரை)

· புஷ்பவனநாதர் திருக்கோயில்,(காl maaRRi vadivam), தென்திருபுவனம், திருநெல்வேலி

· பிரணவ வியாக்ரபுரீஸ்வரர்,ஓமாப்புலியூர், சிதம்பரம் மற்றும் காட்டுமன்னார்கோயில் (சேலை அணிந்து)

· ஐயாறப்பன் கோயில்,திருவையாறு ( கபாலமும் சூலமும் ஏந்திய வடிவம்)

· திடியன் மலை கைலாசநாதர் கோயில்,மதுரை – பதினான்கு சித்தர்களுடன். நந்தியின் மீது அமர்ந்த கோலம்

· ஆதிரத்தினேஸ்வரர் கோயில்,திருவாடனை – வீராசன கோலம்

· நந்தியுடன் தெட்சிணாமூர்த்தி – மயிலாடுதுறை வள்ளலார் கோயில்

· திரிசூலம் கோயில், சென்னை – வீராசன கோலம்

· தியாகராஜர் கோயில் (வெளியில்), திருவொற்றியூர்

· தக்கோலம் (சாந்த தட்சிணாமூர்த்தி)- உத்கடி ஆசனம்

· வீணாதர தட்சிணாமூர்த்தி கோலம் – நாகலாபுரம் வேதநாராயணர் கோயில், திருப்பூந்துருத்தி, நஞ்சன்கூடு, காஞ்சிபுரம் கைலாசநாதர், தூத்துக்குடி கழுகாசலமூர்த்தி கோயில்

· கல்யாணசுந்த ரேஸ்வரர்,நல்லூர் , தஞ்சை பாபநாசம் – இரட்டை தட்சிணாமூர்த்தி

· ஆத்மநாதசுவாமி கோயில்,சிதம்பரம் நடராஜர் கோயிலுக்கு வடதிசை – யோகநிலை

· ஹேமாவதி, அனந்தப்பூர்,ஆந்திரா – யோக மூர்த்தி

· சுகபுரம், கேரளா மாநிலம்

இதரக் குறிப்புகள்

நூல்கள்

ஞான சூத்திரம்,

ஞானச் சுருக்கம்,

ஞான பஞ்சாட்சரம்,

அகஸ்த்திய சகலாதிகாரம்,

சாரஸ்வதீயசித்ரகர்மமசாஸ்த்திரம்,

சில்பரத்தினம்,

சிரிதத்துவநிதி,

காரணாகமம்,

அம்சுமத்பேதாகமம்,

லிங்கபுராணம்

ஆதிசங்கரர் இயற்றியது தட்சிணாமூர்த்தி அஷ்டகம்.

பல திருவுருவங்கள்

ஞான தட்சிணாமூர்த்தி,

வியாக்யான தட்சிணாமூர்த்தி,

சக்தி தட்சிணாமூர்த்தி,

மேதா தட்சிணாமூர்த்தி,

யோக தட்சிணாமூர்த்தி,

வீர தட்சிணாமூர்த்தி,

லட்சுமி தட்சிணாமூர்த்தி,

ராஜ தட்சிணாமூர்த்தி,

பிரம்ம தட்சிணாமூர்த்தி,

சுத்த தட்சிணாமூர்த்தி

கல்லாலின் புடையமர்ந்து நான்மறை ஆறு அங்கம் முதற் கற்ற கேள்வி
வல்லார்கள் நால்வருக்கும் வாக்கிறந்த பூரணமாய் மறைக்கு அப்பாலாய்
எல்லாமாய் அல்லதுமாய் இருந்தனை இருந்தபடி இருந்து காட்டிச்
சொல்லாமல் சொன்னவரை நினையாமல் நினைந்து பவத் தொடக்கை வெல்வாம்.

(திருவிளையாடற் புராணம் – பாடல் – 13)

புகைப்பட உதவி : விக்கிபீடியா

சமூக ஊடகங்கள்

மேன்மை கொள் சைவ நீதி – விளங்க வைத்த சந்தானக் குரவர்கள்

‘சைவத்தின் மேற் சமயம் வேறில்லை’ என்ற மொழித் தொடரை வைத்து சைவத்தின் பெருமையையும் அதற்கு காரணமாக இருக்கும் அனைத்து பொருள்களிலும் நீக்கமற நிறைந்திருக்கும் எம்பெருமான் ஈசனின் பெருமைகளையும் அறியலாம்.

அறியவொண்ணா பெருமைகள் உடையது சிவனின் பெயர்கள். அப்படிப்பட்ட சிவனை நேரில் தரிசிக்கும் பாக்கியம் பெற்றவர்கள் சந்தானக் குரவர்கள். சிவனின் பெருமைகளை பாடல்களாக அருளியவர்கள்.சைவ சித்தாந்த சாத்திரங்கள் இவர்களால் அருளப் பெற்றதே.

குருவைக் குறிக்கும் சொல்லே குரவர். இவர்கள் நால்வர் ஆவார்.

மெய்கண்டார்,

மறைஞான சம்பந்தர்,

அருணந்தி சிவாசாரியார்,

உமாபதி சிவம்

இவர்கள் குரு சீடர் மரபு கொண்டவர்கள். திரு மடங்களை ஸ்தாபிதம் செய்து அதன் மூலம் சைவ நெறி தழைக்க பங்களித்தவர்கள்.

இவர்களது காலம் 12, 13ம் நூற்றாண்டு.

இவர்களது பெயர்களும் இவர் இயற்றிய நூல்களும் கீழே குறிப்பிடப்பட்டுள்ளது.

· மெய்கண்டார் – சிவஞான போதம்

· அருள்நந்தி சிவாசாரியார் – சிவஞான சித்தியார், இருபா இருபது

· கடந்தை மறைஞான சம்பந்தர் – சதமணிக் கோவைசதமணிக்கோவை

· உமாபதி சிவாச்சாரியார் – சிவப்பிரகாசம், திருவருட்பயன், சங்கற்ப நிராகரணம், கோயிற்புராணம், திருமுறை கண்ட புராணம், சேக்கிழார் புராணம்

இவர்களைப்பற்றி விரிவாக எழுத உள்ளேன். திருவருள் துணை புரியட்டும்.

சமூக ஊடகங்கள்

சைவத் திருத்தலங்கள் 274 – திருக்கச்சிமேற்றளி

தல வரலாறு(சுருக்கம்)/ சிறப்புகள் – திருக்கச்சிமேற்றளி

•அமைவிடம் – பிள்ளையார் பாளையம்

• ஈசன் சுயம்பு மூர்த்தி

• இரு மூலவர் சன்னதிகள்

• சிவ சாரூப நிலை வேண்டி திருமால் இறைவனை நோக்கி தவமிருந்த தலம்

• ஞான சம்மந்தரில் பதிகம் கேட்டு சிவபெருமான் உருகியதால் ஓத உருகீசர்

• கற்றளி – கற்களால் கட்டப்பட்ட கோயில். மேற்றளி – மேற்கு திசையில் அமையப்பெற்ற கோயில்

• ஞானசம்பந்தரின் பாடலைக் கேட்டு திருமால் உருகியதால் ஓத உருகீசர் – கர்ப்பக்கிருகத்துள் தனி சந்நிதி

தலம்	திருமேற்றளீஸ்வரர்
பிற பெயர்கள்	திருக்கச்சிமேற்றளி, கற்றளி
இறைவன்	திருமேற்றளிநாதர்
இறைவி	திருமேற்றளிநாயகி
தல விருட்சம்	வில்வம்
தீர்த்தம்	விஷ்ணு தீர்த்தம்
விழாக்கள்	சிவராத்திரி, பங்குனி உத்திரம், கந்தசஷ்டி
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 7 மணி முதல் 12.00 மணி வரை, மாலை 5 மணி முதல் இரவு 9 மணி வரை அருள்மிகு திருமேற்றளீஸ்வரர் திருக்கோயில், பிள்ளையார்பாளையம்-631 501 காஞ்சிபுரம். காஞ்சிபுரம் மாவட்டம். 09865355572, 09994585006
வழிபட்டவர்கள்	நூறு ருத்திரர்கள், சீகண்டர், வீரபத்திரர், குரோதர், மண்டலாதிபதிகள் உள்ளிட்ட 116 பேர் மற்றும் புதன்
பாடியவர்கள்	திருநாவுக்கரசர் – பதிகங்கள், , சுந்தரர் – பதிகங்கள், திருஞானசம்பந்தர்
நிர்வாகம்	இந்து சமய அறநிலையத்துறை
இருப்பிடம்	காஞ்சிபுரம் பேருந்து நிலையத்தில் இருந்து 1கி.மீ
இதர குறிப்புகள்	தேவாரத் தலங்களில் 234 வது தலம் தொண்டை நாட்டுத் தலங்களில் இது 2 வது தலம்.

* ஞானசம்பந்தரின் தேவாரப் பாடல்கள் கிடைக்கவில்லை

திருமேற்றளீஸ்வரர்

பாடியவர் திருநாவுக்கரசு சுவாமிகள்

திருமுறை 4ம் திருமுறை

பதிக எண் 43

திருமுறை எண் 10

பாடல்

தென்னவன் மலையெ டுக்கச் சேயிழை நடுங்கக் கண்டு

மன்னவன் விரலா லூன்ற மணிமுடி நெரிய வாயாற்

கன்னலின் கீதம் பாடக் கேட்டவர் காஞ்சி தன்னுள்

இன்னவற் கருளிச் செய்தார் இலங்குமேற் றளிய னாரே.

பொருள்

தெற்குப் பகுதியை ஆண்ட இராவணன், (தனது கர்வத்தால்) கயிலாய மலையைப் பெயர்த்து எடுக்க, அதனால் பார்வதி நடுக்கமுற, பார்வதியின் நடுக்கம் நீக்குவதன் பொருட்டு தனது கால் விரல்களால் கயிலாய மலையை அழுத்த, அதனால அவன் தலைகள் நெரிய, தன் தவறை உணர்ந்து கரும்பு போன்று இனிய கீதங்களைப் பாட அதனால் அவனுக்கு அருள் செய்தவர். அவர் இந்த காஞ்சித் திருத் தலத்தில் உறையும் மேற்றளியார் ஆவார்.

கருத்து

தென்னவன் – இராவணன் ,
சேயிழை – செய்ய ( கல் ) இழை ( த்துச் செய்யப்பட்ட அணிகளைப் ) பூண்டவள் . இழை நூலிழையாகக் கொண்டு தாலி எனலும் கூடும்
மன்னவன் – என்றும் நிலையாயிருப்பவன்.(கயிலைத் தலைவன் என்றும் கொள்ளலாம்)
நெரிய – நொறுங்க
கன்னலின் – கரும்பினைப் போலும் இனிமை பயக்கும் ,

பாடியவர் சுந்தரர்

திருமுறை 7 ம் திருமுறை

பதிக எண் 021

திருமுறை எண் 9

பாடல்

நிலையா நின்னடியே நினைந் தேன்நி னைதலுமே

தலைவா நின்னினையப் பணித் தாய்ச லமொழிந்தேன்

சிலையார் மாமதில்சூழ் திருமேற்ற ளிஉறையும்

மலையே உன்னையல்லால் மகிழ்ந்தேத்த மாட்டேனே.

பொருள்

பெரிய மதில்கள் சூழ்ந்த கச்சித் திருமேற்றளியில் உறையும் மலை போன்றவனே, அடியேன் உனது திருவடிகளையே நிலையான பொருளாக உணர்ந்தேன். அவ்வாறு உணர்ந்த பிறகு அதில் இருந்து என்றும் மாறாமல் தொடந்து இருக்க திருவருள் செய்தாய். அதனால் எனது துன்பங்கள் ஒழிந்தவன் ஆனேன். ஆகவே அடியேன், உன்னை விடுத்து பிற தெய்வங்களை மனம் மகிழ்ந்து புகழ மாட்டேன்.

கருத்து

நிலையா நின்னடியே – (திருமாலாலும்) அடைய முடியா திருவடி (இது என் கருத்து)

சலமொழிந்தேன் – கடலைப் போன்ற பல பிறவி நீங்கினேன். (சலதி கிழிந்து – கந்தர் அலங்காரம்)

புகைப்படம் : கோலாலகிருஷ்ணன் விஜயகுமார்

சமூக ஊடகங்கள்

மகேசுவரமூர்த்தங்கள் 13/25 ஹரிஹர்த்தர்

வடிவம்

· ஞானம் செல்வம் இரண்டையும் தரும் வடிவம்

· சங்கன் என்ற அரசன் சிவன் மீது பற்றும், பதுமன் என்ற அரசன் திருமால் மீது பற்று கொண்டு யார் பெரியவர் என்ற வாதத்தினால் அம்மையிடம் முறையிட அவர்களுக்கு இருவரும் ஒருவரே என குறிக்க எடுத்த வடிவம்.

· சுவாத்தை மாற்றுவதால் ப்ரமத்தை அறியலாம். மேல்விவரங்களை குரு மூலமாக அறியவும்.

வலது – பிங்களை(சூரிய கலை நாடி)

இடது – இடகலை(சந்திர கலை நாடி)

சுழுமுனை – இரு பக்கங்களிலும் காற்றை செலுத்துதல்

எண்		வலது பாதி(சிவன்)	இடது பாதி(திருமால்)
1	தலை	கங்கை, பிறைச்சந்திரன், அக்னி, ஜடாமுடி. பின்புறம் சிரசக்கரம் அல்லது ஒளிவட்டம்,சடாமுடி	கிரீடம்
2	திருமுகம்	நெற்றிக் கண்(அர்த்தநேத்திரன்), திருநீறு	திருநாமம்
3	காது	தாடங்கம், மகர குண்டலம், சர்ப்ப குண்டலம்	மகர குண்டலம்
4	கைகள்	· மழு, அபய ஹஸ்தம் · பரசு மற்றும் நாகம்	சக்கரம், சங்கு அல்லது கதை மற்றும் ஊரு ஹஸ்தம்/(கடக முத்திரை) சங்க ஹஸ்தம். கேயூரம், கங்கணம்
5	மார்பு	ருத்ராட்சம்	திருவாபரணங்கள்
6	இடுப்பு	புலித்தோல் ஆடை	பஞ்சகச்சம்
7	திருவாட்சி	நாக வடிவில் சங்கன் குடை பிடித்தபடி
8	வண்ணம்	வெண்மை	நீலநிற மேனி
9	தோற்றம்	கோரம்	சாந்தம்
10	வாகனம்	வலது புறம் நந்தி	இடது புறம் கருடன்

* கேசாதி பாதமாக விவரிக்கப்பட்டுள்ளன. சோழர் கால வடிவமும், பல்லவர் கால/இதர வடிவமும் சில இடங்களில் வேறு வேறாக இருக்கின்றன.

வேறுபெயர்கள்

சங்கர நாராயணர்

ஹரியர்த்தமூர்த்தி

வடிவம் அமையப் பெற்ற திருக்கோயில்கள்

· சங்கரன் கோவில், திருநெல்வேலி மாவட்டம்

· தஞ்சைப் பெரிய கோயில்

· சங்கர நாராயண சுவாமி திருக்கோவில், தஞ்சை மேலராஜவீதி

· கங்கை கொண்ட சோழபுரம்

· சிதம்பரம்

· திருஅறையணிநல்லூர் (தற்போது அரகண்டநல்லூர் )- திருக்கோவிலூருக்கு எதிர்க்கரையில் பெண்ணையாற்றின் வடகரையில் உள்ள ஒரு சிறு குன்றின் மீது திருக்கோவில்

· திருச்செந்தூர்

· திருப்பெருந்துறை

· மீனாட்சி அம்மன் வசந்த மண்டபம், மதுரை

· நாகேஸ்வரர் கோவில், கும்பகோணம்

· குடுமியான் மலை குடவறைச் சிற்பங்கள்

· ஹரிஹர், ஹோஸ்பெட் அருகே துங்கபத்ரா நதிக்கரை, தாவன்கெரே மாவட்டம், கர்நாடகா

· கூடலி, சிவமோகா எனப்படும்ஷிமோகா– துங்காவும்(திருமால்) பத்ராவும்(சிவன்) சங்கமம்

இதரக் குறிப்புகள்

சங்கர நாராயணர் கோயிற் கோமதியம்பிகை பிள்ளைத்தமிழ் என்றொரு நூலை முத்துவீரக் கவிராயரவர் என்பவர் இயற்றி இருக்கிறார்.

· வாமன புராணம்

· பேயாழ்வார் பாசுரம்

தாழ் சடையும் நீள் முடியும் ஒண் மழுவும் சக்கரமும்

சூழ் அரவும் பொன் நாணும் தோன்றுமால் சூழும்

திரண்டு அருவி பாயும் திருமலைமேல் எந்தைக்கு

இரண்டு உருவும் ஒன்றாய் இசைந்து

புகைப்படம் : வலைத்தளம்

சமூக ஊடகங்கள்

மகேசுவரமூர்த்தங்கள் 12/25 திரிமூர்த்தி

வடிவம்

· உலகை படைக்க எடுக்கப்பட்ட வடிவம் ஏகபாதராகத் திருவடிவம்.

· இதயத்தில் இருந்து ஆயிரத்தில் ஒரு கூறாக ருத்திர், பின் வலப் பாகத்தில் இருந்து பிரம்மன், இடப் பாகத்தில் இருந்து விஷ்ணு.

· சில இடங்களில் ஏகபாத மூர்த்தியும், திரிமூர்த்தியும் ஒன்றாகவே கருதப்படுகிறது. ஏகபாத மூர்த்தி என்பது சிவன் மட்டும் தனித்து ஒரு காலில் காணப்படும் வடிவம். (யோக நிலையைக் குறிப்பது) திரிமூர்த்தி என்பது பிரம்மா, விஷ்ணு, ருத்ரன் ஆகிய மூவரும் ஒன்றாக ஒற்றைக்காலில் தனித்து காணப்படும் வடிவம்.

· இம்மூர்த்திக்கான ஸ்தாபன முறைகளும், பிரதிஷ்டா முறைகளும் மிகக் கடினமாக இருக்கின்றன.

· வர்ணம் – ரக்தவர்ணம்

· முகம் – முக்கண்

· கரங்கள் – வரத அபய ஹஸ்தம் மான் மழு

· அலங்காரம் – ஜடாமகுடம்

· பாதம் – ஒன்று

· இடுப்புபிரதேசத்திற்கு மேல் தெற்கு வடக்கு பக்கமாகிய இருஇடங்களிலும் முறையாக பாதிசரீரம் உடைய பிரம்மா விஷ்ணு

· பிரம்மா விஷ்ணு ஒவ்வொருபாதத்துடன் கூடியதாக(அ) அஞ்சலிஹஸ்தத்துடன்
பிரம்ம விஷ்ணுக்களின் அளவானது பெண் சரீரம் போல் சற்று வளைவாக, இரண்டு கைகளும் தொழுத நிலையில் ஒரு காலோடு கூடியவராக. (கால் இல்லாமலும்)

வேறு பெயர்கள்

ஏகபாததிரிமூர்த்தி

ஏகபாத திரிமூர்த்தி

வடிவம் அமையப் பெற்ற திருக்கோயில்கள்

· திருமறைக்காடு (வேதாரண் யம்)

· பிச்சாண்டார் கோயில்(அ) உத்தமர் கோயில், திருச்சி

· மண்டகப் பட்டு ஸ்ரீ திரிமூர்த்தி குகைக் கோவில்

· தர்மராஜரதம்(அ)திரிமூர்த்தி குகை, மஹாபலிபுரம்

· தப்பளாம்புலியூர், திருவாரூர்

· திரு உத்தரகோசமங்கை

· திருவக்கரை

· ஆனைமலையடிவாரம்

· ஒரிஸ்ஸா, சௌராஷ்டிரம், மைசூர்

· திரியம்பகேஸ்வர்,நாசிக்

· திருநாவாய்,திரூர் நகரிலிருந்து தெற்கே 12 கி.மீ., மலப்புறம் மாவட்டம்,கேரள மாநிலம்

· திரிப்பிரயார் ஸ்ரீ ராமர் கோயில் – திரிப்பிரயார் ஆற்றின் கரை,கொடுங்கல்லூர்

இதரக் குறிப்புகள்

· சிவபேதம் பத்தையும் கேட்டவர்களில் திரிமூர்த்தி வடிவம் பற்றி கேட்டவர் உதாசனர்

· அஷ்ட வித்யேச்வரர்களில் (வித்யேச்வரர்: அநந்தர், சூக்ஷ்மர், சிவோத்தமர், ஏகநேத்ரர், ஏகருத்ரர், திரிமூர்த்தி, ஸ்ரீகண்டர், சிகண்டி) திரிமூர்த்தியும் ஒருவர். இவர்கள் மாயைக்கு மேல் சுத்த வித்யைக்குக் கீழிருக்கும் புவனவாசிகள் என்கின்றன ஞானநூல்கள்.

· நவராத்திரியின் போது இரண்டாம் நாளளில் மூன்று வயதுள்ள பெண்ணை திரிமூர்த்தி என்ற பெயரில் பூஜை செய்ய வேண்டும். இப்பூஜை அறம், பொருள், இன்பம், தானியம் ஆகியவை கிடைக்கச் செய்யும். பெயரன், பெயர்த்தி என பரம்பரையும் நீண்ட ஆயுளும் கிடைக்கும்

· உத்தரகாமிகாகம மஹாதந்திரத்தில் த்ரீமூர்த்தி ஸ்தாபன விதி – அறுபத்தி ஒன்றாவது படலம்.

புகைப்படம் : வலைத்தளம்

சமூக ஊடகங்கள்

மகேசுவரமூர்த்தங்கள் 11/25 சக்ரவரதர்

சக்ரவரதர்

சிவனின் வாமதேவ முகத்தில் இருந்து தோன்றியவர் – சக்ரவரதர்.

திருமாலுக்கு சக்கரம் கொடுத்த மூர்த்தி. இவரை வழிபடுபவர்கள் அனைத்து போகங்களையும் எவ்வித இடையூரும் இன்றி துய்ப்பார்கள்.

இந்த விபரம் மட்டுமே இம்மூர்த்தி பற்றி காணப்படுகிறது.

சமூக ஊடகங்கள்

சைவத் திருத்தலங்கள் 274 – ஏகாம்பரநாதர் – காஞ்சிபுரம்

• பஞ்சபூத தலங்களில் – பிருத்வி – நிலம்

• மூல லிங்கம் மணலால் ஆனதால் இதற்கு அபிஷேகங்கள் கிடையது

• இறைவி கம்பை மாநதியில் நீர் பெருக்கெடுத்து வந்ததால் பயந்து பெருமானை இறுகத் தழுவிக்கொண்டதால் தழுவக் குழைந்தநாதர்

• சிவன் அம்பாளுக்கு அருள்புரிவதற்காக கங்கையையும், ஆலகால விஷத்தின் உஷ்ணத்தால் கருப்பு நிறமாக மாறிய மகாவிஷ்ணுவை குணப்படுத்த தலையை அலங்கரிக்கும் பிறைச்சந்திரனையும் அணிந்திருக்கிறார்

• பிரகாரத்தில் பிரம்மா பூசித்த இலிங்கம் – வெள்ளக்கம்பம், விஷ்ணு பூசித்த இலிங்கம் – கள்ளக் கம்பம், உருத்திரர் பூசித்த இலிங்கம் – கள்ளக் கம்பம்

• 108 வைணவ திவ்ய தேசங்களில் ஒன்றான நிலாத்துண்ட பெருமாள் சந்நிதி, இத் திருக்கோயில் உள் பிரகாரத்தில் அமைந்திருக்கிறது.

• இருகண்பார்வைகளும் மறையப் பெற்ற சுந்தரமூர்த்தி நாயனார்க்கு இடக்கண் பார்வையை கொடுத்தருளிய தலம்.

• திருக்குறிப்புத் தொண்ட நாயனார், ஐயடிகள் காடவர்கோன் நாயனார் ,கழற்சிங்க நாயனார் ஆகியோரின் அவதாரத்தலம்

• சாக்கிய நாயனார் முக்தியடைந்த தலம்

• தை மாத ரதசப்தமி தினத்தில் லிங்கத்தின் மீது சூரிய ஒளி

• ராமர் பிரம்மஹத்தி தோஷம் நீங்க வழிபட்ட சகஸ்ரலிங்கம் மற்றும் அஷ்டோத்ர (108) லிங்கங்கள் பிரகாரத்தில்

• கச்சியப்ப சிவாச்சாரியார் “கந்த புராணத்தை’ இயற்றிய தலம்.

• கச்சி மயானம் என்னும் ஒரு வைப்புத்தலமும் ஏகம்பத்தினுள் கொடி மரத்தின் முன்னால் உள்ளது.

• 172 அடி உயரமுள்ள இராஜகோபுரம்

இத்தலத்தைப்பற்றிய நூல்கள்

·திருவாவடுதுறை ஆதீனத்து மாதவச்சிவஞானயோகிகள் – காஞ்சிப்புராணம்,

·கச்சியப்பமுனிவர் – காஞ்சிப்புராணம்,

·கச்சியப்பமுனிவர் – கச்சி ஆனந் தருத்திரேசர் வண்டுவிடுதூது,

·இரட்டையர்கள் – ஏகாம்பர நாதர் உலா

·பட்டினத்துப்பிள்ளையார் – திருவேகம்ப முடையார் திருவந்தாதி,

·மாதவச்சிவஞான யோகிகள் – ஆனந்தருத்திரேசர் பதிகம், திருவேகம்பர், ஆனந்தக்களிப்பு, திரு ஏகம்பர் (யமக) அந்தாதி

சிறப்பு செய்யும் நூல்கள்

மணிமேகலை,

தக்கயாகப் பரணி

மத்தவிலாசப்பிரகசனம்

தண்டியலங்காரம்

பன்னிரு திருமுறைகள்

தலம்	ஏகாம்பரநாதர் – காஞ்சிபுரம்
பிற பெயர்கள்	திருக்கச்சியேகம்பம்
இறைவன்	ஏகாம்பரநாதர், தழுவக் குழைந்தநாதர், ஏகாம்பரேஸ்வரர், திருவேகம்பர்
இறைவி	ஏலவார்குழலி
தல விருட்சம்	மாமரம்
தீர்த்தம்	சிவகங்கை தீர்த்தம், கம்பாநதி
விழாக்கள்	பங்குனி உத்திரம், ஆனித் திருமஞ்சனம், ஆடிக் கிருத்திகை, ஆவணி மூலம், நவராத்திரி, சித்ரா பெளர்ணமி, வைகாசி விசாகம்
மாவட்டம்	காஞ்சிபுரம்
திறந்திருக்கும் நேரம் / முகவரி	காலை 6 மணி முதல் 12.30 மணி வரை, மாலை 4 மணி முதல் இரவு 8.30 மணி வரை அருள்மிகு காஞ்சி ஏகாம்பரேஸ்வரர் திருக்கோயில், காஞ்சிபுரம்-631501. +91- 44-2722 2084.
வழிபட்டவர்கள்	உமையம்மை, பிரம்மா, திருமால், ருத்திரர்
பாடியவர்கள்	திருஞானசம்பந்தர் – 4 பதிகங்கள், திருநாவுக்கரசர் – 7 பதிகங்கள், , சுந்தரர் – 1 பதிகங்கள், மாணிக்கவாசர் *
நிர்வாகம்
இருப்பிடம்	காஞ்சிபுரம்
இதர குறிப்புகள்	தேவாரத் தலங்களில் 233 வது தலம் தொண்டை நாட்டுத் தலங்களில் இது 1 வது தலம்.

*சில நூல்களிலும் வலைத்தளங்களிலும் மாணிக்கவாசகர் பாடியிருப்பதாக குறிப்பிடப்பட்டுள்ளது. மாணிக்க வாசகரின் பாடல் வரிகளில் இத்தலம் பற்றிய குறிப்பு உள்ளதே தவிர தனி பாடல் இல்லை.

ஏலவார் குழலம்மை உடனாகிய ஏகாம்பரேஸ்வரர்

பாடியவர் திருஞானசம்பந்தர்

திருமுறை 2 ம் திருமுறை

பதிக எண் 12

திருமுறை எண் 8

பாடல்

தூயானைத் தூயவா யம்மறை யோதிய

வாயானை வாளரக் கன்வலி வாட்டிய

தீயானைத் தீதில்கச் சித்திரு வேகம்பம்

மேயானை மேவுவா ரென்றலை மேலாரே.

பொருள்

தூயவன். தூயனவாகிய மறைகளை ஒதிய வாயினன். ஒளி பொருந்திய வாளினை உடைய இராவணனின் வலிமையை அடர்த்த, தீயேந்தியவன். குற்றமற்ற திருக்கச்சி ஏகம்பத்தில் எழுந்தருளியிருப்பவன். அவனை அடைந்து துதிப்பவர் என் தலைமேல் கொள்ளத்தக்கவர்.

கருத்து

சர்வஞ்ஞத்வம் குற்றம் அற்றவனும், அனைத்தையும் இயக்கும் வல்லமை உடையவன் என்ற சைவசித்தாந்த கருத்து சிந்திக்கக்கூடியது.

ரென்றலை மேலாரே – என்னால் வணங்கப்படுவர்கள் எனும் பொருளில்

பாடியவர் சுந்தரர்

திருமுறை 7 ம் திருமுறை

பதிக எண் 61

திருமுறை எண் 1

பாடல்

ஆலந் தானுகந் தமுதுசெய் தானை

ஆதி யைஅம ரர்தொழு தேத்தும்

சீலந் தான்பெரி தும்முடை யானைச்

சிந்திப் பாரவர் சிந்தையு ளானை

ஏல வார்குழ லாள்உமை நங்கை

என்றும் ஏத்தி வழிபடப் பெற்ற

கால காலனைக் கம்பன்எம் மானைக்

காணக் கண்அடி யேன்பெற்ற வாறே.

பொருள்

பாற்கடல் கடையும் பொழுது அதில் வந்த நஞ்சினை விரும்பி உண்டவனும் அமுதத்தை தேவர்களுக்கு அளித்தவனும், எல்லோருக்கும் முதல்வனாக இருப்பவனும், தேவர்களால் துதிக்கப்படும் பெருமை உடையவனும், நினைப்பவர்கள் நினைவில் உள்ளவனும், நீண்ட கூந்தலை உடைய உமையால் தினமும் துதிக்கப்படுபவனும், காலங்களுக்கு முடிவானவனாகவும் ஆகிய எம்மானை காண அடியேன் கண் பெற்றவாறே.

கருத்து

‘வியப்பு’ என்பது சொல்லெச்சம்

‘சீலம்’ என்பது குணம்

புகைப்படம் : தினமலர்

சமூக ஊடகங்கள்

மகேசுவரமூர்த்தங்கள் 10/25 அர்த்தநாரீஸ்வரர்

வடிவம்

சிவனின் உருவத் திருமேனி

சிவனும் சக்தியும் இணைந்த வடிவம்

வலது புறம் – சிவன்

இடது புறம் – பார்வதி

	வலது புறம் – சிவன்	இடது புறம் – பார்வதி
தலை		கரண்ட மகுடம்
நெற்றி		அரைத்திலகம்
கைகள்	அபயமும், பரசும் அல்லது வரதமும், சூலமும் அல்லது மழுவும், அபயமும் அல்லது சூலமும் அக்கமாலையும் அல்லது ஒரு கை இடபத்தின் தலையின் மீது ஊன்றியவாறும், மற்றொன்று அபயம் தாங்கியவாறு இரண்டு கரங்கள் மட்டுமே தரித்திருந்தால் சிவனின் பாகத்தில் வரதம் அல்லது கபாலம்	சிவன் வலது புறம் மூன்று கரங்கள் பெற்றிருந்தால் இடது புறம் தேவி ஒரு கரம் மட்டும் – கண்ணாடி, கிளி, நீலோத்பலம் ஆகியவற்றில் ஏதேனும் ஒன்று. கரங்களில் கேயூரம், கங்கனம். அர்த்தநாரீஸ்வரர் படிமம் இரண்டு கரங்கள் மட்டுமே தரித்திருந்தால் இடது கை தொங்கவிட்டவாறு அல்லது இடபத்தின் மீது தொட்டவாறு இருக்கும்.
மேலாடை	புலித்தோலாடை	இரத்தினங்களினாலான ஆபரணங்கள்
	நாகயக்ஞோபவீதம், நாகத்தினாலான சர்ப்பமேகலை
கோலம்	சற்று வளைந்து தேவியின் உயரத்திற்கேற்ப பத்மாசனத்தில் நின்றவாறு இருக்கும்	பத்மாசனத்தில் நின்ற கோலம்
தோற்றம்	கோரம்	சாந்தமான தோற்றம்
வண்ணம்	சிவப்பு வண்ண மேனி	கிளிப்பச்சை அல்லது அடர்ந்த நிறம்

இதரக் குறிப்புகள்

வடமொழியில் அர்த்தநாரீஸ்வர துதி என்று ஒன்று உள்ளது.

விளக்க நூல்கள் – அம்சுமத் பேதாகமம், காமிக்காகமம், சுப்ரபேதாகமம், சில்பரத்னம், காரணாகமம்

புகைப்படம் : வலைத்தளம்

சமூக ஊடகங்கள்

அஷ்ட தசா புஜ துர்க்கை

அஷ்டம் – எட்டு

தச – பத்து

புஜம் – கைகள்

பதினெட்டு கைகளுடன் கூடிய துர்க்கை. ஸ்ரீ மஹாலக்ஷ்மி துர்க்காம்பிகை என்ற பெயரும் உண்டு.

அகிலம் எங்கும் நீக்கமற நிறைந்திருக்கிறது அன்னையின் அருள் கருணை. அதனாலே சித்தி அடைய எண்ணுபவர்களின் முதன்மை தெய்வமாக தாய் இருக்கிறாள். (வாலை, குமரி பின் அன்னை).

அன்னைக்கு என்று பல்வேறு வடிவங்களும் பல்வேறு ஆயுதங்களும் இருந்தாலும், அவைகளால் குறிப்பிடப்படும் அருளள் முதன்மையானது. அது சாந்த வடிவமே என்பதற்கு சான்றாகவே இத் துர்க்கை.

வெகு சில இடங்களில் மட்டுமே 18 கைகளுடன் கூடிய இவ்வடிவம் காணப்படுகிறது.

இவ் வடிவம் சார்ந்த துர்க்கை சைவ மடங்களில் தலையானதும், முதன்மையானதும் ஆன தருமபுரத்தில்(மயிலாடுதுறையில் இருந்து 3 KM ) அமைந்துள்ளது.

மடத்திற்கு வெளியில் மற்றொரு துர்க்கை. அது வேறு துர்க்கை – வன துர்க்கை

இது 25வது குருமகா சன்னிதானம் ஸ்ரீ ல ஸ்ரீ கயிலை மாமுனியால் பிரதிஷ்டை செய்யப்பட்டதாகும்.

25வது குருமகா சன்னிதானம் அவர்கள் காளியினை நேரினில் கண்டவர்கள். அவர்கள் ஒரு முறை கல்கத்தா சென்றிருந்த போது காளி, சன்னிதானம் அவர்களிடம் நேரில் பேசி தனது கோபம் முழுவதையும் குறைத்து அருள் வழங்க எண்ணம் கொண்டதாக தெரிவித்தாள்.

அதன்படி இச்சிலை ஒரே கல்லில் செய்யப்பட்டு கல்கத்தாவில் இருந்து கொண்டுவரப்பட்டு இங்கு பிரதிஷ்டை செய்யப்பட்டது,

அன்னை வரும் போது பரிவார தேவதைகள் வரமால் இருக்குமா? அவர்களும் அன்னையுடன் புறப்பட்டார்கள். அவர்கள் அம்பாள் முன் மகா மேருவாக (32 பட்டைகளுடன்) அருள் புரிகிறார்கள்.

உத்திராட நட்சத்திரத்திற்கு பரிகார தலம்.

தற்போது திரு. ரமேஷ் குருக்கள் அவர்கள் அம்பாள் பூஜையினை கவனித்து வருகிறார்கள். (அலங்காரம் அழகாகும் வரை விடமாட்டார்). கைப்பேசி : +91-94435-91462

சமூக ஊடகங்கள்

சைவ சித்தாந்தம் – சில சிந்தனைகள்

வியாசர் வேதாந்தம் – வகைகள்.

துவைதம், அத்துவைதம் மற்றும் விசிட்டாத்துவைதம்

கபிலர் முதல் வியாசர் வரையில் சாத்திரம் செய்ததற்கு முதல் நூல் எது?. அதன் சிறப்புகள் என்ன?

வேதாகமங்கள்

வேதாகமங்களில் அனைத்தும் அடங்கும். இவைகள் எது ஒன்றிலும் அடங்கா.

இதனை வலியுறுத்தும் ‘அரனடிக்கீழ் அடங்கும்’ என்ற மெய் உபதேசதின் பொருள் என்ன?

அரனடி என்பது சிவசக்தியினை குறிப்பதாகும். சிவசக்தி சிவத்தில் அடங்கும். சிவம் எதிலும் அடங்காது. ஏனெனில் எல்லா பொருள்களும் சிவத்தில் அடங்கும்.

இத்துடன் வேதசிவாகவியல் முற்றுப் பெறுகிறது.

சமூக ஊடகங்கள்

மகேசுவரமூர்த்தங்கள் 9/25 சக்திதரமூர்த்தி

ஜனனம், மரணம் ஆகியவற்றில் உழலக்கூடிய மனிதர்கள் மட்டும் தேவர்கள் ஆகியவர்களுக்கு முக்தியை அளிக்கும் பொருட்டு, தனது வாம பாகத்தில் இருந்து உமா தேவியாரை தோற்றுவித்த மூர்த்தி என்ற குறிப்பு மட்டுமே காணப்படுகிறது.

இது போக மூர்த்தி

(இம் மூர்த்தி பற்றிய குறிப்புகள் இருந்தால் தெரியப்படுத்துங்கள். தெரிந்து தெளிவடைகிறேன்.)

சமூக ஊடகங்கள்

சைவ சித்தாந்தம் – சில சிந்தனைகள்

வைசேஷிகம் – சிறு விளக்கம்

· ஆன்மா வின் தன்மைகளை கூறல்

· ஆன்மா அழிவற்றதாக என்றும் உள்ளது.

· அது அருவமாக இருக்கும்.

· அது ஜீவான்மா, பரமான்மா என்று இருவகையாகப் பிரியும்.

· பரமான்மா – பிறப்பிலி

· ஜீவான்மா – பல் வேறு பிறப்புக்கள் எடுக்கும்.

· புண்ணிய பாவங்களுக்கு ஏற்ப மனத்தில் தன்மையால் ஞானம் கிடைக்கும்.

· இயல்புகளை அறியும் ஞானத்தால் கர்மம் நசிக்கும்.

· அவ்வாறு நசிக்க ஞானமின்றி செயல் அற்று இருப்பதே முக்தி.

· வேதம் ஈஸ்வரனால் செய்யப்பட்டது.

மீமாம்சை – சிறு விளக்கம்

· வேதங்களில் சொல்லப்பட்டவைகளே அனுட்டிபவர்கள் சொர்கத்தை சேருவார்கள்

· வேதம் சுயம்பு

· பிரபஞ்சம் நித்யம் அஃதாவது என்றும் உள்ளது.

· ஆன்மாக்கள் பல உண்டு.

· ஆன்மாக்களுக்கு செய்த கர்மத்திற்கு ஏற்ப அதற்கான பலன்களை அனுபவிப்பதால் அதைத் தர ஈஸ்வரன் என்ற ஒருவன் தேவையில்லை

வேதாந்தம் – சிறு விளக்கம்

· உபநிஷத்துக்களில் சொல்லப்படும் (பரம) ஆன்மா இந்த உலகப்படைப்பிற்கான காரணம்

· இதுவே உலகத்தை வழி நடத்துகிறது

· (ஜீவ) ஆன்மா தனது பந்தத்தை அறுக்க இதுவே உபாயம்.

· அந்த பந்தம் நீங்காததற்கு காரணத்தை விளக்கும்

· பந்தம் நீங்கியப்பின் அடையும் புருடன் இது என்று கூறும்

ஆறு தத்துவ சாத்திரங்களையும் படைத்தவர்கள் யார் யார்?

சாங்கியம் – கபிலர்

பாதஞ்சலம் – பதஞ்சலி

நியாயம் – அக்ஷபாதர்

வைசேஷிகம் – கணாதர்

மீமாம்சை – ஜைமினி

வேதாந்தம் – வியாசர்

சமூக ஊடகங்கள்

சைவ சித்தாந்தம் – சில சிந்தனைகள்

சாங்கியம் – சிறு விளக்கம்

· தேகாதி பிரபஞ்சத்திற்கு காரணமானதும், அருவமாகவும், என்றும் உள்ளதாகவும், எல்லா பொருள்களிலும் நீக்கமற நிறைந்தும் ஜடமாகவும் உடைய மாயை உண்டு என உணர்தல்.

· அதனோடு தொடர்புடைய ஆன்மா உண்டு என்றும் அறிதல்.

· ஆன்மாவுக்கு அஞ்ஞானத்தால் சுக துக்ககங்கள் உண்டு என்றும், அதை பிரித்து உணரும் பகுத்தறிவதாலே அஞ்ஞானம் நீங்கி ஆன்மா முக்தி அடையும் என்றும் உணர்தல்.

· பல பிறவிகளுக்குப் பின் முக்தி உண்டு என உணர்தல்,

· ஈஸ்வரனை தத்துவ விசாரணை மூலமாக அறிய இயலா நிலையில் ஈஸ்வரன் என்று ஒருவன் இல்லை என்று கூறுவது.

பாதஞ்சலம் – சிறு விளக்கம்

சாங்கிய கருத்துக்களை ஏற்பது. அதோடு மட்டுமல்லாமல் அதற்கு மேல் படைத்தல், அழித்தல் ஆகிய தொழில்களை செய்யவும், உண்மை ஞானத்தை உபதேசிப்பவனாகவும் உடைய ஈஸ்வரன் ஒருவன் உண்டு எனவும், அவனை யோக முறையினால் காண இயலும் என்றும் விளக்குவது.

நியாயம் – சிறு விளக்கம்

தர்கத்தின் வாயிலாக ஜடப் பொருள்களையும் சித்துப் பொருள்களையும் தனித்தனியே நித்தியப் பொருள்களாக அறிதல். ஜடத்தில் இருந்து சித்தினை பிரித்து அறிந்து முக்தி என்றும் கூறுதல் . சித்து மனம் என்றும் அது அணுவினை விட சிறியது என்றும் கூறும்.

சமூக ஊடகங்கள்

மகேசுவரமூர்த்தங்கள் 8/25 சுகாசனர்

வடிவம்

· உருவ திருமேனி – யோக வடிவம்

· உமா தேவிக்கு சிவாகமப் பொருளை விளக்கிய திருவடிவம்

· சுகாசனம் – சுவத்திகம், கோமுகம், பதுமம், வீரம், கேசரி, பத்திரம், முக்தம், மயூரம், சுகம் என்ற ஒன்பது வகையான ஆசனங்களில் ஒன்று.

· சத்யோஜாத முகத்திலில் இருந்து தோன்றிய வடிவம்.

· இடது கால் – மடக்கி

· வலது கால் – தொங்க விட்டபடி

· இடது மேல் திருக்கரத்தில் – மான்

· வலது மேல் திருக்கரத்தில் – மழு

· வலது கீழ் திருக்கரத்தில் – அபயம்

· இடது கீழ் திருக்கரத்தில் – வரத கரம்

வேறு பெயர்கள்

சுகாசன மூர்த்தி
நலவிருக்கையன்

வடிவம் அமையப் பெற்ற திருக்கோயில்கள்

சுவேதாரண்யேசுவர் கோயில், திருவெண்காடு

மீனாட்சி அம்மன் ஆலயம் – இரண்டாம் பிரகாரம் ,மதுரை

கயிலாய நாதர், காஞ்சிபுரம்

சட்டைநாதர் திருக்கோயில் – சீர்காழி

சிதம்பரம்

இராமேஸ்வரம்

கங்கை கொண்ட சோழபுரம்

இதரக் குறிப்புகள்

வகைகள்

உமாசகித சுகாசனர்

உமா மகேசுவர சுகாசனர்

சோமாஸ்கந்த சுகாசனர்

விளக்க நூல்கள்

சில்ப ரத்தினம்

ஸ்ரீதத்துவநிதி

Image : Dinamalar

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

சைவ சித்தாந்தம் – சில சிந்தனைகள்

புராணம் என்பது என்ன?

வேத ஆகமப் பொருளை சரித்திர வடிவில் விவரிப்பது.

புராணத்தில் விவரிக்கப்படுபவை எவை? விளக்கங்கள்

உலக் தோற்றம், உயிர் இறைவனை அடைதல், பாரம்பரியங்கள், அவற்றோடு தொர்டபுடைய கதைகள், மனுவந்தரங்கள் ஆகியவற்றை கூறும். இது சைவம் முதல் ஆக்கினேயம் வரை உள்ள பதினெட்டு ஆகும்.

சிவபுராணம்	சைவம் ,காந்தம், லிங்கம், கூர்மம், வாமனம், வராகம், பௌடிகம், மச்சியம், மார்க்கண்டேயம், பிரமாண்டம் – 10
விஷ்ணுபுராணம்	நாரதீயம்,பாகவதம்,காரூடம்,வைணவம் – 4
பிரமபுராணம்	பிரமம், பதுமம் – 2
சூரியபுராணம்	பிரமகைவர்த்தம் – 1
அக்னிபுராணம்	ஆக்கிநேயம் – 1
உபபுராணங்கள்	உசனம்,கபிலம்,காளி,சனற்குமாரம்,சாம்பவம்,சிவதன்மம்,சௌரம், தூருவாசம்,நந்தி,நாரசிங்கம்,நாரதீயம்,பராசரம்,பார்க்கவம், ஆங்கிரம்,மாரீசம்,மானவம்,வாசிட்டலைங்கம், வாருணம் – 18

சாத்திரங்கள் எதனை உணர்த்தும்?

சிஷை – வேதங்களை ஓதும் முறை

கற்பம் – வேதங்களில் விதித்த கர்மங்களை அனுட்டிக்கும் முறை

சோதிடம் – வேதங்களை ஒதுவதற்கான காலம்

வியாகரணம் – வேதங்களின் எழுத்து, சொல், பொருள் இலக்கணம்

நிருத்தம் – சொற்களின் வியாக்யாணம்

சந்தம் – வேத மந்திரங்களின் சந்தங்களின் இலக்கணம்

இவை தவிர வேறு சாத்திரங்கள் இருக்கின்றனவா?

சாங்கியம், பாதஞ்சலம், நியாயம், வைசேஷிகம், மீமாம்சை மற்றும் வேதாந்தம் என ஆறு தத்துவ சாத்திரங்கள் உள்ளன.

சமூக ஊடகங்கள்

சைவத் திருத்தலங்கள் 274 – திருவேற்காடு

தல வரலாறு(சுருக்கம்)/ சிறப்புகள் – திருவேற்காடு

•இறைவன் சுயம்பு – லிங்கத்தின் பின் சிவனும் பார்வதியும் திருமணக் கோலம்

•அம்பாள் – சுயம்பு – கைகளில் கத்தி, கபாலம், டமருகம், சூலம்

•அகத்தியருக்கு திருமண காட்சி அளித்த இடங்களில் இதுவும் ஒன்று.

•நான்கு வேதங்களும் வேல மரங்களாய் நின்று இறைவனை வழிபட்டதலம் – வேற்காடு

•முருகன் வேல் இல்லாமல் வில்லும் அம்பும் ஏந்த, ஒரு காலை மயிலின் மீது வைத்துக்கொண்ட வடிவம்

•ஜோதிட சாஸ்திரத்தில் வல்லவரான பராசர வழிபட்ட தலம்

•நாயன்மார்கள் சிறப்பு – மூர்க்க நாயனார் பிறந்து வாழ்ந்த தலம்
•கஜபிருஷ்ட விமான அமைப்பு

வழிபட்டவர்கள்

விநாயகர்
திருமால்
ஆதிசேஷனும்
முருகன்
ஒன்பது கோள்கள்
அஷ்டதிக்பாலகர்கள்
பராசரர்
அத்திரி
பிருகு
குச்சரர்
ஆங்கீரசர்
வசிட்டர்
கவுதமர்
காசிபர்
திண்டி
முண்டி
வாலகில்லியர்
விரதாக்னி
பஞ்சபாண்டவர்கள்
சிபி சோழன்
வாணன்

தலம்	திருவேற்காடு
பிற பெயர்கள்	விடந்தீண்டாப்பதி
இறைவன்	வேதபுரீஸ்வரர், வேற்காட்டீசர்
இறைவி	பாலாம்பிகை, வேற்கண்ணி அம்மை
தல விருட்சம்	வெள் வேல மரம்
தீர்த்தம்	வேலாயுத தீர்த்தம், பாலிநதி
விழாக்கள்	மகா சிவராத்திரி, நவராத்திரி, மார்கழி திருவாதிரை, பங்குனி உத்திரம்
மாவட்டம்	திருவள்ளுர்
திறந்திருக்கும் நேரம் / முகவரி	காலை 6.30 மணி முதல் இரவு 8.30 மணி வரை அருள்மிகு வேதபுரீஸ்வரர் திருக்கோவில் திருவேற்காடு அஞ்சல் திருவள்ளூர் மாவட்டம் – 600077 +91- 44-2627 2430, 2627 2487.
பாடியவர்கள்	திருஞானசம்பந்தர்-11 பாடல்கள், அருணகிரிநாதர்
நிர்வாகம்
இருப்பிடம்	சென்னை- பூந்தமல்லி நெடுஞ்சாலையில் வேலப்பன் சாவடி -> கிளை சாலையில் இருந்து 2 கிலோ மீட்டர்
இதர குறிப்புகள்	தேவாரத் தலங்களில் 255 வது தலம் தொண்டை நாட்டுத் தலங்களில் இது 23 வது தலம்.

வேதபுரீஸ்வரர்

பாலாம்பிகை

பாடியவர் திருஞானசம்பந்தர்

திருமுறை 1ம் திருமுறை

பதிக எண் 57

திருமுறை எண் 8

பாடல்

மல்லன் மும்மதின் மாய்தர வெய்ததோர்

வில்லி னானுறை வேற்காடு

சொல்ல வல்ல சுருங்கா மனத்தவர்

செல்ல வல்லவர் தீர்க்கமே.

பொருள்

வளமை பொருந்திய முப்புரங்களும் மாயுமாறு கணை எய்த ஒப்பற்ற மேருவை வில்லாக உடைய ஈசன் உறையும் இடம் திருவேற்காடு ஆகும். அதன் புகழினை சொல்ல வல்லவர்கள் குறுகிய மனம் உடையவர்களாக இருக்க மாட்டார்கள். அங்கு சென்று தரிசிப்பவர்கள் நீண்ட ஆயுளை உடையவர்கள் ஆவார்.

கருத்து

தீர்க்கம் – நெடுங்காலம்

சுருங்கா மனத்தவர் – நீண்ட மனம் உடையவர்கள். இவர்கள் மட்டுமே ஈசனை நினைக்க வல்லவர்கள். குறுகிய மனம் உடையவர்கள் ஈசன் நினைவு அற்றவர்களாக இருப்பார்கள் என்பது துணியு.

பாடியவர் திருஞானசம்பந்தர்

திருமுறை 1ம் திருமுறை

பதிக எண் 57

திருமுறை எண் 9

பாடல்

பரக்கி னார்படு வெண்டலை யிற்பலி

விரக்கி னானுறை வேற்காட்டூர்

அரக்க னாண்மை யடரப்பட் டானிறை

நெருக்கி னானை நினைமினே

பொருள்

சிரைச்சேதம் செய்யப்பட்ட ப்ரம்மனின் தலை ஓட்டினை உணவு ஏற்கும் பாத்திரமாக கொண்ட ஈசன் உறையும் இடம் திருவேற்காடு. ஆணமையை குணமாக கொண்ட அரக்கன் ஆகிய இராவணனின் தனது கால் விரலால் சிறிது ஊன்றி அக் குணத்தை அழித்தவன் திருவேற்காடு உறையும் ஈசன். அவனை நினையுங்கள்.

கருத்து

பரக்கினார் – பிரமன்

விரக்கினான் – சாமர்த்தியமுடையன்

புகைப்படம்/உதவி : தினமலர் மற்றும் வலைத்தலங்கள்

சமூக ஊடகங்கள்

மகேசுவரமூர்த்தங்கள் 7/25 லிங்கோத்பவர்

வடிவம்

· உருவம் அற்ற திருமேனியை உருவ வழிபாடு கொள்ளச் செய்யும் வழிபாடு முறை

· மகா சிவராத்ரியுடன் தொடர்புடையது

· திருருவத் திருமேனி – அண்ணாமலையார் வடிவம்

· அக்னி பிழம்புகள் இயல்பாய் மேல் நோக்கி

· வளர்ந்த ஜடா முடி

· கரம் – மான, மழு, வரத கரம்

· மூர்த்தத்தின் நடுவில் நெருப்பு

· வலப்புறம் அன்ன வடிவில் ப்ரம்மா,

· இடப்புறம் பன்றிவடிவில் திருமால்

வேறு பெயர்கள்

லிங்கோற்பவர்
திருவிலங்கம்

வடிவம் அமையப் பெற்ற திருக்கோயில்கள்

ஜலநாத ஈஸ்வரர், திருவூறல், (தக்கோலம்)
திருமெய்ஞானம் – தஞ்சை மாவட்டம்
தேவிகாபுரம், பெரியநாயகி அம்மன் கோயில்,ஆரணி வட்டம் – திருவண்ணாமலைமாவட்டம்
ஏகாம்பரநாதர் கோவில் – காஞ்சிபுரம்
திருக்கலயநல்லூர் (சாக்கோட்டை)
திருகோடிக்காவல்
முக்தீஸ்வரர் ஆலயம், – மதுரை – அன்னமும், பன்றியும் தோற்ற பிறகு சுயம் உணர்ந்து தாளில் இருக்கும் வடிவம்
சத்யகிரி சிவ குகை – திருமயம்
நல்துணை ஈஸ்வரம் – புஞ்சை
ப்ரம்மபுரீஸ்வரர் – புள்ளமங்கை
ப்ரஹதீஸ்வரர் – தஞ்சாவூர்
திருபுவனம்
ஸ்ரீ சந்தரேசுவரர் கோயில் – அருப்புக்கோட்டை
பால்வண்ண நாதர் கோயில் – கரிவலம் வந்தநல்லூர் – திருநெல்வேலி மாவட்டம்
தாணுமாலய சுவாமி திருக்கோயில் – சுசீந்திரம்
கயிலைநாதர் கோயில் – காஞ்சிபுரம் (எட்டு தோள்களுடன் கூடிய லிங்கோத்பவர்)
மலைக் கொழுந்தீஸ்வரர் குகைக் கோயில் – குன்றக்குடி
கோமேஸ்வரர் ஆலயம் – பனகல், நளகொண்டா வட்டம், ஆந்திர மாநிலம்
குடிமல்லூர்
பிள்ளையார்பட்டி
திருச்செட்டாங்குடி
நாகப்பட்டினம்
கூவம்
கூளம்பந்தல்

இதரக் குறிப்புகள்

அடி– முடி தேடிய கதை விவரிக்கப்பட்டுள்ள நூலகள்

ருக்வேதசம்ஹிதை

சரபோப நிஷத்

லிங்க புராணம்

கூர்ம புராணம்

வாயுபுராணம்

சிவ மகா புராணம்

உபமன்யு பக்த விலாசம்

மகா ஸ்காந்தம்

நாரதம்

கந்த புராணம்

அருணகிரி புராணம்

சிவராத்ரி புராணம்

அருணாசல புராணம்

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

சைவத் திருத்தலங்கள் 274 – திருக்கள்ளில்

தல வரலாறு(சுருக்கம்)/ சிறப்புகள் – திருக்கள்ளில்

· சிவன் – சுயம்பு மூர்த்தி,சதுர ஆவுடையார்

· சிவன் சக்தி தெட்சணாமூர்த்தியாக

· இடது கையினில் அமுத கலசம், ஏடு தாங்கி அம்பாளை தழுவிய கோலம்

· பிருகு முனிவர் இக்காட்சியினை வணங்கியபடி கோலம்

· அகத்தியருக்கு திருமண காட்சிக் கோலம் காட்டிய இடத்தில் ஒன்று

· அகத்தியர் பூஜித்த லிங்கம்

· திருஞானசம்மந்தருக்கு பூண்டி தலத்தில் பூஜை பொருள்களை மறையச் செய்து இத்தலத்தில் பூஜைப் பொருள்கள் காட்சி.

· கஜபிருஷ்ட விமானம்

தலம்	திருக்கள்ளில்
பிற பெயர்கள்	திருக்கண்டலம், திருக்கள்ளம்
இறைவன்	சிவாநந்தீஸ்வரர், சோமாஸ்கந்தர், திருக்கள்ளீஸ்வரர்
இறைவி	ஆனந்தவல்லி
தல விருட்சம்	கள்ளில், அலரி
தீர்த்தம்	நந்தி தீர்த்தம்
விழாக்கள்	திருக்கார்த்திகை, மகா சிவராத்திரி, திருவாதிரை, கந்த சஷ்டி.
மாவட்டம்	திருவள்ளுர்
திறந்திருக்கும் நேரம் / முகவரி	காலை 6 மணி முதல் 12 மணி வரை மாலை 5 மணி முதல் இரவு 8 மணி வரை அருள்மிகு சிவாநந்தீஸ்வரர் திருக்கோயில், திருக்கண்டலம்- 601 103. ஊத்துக்கோட்டை தாலுகா, திருவள்ளூர் மாவட்டம். +91-44 – 2762 9144. +91- 99412 22814
பாடியவர்கள்	திருஞானசம்பந்தர்
நிர்வாகம்
இருப்பிடம்	சென்னை – பெரியபாளையம் சாலையில் (36 கி.மீ.,) கன்னிகைப்பேர் என்ற ஊரில் இறங்கி அங்கிருந்து 4 கி.மீ., சென்று இத்தலத்தை அடையலாம்.
இதர குறிப்புகள்	தேவாரத் தலங்களில் 251 வது தலம் தொண்டை நாட்டுத் தலங்களில் இது 18 வது தலம்.

சிவாநந்தீஸ்வரர்

ஆனந்தவல்லி

பாடியவர் திருஞானசம்பந்தர்

திருமுறை 1ம் திருமுறை

பதிக எண் 119

திருமுறை எண் 3

பாடல்

ஆடலான் பாடலா னரவங்கள் பூண்டான்

ஓடலாற் கலனில்லா னுறை பதியால்

காடலாற் கருதாத கள்ளின் மேயான்

பாடெலாம் பெரியார்கள் பரசு வாரே.

பொருள்

ஆடல் பாடல்களில் வல்லவனும், பாம்புகளை அணிகலன்களாக அணிந்தவனும், உண்ணுவதற்கு தலை ஓடு அன்றி வேறு எதுவும் இல்லாடவனும், சுடுகாட்டினைத் தவிர வேறு இடத்தை தனது இடமாக கொள்ளாதவனும் ஆகிய சிவன், பெரியோர்கள் அவன் பெருமை வாய்ந்த புகழைப்பாட கள்ளில் எனும் தலத்தில் உறைகிறான்.

கருத்து

ஆடலான் பாடலா னரவங்கள் பூண்டான் – நடராஜ வடிவம்.

ஓடலாற் கலனில்லா னுறை பதியால் – பைரவ வடிவம்

அரவம் – பாம்பு.

கலன் – உண்கலன்.

பாடு – பெருமை.

பாடியவர் திருஞானசம்பந்தர்

திருமுறை 1ம் திருமுறை

பதிக எண் 119

திருமுறை எண் 9

பாடல்

வரியாய மலரானும் வையந் தன்னை

உரிதாய வளந்தானு முள்ளு தற்கங்

கரியானு மரிதாய கள்ளின் மேயான்

பெரியானென்றறிவார்கள் பேசு வாரே.

பொருள்

சிவந்த வரிகளை உடைய தாமரை மலரை இருப்பிடமாக கொண்ட பிரமனும், உலங்களை தனக்கு உரித்தானக்க அதை அளந்த பிரானாகிய திருமாலும், நினைப்பதற்கு அரியவனாகி இருக்கும் பெருமானாகிய இறைவன், கள்ளில் என்ற தலத்தில் உறைகிறான்.அவனை அறிந்தவர்கள் அவனை பெரியோன் என்று புகழ்வார்கள்.

கருத்து

வரி – செவ்வரி.

அவனை அறிந்தவர்கள் அவனை பெரியோன் என்று புகழ்வார்கள். – அவனை அறியாதவர்கள் பேச மாட்டார்கள் என்பது குறிப்பு.

புகைப்படம் : தினமலர் மற்றும் வலைத்தலங்கள்

சமூக ஊடகங்கள்

சைவ சித்தாந்தம் – சில சிந்தனைகள்

இவ்வாறு வேதம், சிவாகமம் என்று இரண்டு நூல்கள் தேவைஇல்லை என்று கூறுதல் வேத நிந்தை ஆகுமா?

ஆகாது. ஏனெனில் இரண்டுமே ஒன்றை ஒன்று சார்ந்திருக்கின்றன். சிவாகம ஞானம் அடைய வேதம் முக்கியம். வேதம் மட்டுமே தெரிவதால் ஞானம் அடைதல் தேவை இல்லை என்று கூற இயலாது. எனவே சரியை, கிரியை, யோகம் இவற்றால் அடையப்பெறும் ஞானம் மிக முக்கியம்.

எனில் சனகர், சனந்தர், சனாதனர், சனத்குமாரர் ஆகிய சனகாதி முனிவர்களுக்கு ஈஸ்வரன் அருளியது வேதமா அல்லது சிவாகமமா?

முதலில் சுருக்கமான வேதத்தையும் அது குறித்து அவர்கள் தெளிவடையாமையால் பின்னர் சிவாகமத்தையும் விரிந்துரைத்தார்.

வேதம் மற்றும் சிவாகமங்களின் தோற்றத்தில் கால வேறுபாடு உண்டா? அவைகள் எப்போழுது தோன்றின?

சிவனின் ஊர்த்துவ முகமாகிய ஈசான்யத்தில் இருந்து 28 சிவாகமங்களும், மற்ற நான்கு முகங்களாகிய தத்புருஷம், அகோரம், வாம தேயம், சத்யோஜாதம் ஆகியவற்றில் இருந்து நான்கு வேதங்களும் ஒரே காலத்தில் தோன்றின.

ஆகமங்கள் ஐந்து வகைப்படும் என்றும் அவை லௌதிகம், வைதிகம், அத்தியான்மீகம், அதிமார்கம் மற்றும் மாந்திரம் எனப்படும் என்று கூறப்படுகின்றன.இவைகள் சிவாகமத்தின் பகுதியா?

மாந்திரம் – சிவாகமம்

லௌதிகம் – இகலோக வாழ்வு

வைதிகம் – காலாந்திரம்

அத்தியான்மீகம் – ஆன்ம விசாரம்

அதிமார்கம் – யோகமார்க அறிவு

காமிகாதி இருபத்திஎட்டு ஆகமங்களுக்கு வேறாக அல்லது அதிகமாக வேறு சிவாகமங்கள் உண்டா?

காமிகாதிகளை முதன்மையாகக் கொண்டு குரு முதலிய இருடியர் செய்த உபாகமங்கள்(உப+ஆகமங்கள்) இருநூற்று ஏழு ஆகும்.

சமூக ஊடகங்கள்

மகேசுவரமூர்த்தங்கள் 6/25 பிட்சாடனர்

வடிவம்

· உருவத் திருமேனி

· தாருகாவனத்து ரிஷிகளின் ஆணவத்தினை அழிக்க எடுத்த திருக்கோலம்

· பிறந்த மேனியோடு இருக்கும் கோலம்

· சிவனுக்குரிய அனைத்து ஆபரணங்களும்.

· இடது காலை ஊன்றி வலது காலை சற்றே வளைத்து நிற்கும் தோற்றம்.

· கைகளில் பிரம்ம கபாலப் பாத்திரம்

· தொடரும் பூதகணம் தலையில் பிச்சைப் பாத்திரத்துடன்

· தலையில் ஜடாபாரம் அணிந்து, பிறைச் சந்திரன்

· அருகில் ரிஷி பத்தினி

· இடையில் சர்ப்ப மேகலை

· முன் இடது கையில் கபாலமம்,

· முன் வலது கை மான் அல்லது மானிற்கு அருகம்புல் தருவது போல்

· பின் வலத் திருக்கரத்தில் நாகத்தைப் பிடித்தவாறு அல்லது டமரு

· பின் இடத் திருக்கரத்தில் சூலம்

· வலது கால் – வீரக் கழலுடன்

· மேனியில் அணிந்துள்ள பாம்புகள் – யோக சாதனைகள்

· பாதச் சிலம்பு – ஆகமங்கள்

· பாதுகைகள் – வேதங்கள்

· கோலம் காட்டும் ஐந்து தொழில்கள்

Ø உடுக்கை ஒலி -உலக சிருஷ்டி

Ø திரிசூலம் – அழித்தல்

Ø மானுக்குப் புல் கொடுத்தல் – அருள் புரிதல்

Ø குண்டோதரனை அடக்கி அருளுதல்-மறைத்தல்

Ø கபாலம் ஏந்தி நிற்பது – காத்தல்.

· சிவனின் தத்புருஷம் முகத்தினை சார்ந்தது

· ப்ரம்மனின் தலை கொய்ததற்காக ஏற்பட்ட தோஷ நிவர்த்திக்காக காசி சென்று அன்ன பூரணியிடம் பிச்சை ஏற்ற பிறகு ப்ரம்மஹத்தி தோஷ நிவர்த்தி

· வக்கிரம், சாந்தம், வசீகரம், ஆனந்தம், கருணை முதலிய பஞ்ச குணங்களில் வசீகர மூர்த்தி

· இதன் வேறு வடிவம் கஜ சம்ஹார மூர்த்தி

வேறு பெயர்கள்

பிச்சை உவக்கும் பெருமான்

பிச்சாடனர்

பிச்சாண்டை

பிச்சாண்டவர்

பிச்சதேவர்

பிச்சைப் பெருமான்

வடிவம் அமையப் பெற்ற திருக்கோயில்கள்

Ø திருநாமநல்லூர், நாகப்பட்டினம், திருக்காரவாசல், வழுவூர், கரந்தை, திருச்செங்காட்டங்குடி, திருவெண்காடு (மேலப்பெரும்பள்ளம் – வீணை ஏந்திய கோலம்) ஆகிய கோயில்களில் உலோகத் திருமேனி

Ø காஞ்சிக் கைலாசநாதர்

Ø திருவையாறு

Ø திருவிடைமருதூர்

Ø குடந்தை

Ø பந்தநல்லூர்

Ø திருப்பராய்த்துறை

Ø உத்தமர் கோயில்

Ø கங்கைகொண்ட சோழபுரம்

Ø திருவட்டதுறை – எட்டு கரங்களுடன் சூலம் ஏந்தி அகோர தாண்டவமூர்த்தி

Ø சிந்தாமணி – விழுப்புரம் மாவட்டம்

Ø திருவீழிமிழலை

Ø அயனீஸ்வரம் – அம்பாசமுத்திரத்திம், திருநெல்வேலி

Ø திருஉத்தரகோசமங்கை

இதரக் குறிப்புகள்

ஐந்து வகை பிச்சாடனர்கள் சிலை வடிவங்கள்

நகாரச்சிலை

மகாரச்சிலை

சிகாரச்சிலை

வாகாரச்சிலை

யகாரச்சிலை

* முதல் எழுத்துக்கள் ஊழி முதல்வனைக் குறிக்கும் சொற்கள்

காஞ்சிக் கைலாசநாதர் கோயிலில் இரண்டு கைகளைக் கொண்ட பிட்சாடனர் படிமம் – கிபீஞ்சையும் (மயில்தோகைக் கற்றை) அக்க மாலையைப் பிடித்தவாறு சின்முத்திரை

சான்றுகள்

காசியப சில்பசாஸ்திரம்,

சகளாதிகாரம்,

ஸ்ரீதத்துவநிதி

அம்சுமத்பேதாகமம்,

காமிகம்,

காரணாகமம்,

சில்ப ரத்தினம்

திருஞானசம்மந்தர் தேவாரம் – 3.100.1

கந்தபுராணம்,

திருவிளையாடற்புராணம்,

காஞ்சிப் புராணம்

சிவாலயங்களில் நடக்கும் பிரம்மோற்சவ விழாவில் 8-ம் நாள் பிட்சாடனர் கோலம்

சோழர் கலை வடிவங்களில் முக்கிய வடிவம்

பரந்துல கேழும் படைத்த பிரானை

இரந்துணி என்பர்கள் எற்றுக் கிரங்கும்

நிரந்தரம் ஆக நினையும் அடியார்

இரந்துண்டு தன்கழல் எட்டச்செய் தானே

பரந்த ஏழு உலகங்களையும் உண்டாக்கிய இறைவனை இரந்து பிழைப்பவன் என்று கூறுகிறார்கள். தன்னை நினைக்கும் அடியார்கள் பிச்சை எடுத்து உண்டு தன் திருவடியை அடையச் செய்வதற்காகவே அவன் அவ்வாறு இருக்கிறான். – திருமூலர்.

Image : saivasiddhanta.in

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்