அந்தக்கரணம் – Page 66 – அரிஷ்டநேமி

மகேசுவரமூர்த்தங்கள் 6/25 பிட்சாடனர்

வடிவம்

· உருவத் திருமேனி

· தாருகாவனத்து ரிஷிகளின் ஆணவத்தினை அழிக்க எடுத்த திருக்கோலம்

· பிறந்த மேனியோடு இருக்கும் கோலம்

· சிவனுக்குரிய அனைத்து ஆபரணங்களும்.

· இடது காலை ஊன்றி வலது காலை சற்றே வளைத்து நிற்கும் தோற்றம்.

· கைகளில் பிரம்ம கபாலப் பாத்திரம்

· தொடரும் பூதகணம் தலையில் பிச்சைப் பாத்திரத்துடன்

· தலையில் ஜடாபாரம் அணிந்து, பிறைச் சந்திரன்

· அருகில் ரிஷி பத்தினி

· இடையில் சர்ப்ப மேகலை

· முன் இடது கையில் கபாலமம்,

· முன் வலது கை மான் அல்லது மானிற்கு அருகம்புல் தருவது போல்

· பின் வலத் திருக்கரத்தில் நாகத்தைப் பிடித்தவாறு அல்லது டமரு

· பின் இடத் திருக்கரத்தில் சூலம்

· வலது கால் – வீரக் கழலுடன்

· மேனியில் அணிந்துள்ள பாம்புகள் – யோக சாதனைகள்

· பாதச் சிலம்பு – ஆகமங்கள்

· பாதுகைகள் – வேதங்கள்

· கோலம் காட்டும் ஐந்து தொழில்கள்

Ø உடுக்கை ஒலி -உலக சிருஷ்டி

Ø திரிசூலம் – அழித்தல்

Ø மானுக்குப் புல் கொடுத்தல் – அருள் புரிதல்

Ø குண்டோதரனை அடக்கி அருளுதல்-மறைத்தல்

Ø கபாலம் ஏந்தி நிற்பது – காத்தல்.

· சிவனின் தத்புருஷம் முகத்தினை சார்ந்தது

· ப்ரம்மனின் தலை கொய்ததற்காக ஏற்பட்ட தோஷ நிவர்த்திக்காக காசி சென்று அன்ன பூரணியிடம் பிச்சை ஏற்ற பிறகு ப்ரம்மஹத்தி தோஷ நிவர்த்தி

· வக்கிரம், சாந்தம், வசீகரம், ஆனந்தம், கருணை முதலிய பஞ்ச குணங்களில் வசீகர மூர்த்தி

· இதன் வேறு வடிவம் கஜ சம்ஹார மூர்த்தி

வேறு பெயர்கள்

பிச்சை உவக்கும் பெருமான்

பிச்சாடனர்

பிச்சாண்டை

பிச்சாண்டவர்

பிச்சதேவர்

பிச்சைப் பெருமான்

வடிவம் அமையப் பெற்ற திருக்கோயில்கள்

Ø திருநாமநல்லூர், நாகப்பட்டினம், திருக்காரவாசல், வழுவூர், கரந்தை, திருச்செங்காட்டங்குடி, திருவெண்காடு (மேலப்பெரும்பள்ளம் – வீணை ஏந்திய கோலம்) ஆகிய கோயில்களில் உலோகத் திருமேனி

Ø காஞ்சிக் கைலாசநாதர்

Ø திருவையாறு

Ø திருவிடைமருதூர்

Ø குடந்தை

Ø பந்தநல்லூர்

Ø திருப்பராய்த்துறை

Ø உத்தமர் கோயில்

Ø கங்கைகொண்ட சோழபுரம்

Ø திருவட்டதுறை – எட்டு கரங்களுடன் சூலம் ஏந்தி அகோர தாண்டவமூர்த்தி

Ø சிந்தாமணி – விழுப்புரம் மாவட்டம்

Ø திருவீழிமிழலை

Ø அயனீஸ்வரம் – அம்பாசமுத்திரத்திம், திருநெல்வேலி

Ø திருஉத்தரகோசமங்கை

இதரக் குறிப்புகள்

ஐந்து வகை பிச்சாடனர்கள் சிலை வடிவங்கள்

நகாரச்சிலை

மகாரச்சிலை

சிகாரச்சிலை

வாகாரச்சிலை

யகாரச்சிலை

* முதல் எழுத்துக்கள் ஊழி முதல்வனைக் குறிக்கும் சொற்கள்

காஞ்சிக் கைலாசநாதர் கோயிலில் இரண்டு கைகளைக் கொண்ட பிட்சாடனர் படிமம் – கிபீஞ்சையும் (மயில்தோகைக் கற்றை) அக்க மாலையைப் பிடித்தவாறு சின்முத்திரை

சான்றுகள்

காசியப சில்பசாஸ்திரம்,

சகளாதிகாரம்,

ஸ்ரீதத்துவநிதி

அம்சுமத்பேதாகமம்,

காமிகம்,

காரணாகமம்,

சில்ப ரத்தினம்

திருஞானசம்மந்தர் தேவாரம் – 3.100.1

கந்தபுராணம்,

திருவிளையாடற்புராணம்,

காஞ்சிப் புராணம்

சிவாலயங்களில் நடக்கும் பிரம்மோற்சவ விழாவில் 8-ம் நாள் பிட்சாடனர் கோலம்

சோழர் கலை வடிவங்களில் முக்கிய வடிவம்

பரந்துல கேழும் படைத்த பிரானை

இரந்துணி என்பர்கள் எற்றுக் கிரங்கும்

நிரந்தரம் ஆக நினையும் அடியார்

இரந்துண்டு தன்கழல் எட்டச்செய் தானே

பரந்த ஏழு உலகங்களையும் உண்டாக்கிய இறைவனை இரந்து பிழைப்பவன் என்று கூறுகிறார்கள். தன்னை நினைக்கும் அடியார்கள் பிச்சை எடுத்து உண்டு தன் திருவடியை அடையச் செய்வதற்காகவே அவன் அவ்வாறு இருக்கிறான். – திருமூலர்.

Image : saivasiddhanta.in

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

சைவ சித்தாந்தம் – சில சிந்தனைகள்

பதி, பசு, பாசம் ஆகியவை ஞானத்தால் அடையப்பெறுகின்றன எனில் சரியை, கிரியை, யோகம், எதற்கு?

ஞானம் ஆன்மாவின் குணம். இந்த ஞானம் தேகம், இந்திரியம், பிராணன் மற்றும் கரணம் இவற்றோடு கலவாத போது அது அதன் குணத்தில் இருக்கிறது. அவ்வாறு இல்லாமல் தேகம் மற்றும் முன் கூறியவற்றோடு கூடி(கண், காது, மனம், புத்தி இன்ன பிற), அதன் தன்மையை இழக்கிறது.

இவ்வாறு விஷய சுகத்தில் பட்டு கீழ்வழிக்கு இழுத்துச் செல்லும் தேகாதி இந்திரியங்களை தடுத்து பர சுக வாழ்வினில் பதித்திடச் செய்தலே சரியை, கிரியை மற்றும் யோகத்தின் பண்பாகும்.

சரியை – தேகத்தை ஈஸ்வர விஷயத்தில் செலுத்துதல்

கிரியை – இந்திரியங்களை செலுத்துதல்

யோகம் – பிராணாந்தக்கரணங்களை செலுத்துதல்

ஞானம் – ஈஸ்வரனிடத்தில் அடங்குதல்

சரியை, கிரியை, யோகம் ஆகியவைகள் முதல் நிலைகள். இவைகளை அடைந்த பின்னரே ஞானம் என்ற உயர் நிலையை அடைய முடியும்

வேதத்திலும் சிவன் பற்றிய செய்திகள் உள்ளன. சிவாகமத்திலும் சிவன் பற்றிய செய்திகள் உள்ளன. எனில் இரண்டும் ஒன்றா அல்லது வேறுபாடு உள்ளதா?

வேதம் சுருங்கச் சொல்லும். சிவாகமம் விரிவாகச் சொல்லும்.

வேதம் மற்றும் சிவாகமம் ஆகியவை ஈஸ்வரனை குறிப்பிடுகின்றன. எனில் எதற்காக இரண்டு விஷயங்களை எடுத்துக் கொள்ளவேண்டும்? இரண்டில் ஒன்று தேவையற்றதா?

	வேதம்	சிவாகமம்
புருஷாத்தங்கள்	அறம், பொருள், இன்பம், வீடு	வீடு
உலகம்	உலகர்	சத்திநிபாதர்
வீடு சொரூப விளக்கம்	இல்லை	உண்டு
நூல் வகை	மூவுலக நூல்	வீட்டு நூல்

வேதம் வழியே ஞானம் விளைகிறது. ஞானம் அடைய முதல் மூன்று நிலைகளைக் கடக்க வேண்டும். எனவே இவை இரண்டுமே தேவைப்படுகின்றன.

சமூக ஊடகங்கள்

மகேசுவரமூர்த்தங்கள் 5/25 சந்திரசேகரர்

வடிவம்

சந்திரனை தலையில் தரித்த கோலம்(சேகரன் – காப்பாற்றுபவன். சந்திரனைக் காப்பவன்)

உருவத்திருமேனி

போக வடிவம்

திருக்கரங்கள் – மான், மழு,அபய ஹஸ்தம், ஊரு(தொடை) ஹஸ்த முத்திரை. கையைத் தொடையில் பதிந்த வண்ணம் காட்சி

கேவல சந்திரசேகர் – தனித்த நிலையில் சிவபெருமான் தலையில் சந்திரன்.

உமா சந்திரசேகர் – உமையுடன் சிவபெருமான் தலையில் சந்திரன்.

ஆலிங்கண சந்திரசேகர்- சிவபெருமான் தலையில் சந்திரனைச் சூடி உமையை தழுவியநிலை

வேறு பெயர்கள்

பிறையோன்

பிறை சூடிய பெம்மான்

தூவெண்மதிசூடி

பிறையன்

மதிசெஞ்சடையோன்

இந்து சேகரன்

பிறைசூடி

மாமதிசூடி

சந்திர மௌலீஸ்வரர்,

சசிதரர் ,

சோம சுந்தரர்,

சசி மௌலீஸ்வரர்,

சோமநாதர்,

சசாங்க சேகரர்,

சசிசேகரர்

வடிவம் அமையப் பெற்ற திருக்கோயில்கள்

திருவீழிமிழலை

திருவான்மியூர்

வேங்கீஸ்வரம்

திருச்செந்துறை

திருப்புகலூர்- அக்னி பகவான் தவம் செய்து பாப விமோசனம் பெற்ற இடம்.

கம்பத்தடி மண்டபம், மீனாட்சி அம்மன் கோயில், மதுரை

அரம் பையங்கோட்டூர் (இலம்பையங்கோட்டூர்)

வவுனியா செட்டிக்குளம், இலங்கை

பெரும்பாலான சிவாலயங்களில் உற்சவ மூர்த்தி

மார்க்கண்டேயர் இயற்றியது – சந்திரசேகர அஷ்டகம்

Image : Internet

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

சைவத் திருத்தலங்கள் 274 – திருவெண்பாக்கம்

தல வரலாறு(சுருக்கம்)/சிறப்புகள் – திருவெண்பாக்கம்

· கிழக்கு நோக்கிய சுயம்பு மூர்த்தி

· சுந்தரருக்கு ஊன்றுகோல் ஈந்ததால் ஊன்றீஸ்வரர்

· கருவறைக்கு முன்புறம் உள்ள நந்தியின் வலது கொம்பு ஒடிந்த காட்சி

· சுந்தரரின் கண்பார்வைக்கு ஊழ்வினையே என்று கூறி மின்னல் கீற்று போல் ஒளி காட்டியவள் – மின்னொளி அம்பாள்

· பைரவர் எட்டு கைகளுடன்

தலம்	திருவெண்பாக்கம் (பூண்டி)
பிற பெயர்கள்	பழம்பதி, திருவெண்பாக்கம்
இறைவன்	ஊன்றீஸ்வரர். ஆதாரதாண்டேசுவரர் ,சோமாஸ்கந்தர்
இறைவி	மின்னொளி அம்பாள், கடிவாய்மொழியம்மை, . தடித் கௌரி அம்பாள்
தல விருட்சம்	இலந்தை
தீர்த்தம்	குசஸ்தலை நதி, கைலாய தீர்த்தம்
விழாக்கள்	சிவராத்திரி, கார்த்திகைச் சோமவாரங்கள், ஆருத்ரா தரிசனம்
மாவட்டம்	திருவள்ளுர்
திறந்திருக்கும் நேரம் / முகவரி	காலை 6 மணி முதல் 11 மணி வரை மாலை 4 மணி முதல் இரவு 8 மணி வரை அருள்மிகு ஊன்றீஸ்வரர் திருக்கோயில், பூண்டி – 602 023, +91- 44 – 2763 9725, 2763 9895. – 9245886900
பாடியவர்கள்	சுந்தரர்,
நிர்வாகம்
இருப்பிடம்	திருவள்ளூரில் இருந்து – 12 கி.மி.
இதர குறிப்புகள்	தேவாரத் தலங்களில் 250 வது தலம் தொண்டை நாட்டுத் தலங்களில் இது 17 வது தலம்.

ஊன்றீஸ்வரர்

மின்னொளி அம்பாள்

பாடியவர் சுந்தரர்

திருமுறை 7ம் திருமுறை

பதிக எண் 089

திருமுறை எண் 1

பாடல்

பிழையுளன பொறுத்திடுவர்

என்றடியேன் பிழைத்தக்கால்

பழியதனைப் பாராதே

படலம்என்கண் மறைப்பித்தாய்

குழைவிரவு வடிகாதா

கோயிலுளா யேஎன்ன

உழையுடையான் உள்ளிருந்

துளோம்போகீர் என்றானே

பொருள்

குழை என்ற காதணிகலன்களை அணிந்த உடையவனே, உலகியல் வழக்கால் பிழைகள் எனப்படுகின்றவைகளை பிழை என்று எண்ணாமல் நம் பிழைகளை பெருமானார் பொருத்துக் கொள்வார் என்று எண்ணி நான் அவைகளை செய்தேன். அவ்வாறு இல்லாமல் பிழைகளை நீ பொறாததால் உனக்கு உண்டாகும் பழியை பற்றி கவலைப்படாமல் என் கண்களை மறைத்து விட்டாய். பார்வை இல்லாததால் ‘இக்கோயிலில் இருக்கிறாயா’ என்று வினவ, மானை கரங்களில் ஏந்தியவன் ‘உள்ளோம், போகீர்’ என்றானே. இது தானே அவனது கருணை.

கருத்து

திருவாரூர் வாழ்ந்து போதீரே – வடிவம்

படலம் – கண்ணில் படர்ந்து ஒளியை மறைப்பதொன்று

மறைப் பித்தாய் – மறைவித்தாய்

உளாயே – வினா ஏகாரம்

போகீர் ` என்றது இறைவர் அருளிச்செய்த சொல்லை அவ்வாறே சுந்தரர் கூறியது.

பாடியவர் சுந்தரர்

திருமுறை 7ம் திருமுறை

பதிக எண் 089

திருமுறை எண் 10

பாடல்

மான்றிகழுஞ் சங்கிலியைத்

தந்துவரு பயன்களெல்லாம்

தோன்றஅருள் செய்தளித்தாய்

என்றுரைக்க உலகமெலாம்

ஈன்றவனே வெண்கோயில்

இங்கிருந்தா யோஎன்ன

ஊன்றுவதோர் கோலருளி

உளோம்போகீர் என்றானே

பொருள்

மான் போன்ற கழுத்தினை உடைய சங்கிலியை எனக்கு தந்து, அதனால் விளையும் பயன்களை நான் புரிந்து கொள்ளுமாறு அருள் செய்தாய். உலகத்தை ஈன்றவனே, நீ இங்கி இருக்கிறாயா என்று நான் வினவ, ஊன்றுவதற்கு ஒரு கோலை அருளி, ‘உள்ளோம், போகீர்’ என்றானே. இது தானே அவனது கருணை.

கருத்து

அருள் செய்தளித்தாய் – அருளுதல் + செய்தல்+ அளித்தல், மற்றொரு பொருளில் அருளிச் செய்தல்+அளித்தல்,
வருபயன்கள் – கன்மானுபவம்

புகைப்படம் – இணைய தளங்கள்

சமூக ஊடகங்கள்

மகேசுவரமூர்த்தங்கள் 4/25 கல்யாணசுந்தரர்

வடிவம்

பார்வதி தேவியை மணக்க சிவன் எடுத்த வடிவம் – திருமண நாள் – பங்குனி உத்திரம்

போக வடிவம்

உருவத் திருமேனி

இடங்களுக்கு ஏற்றவாறு சிவன் மேற்கரங்களில் மான், மழு. கீழ் கரங்கள் உமை அம்மை கைகள் பற்றி. மற்றொரு கரம் அருளல்.

அம்மை தலை வணங்கிய கோலம்.

சில இடங்களில் சிவன், பார்வதி அருகினில் பெருமாள்

இஃது ஈசான்யத்தால் குறிப்பிடப்படுகிறது.

வடிவம் அமையப் பெற்ற சில திருக்கோயில்கள்

திருவேள்விக்குடி,குத்தாலம்,மயிலாடுதுறை வட்டம்

திருமணஞ்சேரி, ,குத்தாலம்,மயிலாடுதுறை வட்டம்

பவநாசம், விக்கரமசிங்கபுரம், அம்பா சமுத்திரம்

திருநல்லம் (கோனேரி ராஜபுரம்), தஞ்சாவூர் மாவட்டம்

திருவெண்காடு

திருவீழிமிழலை, திருவாரூர் மாவட்டம்

திருவொற்றியூர், சென்னை

திருச்சுழி, விருதுநகர்

Image : Internet

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

சைவ சித்தாந்தம் – சில சிந்தனைகள்

சிவாகமம் என்பது என்ன?

ஆன்மாக்களுக்கு (மும்) மல நாசம் செய்து சிவஞானம் புகட்டி மோஷத்தை கொடுத்தல். இது பதியாகிய இறைவனிடத்தில் இருந்து வந்த கட்டளை.

சிவாகம எதனை உணர்த்தும்?

பதி, பசு மற்றும் பாசங்களின் இலக்கணத்தையும், சரியை, கிரியை, யோகம் ஞானம் ஆகியவற்றின் முறைமையையும், சாலோக, சாமிப, சாரூப, சாயுச்சியம்(முக்தி நிலையின் பல்வேறு நிலைகள்) ஆகிய சதுர் மூர்த்திகளையும் தெளிவாக உணர்த்தும்.

சிவாகமங்கள் எவை எவை?

சிவனின் ஐந்து திரு முகங்களில் இருந்தும் தோன்றியவையே சிவாகமங்கள். (சிவ பேதம் – 10 ஆகமங்கள், ருத்ர பேதம் – 18 ஆகமங்கள்)

காமிகம், யோகஜம், சிந்தியம், காரணம், அஜிதம், தீப்தம், சூக்ஷ்மம், சகஸ்ரம், அம்சுமான், சுப்ரபேதம், விஜயம், நிச்வாசம், ஸ்வாயம்பு, அநலம் ( ஆக்னேயம் ), வீரம், ரௌரவம், மகுடம், விமலம், சந்திரஞானம், முகபிம்பம், புரோக்கீதம், லளிதம், ஸித்தம், சந்தானம், சர்வோக்தம், பாரமேச்வரம், கிரணம், வாதுளம்.

சரியை, கிரியை, யோகம், ஞானம் – விளக்கம்

	வழிபாடு முறை	நிலை	யோக உறுப்புக்கள்	வழிபட்டவர்கள்
சரியை	உடல் தொண்டு	பூசைப் பொருட்களைத் திரட்டல்	இயமம், நியமம், ஆசனம், பிராணாயாமம்	திருநாவுக்கரசர்
கிரியை	ஒரு மூர்த்தியை வழிபடல்	புறப் பூசை	பிரத்தியாகாரம், தாரணை	திருஞானசம்பந்தர்
யோகம்	வழிபடும் மூர்த்தியை த்யானித்தல்	அகப் பூசை	தியானம்	சுந்தரர்
ஞானம்	அனுபவம்	அனுபவம்	சமாதி	மாணிக்கவாசகர்

* விளக்கம் முழுமை பெறவே வழிபட்டவர்கள் பெயர்கள் இணைக்கப்பட்டுள்ளன.

சமூக ஊடகங்கள்

மகேசுவரமூர்த்தங்கள் 3/25 இடபாரூட மூர்த்தி

வடிவம்

காளை மீது அமர்ந்த திருக்கோலம் – ரிஷபாரூடர்

காளை அருகில் நிற்கும் திருக்கோலம் – ரிஷபாந்திகர்

காளை(ரிஷபம்) மீது அமர்ந்து இருக்கும் திருமேனி.

நான்கு கரங்கள்.

வலது மேல் கரம் – மழு

இடது மேல் கரம் – மான்

வலது கீழ் கரம் – அபய முத்திரை

இடது கீழ் கரம் – வரத முத்திரை

பிறை சந்திரன் – தலையில்

உமை அம்மை இடப்புறம்

காளையாக மகாவிஷ்ணு

யோக வடிவத்தால் குறிப்பிடப்படும்

சிவனில் பஞ்ச முகத்தில் ஒன்றான ஈசான்ய முகத்தில் இருந்து தோற்றம்.

வடிவம் அமையப் பெற்ற திருக்கோயில்கள்

அழுத கண்ணீர் ஆற்றிய ஈஸ்வரன் – மூலவர் – விராதனூர் (மதுரை)

சிதம்பரம்

திருவாவடுதுறை

திருலோக்கி – திருவிடை மருதூர் அருகில்

விசயமங்கை – கோவந்த புத்தூர் – (கோவிந்தபுத்தூர்) – சுதை

திருத்துறையூர் – பண்ருட்டி

திருக்கோலக்கா – நாகப்பட்டினம் – சுதை

திருப்பழுவூர் – தற்போது (கீழைப் பழுவூர்) – அரியலூர் – சுதை

திருவான்மியூர் – சென்னை – சுதை

திருவேற்காடு – – சென்னை – சுதை

குடுமியான்மலை – புதுக்கோட்டை

சங்கரன் கோவில் – சங்கர நாராயணர் கோவில்

பெரும்பால சிவன் கோவில்களில் இந்த வடிவம் கற் சிற்பமாகவே காணப்படுகிறது.

Image : Internet

சமூக ஊடகங்கள்

அனுட்டானம் செய்வது ஏன்?

அனுட்டானம்செய்வது ஏன்?

ஆன்மீகம்: இறைவனை அடையும் முதல் வகைப்பயிற்சி

அறிவியல்:

1. தலைமுதல் கால் வரை உடலில்திருநீறு பூசுவதால், உடலில் இருக்கும் நீர்நீக்கப்படும்.

2. அனுட்டானம்செய்வதற்கு செப்பு பாத்திரங்களே அதிகம்பயன்படுத்தபடும். இவை உடலில் இருக்கும்மாசுக்களை நீக்க வல்லவை. இதனால்உடற் பிணிகள் நீங்கும்.

3. அனுட்டானம் முறைகளுக்குதக்கவாறு 12 முதல் 16 இடங்களில் திருநீறு அணிவர். இதனால் அந்தஇடங்களில் இருக்கும் வலிகள் நீக்கப்படும். (தொடுவர்மம்போன்றவை)

4. மந்திரஉச்சாடன ஒலிகள் குறிப்பிட்ட காலமாத்திரைகளில் நிகழ்வதால், மூச்சுக் காற்று சீராகி மனஇறுக்கம் மற்றும் அதன் சார்ந்தவியாதிகள் தடுக்கப்படும்.

மற்ற விஷயங்களை குரு முகமாக அறிக.

Image : Internet

சமூக ஊடகங்கள்

மகேசுவரமூர்த்தங்கள் 2/25 நடராஜர்

வடிவம்

கேசாதி பாதமாக

முகம் – சாந்த சொருபம்

கூந்தல் அருகினில் நாகம் – கால சக்கரம்

கங்கை – அருளுதலை முடிவறச் செய்பவன்.

பிறைச் சந்திரன் – தீங்கு இழைத்தவர்களையும் மன்னித்து அருளுதல்

வலப்புற மேற்கை – டக்கா என்ற உடுக்கை(ப்ரணவ நாதம் தோற்றம்) – படைத்தல்

இடப்புற மேற்கை – தீச்சுவாலை – அழித்தல்

வலப்புற கீழ்க்கை – அபய முத்திரை – காத்தல்

இடப்புற கீழ்க்கை – தும்பிக்கை நிலை (கஜ ஹஸ்தம்) – மறைத்தல்

சில இடங்களில் கைகளில் மான் – மனம் நிலையற்று இறைவனிடத்தில் மட்டும் ஒடுங்குதலைக் குறிக்கும்.

ஊற்றிய வலது கால் – த்ரோதண சக்தி – உயர் ஞானத் தேடல்

வலது கால் கீழ் – அபஸ்மாரன் அசுரன்(முயலகன் என்றும் கூறுவாரும் உண்டு) – முற்றுப்பெறா காமம்

தூக்கிய இடது கால் – ஆணவம் மற்றும் மாயை

குண்டலி சக்தி என்று குறிப்பிடப்படுவதும் உண்டு.

புலித்தோல் – இயற்கையை அணிதல்

நெருப்பு வட்டம் – ப்ரபஞ்ச நடனம்

நெருப்பு வட்டம் ஒவ்வொன்றும் மூன்று சிறு ஜ்வாலைகள் கொண்டது. அவை முறையே தோற்றம், இருப்பு மற்றும் முடிவு.

நெருப்பு வட்டத்திற்கும் எண்ணிக்கை உண்டு.

உடுக்கை ஒலி முனிவர்களுக்கு ஏற்றவாறு

பரதமுனி – நாட்டியம்

நாரதமுனி – சங்கீதம்

பாணினிமுனி – வியாகரணம்

பதஞ்சலிமுனி – யோகம்

வடிவம் அமையப் பெற்ற திருக்கோயில்கள்

திருவாலங்காடு – ரத்தின சபை –கால் மாற்றி நடனம்

சிதம்பரம் – கனகசபை

மதுரை – ரஜிதசபை (வெள்ளி சபை) – கால் மாற்றி நடனம்(பாண்டிய மன்னன் வேண்டுகோளுக்கு இணங்கி)

திருநெல்வேலி – தாமிரசபை – திருநெல்வேலி

சித்திரசபை – திருக்குற்றாலம்

திரு உத்திரகோச மங்கை – மரகதத்திருமேனி

ஸ்ரீவில்லிபுத்தூர் மடவார் விளாகம் – ஒரே கல்லில் செய்யப்பட்ட நடராஜர்

பேரூர் பட்டீஸ்வரர்

தஞ்சை பெரிய கோவில்

மற்றும் எல்லா சிவாலயங்கள் ((பட்டியல் முடிவற்றதாகிறது)

சிறப்புகள்

கூத்தன் – கூத்துக்களை செய்பவன்

அம்பல வாணன் – அம்பலத்தில் ஆடுபவன்

நட ராஜன் – ஆடல் கலையில் அரசன்

சபேசன் – சபைகளில் ஆடுபவன்.(5 சபைகள் )

இதரக் குறிப்புகள்

அருணகிரி நாதருக்கு திருச்செந்தூரில் காட்சி

ஒன்றி இருந்து நினைமின்கள்! உம் தமக்கு ஊனம் இல்லை;

கன்றிய காலனைக் காலால் கடிந்தான், அடியவற்கா;

சென்று தொழுமின்கள், தில்லையுள் சிற்றம்பலத்து நட்டம்!-

“என்று வந்தாய்?” என்னும் எம்பெருமான் தன் திருக்குறிப்பே.

குனித்த புருவமும், கொவ்வைச் செவ்வாயில் குமிண் சிரிப்பும்,

பனித்த சடையும், பவளம் போல் மேனியில் பால் வெண் நீறும்,

இனித்தம் உடைய எடுத்த பொன்பாதமும் காணப் பெற்றால்

மனி(த்)தப் பிறவியும் வேண்டுவதே, இந்த மா நிலத்தே!

Image : Internet

உதவி : சைவ சித்தாந்தம் மற்றும் வலைத் தளங்கள்

சமூக ஊடகங்கள்

மகேசுவரமூர்த்தங்கள் 1/25 சோமாஸ்கந்தர்

வடிவம்

இறைவனான சிவனுக்கும், இறைவியாகிய பார்வதிக்கும் இடையே முருகப் பெருமான் வீற்றிருக்கும் திருக்கோலத்தை குறிப்பிடுவதே இது

அடர்ந்த திருக்கோலம். இடது கால் மடித்து, வலது கால் தொங்கவிட்டு.

நான்கு திருக்கரங்கள் –

பின் இரு திருக்கரங்களில் மான், மழு.

முன் இரு திருக்கரங்களில் அபய முத்திரை, வரத முத்திரை

அம்பிகை – எதிர் மறை கால் மடித்து

வடிவம் அமையப் பெற்ற திருக்கோயில்கள்

திருவாரூர் தியாகராஜ சுவாமி கோயில்
காஞ்சிபுரம் ஏகாம்பரேஸ்வரர் கோயில்
குமரக்கோட்டம்
காமாட்சியம்மன் கோயில்
தென்காசி காசி விஸ்வநாதர் கோயில்
திருக்கேதீஸ்வரம் – இலங்கை
திருக்கருகாவூர்
திருக்கள்ளில்

சிறப்புகள்

இல்லற வாழ்வினையும் அதன் சிறப்புகளையும் மக்கட்பேறு முதலியவற்றை குறிக்கும்.

இதரக் குறிப்புகள்

சிறு தொண்டருக்கு இவ்வடிவ காட்சி

“ஏவலார் குழல் இறைவிக்கும் எம்பிரான் தனக்கும்

பாலன் ஆகிய குமரவேள் நடுவுறும் பான்மை

ஞால மேலுறும் இரவோடு பகலுக்கும் நடுவே

மாலை யானதொன்று அழிவின்றி வைகுமாறதொக்கும்“

– கந்தபுராணம்

“தம்மேனி வெண்பொடியால் தண்ணளியால் ஆரூரர்

செம்மேனி கங்கைத் திருநதியே – அம்மேனி

மானே யமுனை; அந்த வாணி நதியும் குமரன்

தானே குடைவேம் தனித்து“

திருவாரூர் நான்மணிமாலை – குமர குருபர சுவாமிகள்

Image : Internet

சமூக ஊடகங்கள்

மகேசுவரமூர்த்தங்கள் – முன்னுரை

சிவன் என்ற சொல் சிவந்தவன் என்ற பொருளில் ஆளப்படுகிறது. ஆதி சித்தன், ஆதி தேவன், ஆதி நாதன், ஊழி முதல்வன் என்று எந்தப் பெயர் இட்டு அழைத்தாலும் அது முழுவதும் சிவன் பெயரே ஆகும்.

சிவன் பெரும்பாலும் அழித்தல் தொழிலுக்கு உரியவன் என்று கூறப்படுகிறது. அது நிச்சம்தான். ஊழ் வினைகளை அழிப்பவன்.

ருத்ரன், மகாதேவன் சதாசிவம் என்று பல பெயர்களில் அழைத்தாலும் அது வேறு வேறு வடிவங்களையே குறிக்கிறது.

சிவனுக்கான தொழில்கள் 5.

ஆக்கல், காத்தல், அழித்தல், மறைத்தல் மற்றும் அருளுதல்.

சிவபெருமானின் இருபத்து ஐந்து சிவமூர்த்தங்கள் மகேசுவரமூர்த்தங்கள் என்று அழைக்கப்படுகின்றன.

சிவனுக்கான வடிவங்களும் பெயர்களும் எண்ணிக்கையில் வேறுபட்டாலும் சைவ சித்தாந்தக் கருத்துப்படி 25 ஆகும்.

அவையாவன (தருமை ஆதீனம் – சைவ சித்தாந்தப்படி)

சோமாஸ்கந்தர்
நடராஜர்
ரிஷபாரூடர்
கல்யாணசுந்தரர்
சந்திரசேகரர்
பிட்சாடனர்
லிங்கோற்பவர்
சுகாசனர்
சக்திதரமூர்த்தி
அர்த்தநாரீஸ்வரர்
சக்ரவரதர்
திரிமூர்த்தி
ஹரிஹர்த்தர்
தட்சிணாமூர்த்தி
கங்காளர்
காமாரி
காலசம்ஹார மூர்த்தி
சலந்தாரி
திரிபுராரி
சரபமூர்த்தி
நீலகண்டர்
திரிபாதர்
ஏகபாதர்
பைரவர்
கங்காதர மூர்த்தி

ஒவ்வொரு கட்டுரையிலும் இறைவனின் வடிவங்கள் அதற்குரிய ஊர் , சிறப்புகள் போன்ற விஷயங்களை எழுத உள்ளேன்.

‘அவன் அருளாளே அவன் தாள் வணங்கி’ என்பதற்கு ஏற்ப அவன் துணை கொண்டு அவன் பற்றிய வடிவங்களை அவனே அருளட்டும்.

சமூக ஊடகங்கள்

சைவத் திருத்தலங்கள் 274 – திருப்பாச்சூர்

சிவன் சுயம்பு மூர்த்தி – சதுர வடிவ பீடம்
மூலவர் – தீண்டா திருமேனி
அர்த்த மண்டபத்தில் ஸ்ரீசக்கரம் – ஆதிசங்கரர் பிரதிஷ்டை
மூங்கில் வனத்தில் தோன்றியதால் பாசுரநாதர். பாசுர் – மூங்கில்
விஷ்ணு துர்க்கை மகிஷாசூரன் இல்லாமல்
தாழம்பூ தன் தவறு உணர்ந்து வேண்டியதால் மன்னித்து சிவராத்திரியில் ஒரு கால பூஜைக்கு மட்டும் பரிகாரம் பெற்ற தலம்.
தட்ச யாகத்திற்கு சென்ற அம்பாளை சாதாரண பெண்ணாக பிறக்கச் செய்து, தவம் செய்ய வைத்து ‘தன் காதலியே‘ என்று அழைத்த இடம்.
விஷ்ணு அசுரர்களை அழித்த தோஷத்தால் 16 செல்வங்களில் 11ஐஇழந்து சிவனை வணங்கி 11 விநாயர்களை பிரதிஷ்டை செய்து மீண்டும் அனைத்து செல்வங்களும் பெற்ற இடம்திரிபுராந்த தகனத்தில் தன்னை மதியாமல் சென்றதால் தேரின் அச்சு முறித்து சபை அமைத்து காரணங்களை சிவனிடம் வினாயகப் பெருமான் வினவிய இடம்
மேய்சலுக்கு வந்த பசுக்களில் ஒன்று பால் சொரிந்தது கண்டு வாசி என்னும் கருவியால் தோண்டி வெட்டுப்பட்டு தானே மூங்கில் காட்டில் இருப்பதை மன்னனுக்கு உணர்த்திய இடம்
கஜபிருஷ்ட விமானம்

தலம்	திருப்பாசூர்,
பிற பெயர்கள்	தங்காதலிபுரம்
இறைவன்	வாசீஸ்வரர், பசுபதீஸ்வரர், உடையவர், பாசூர்நாதர், சோமாஸ்கந்தர், வினை தீர்த்த ஈஸ்வரன்
இறைவி	தங்காதளி, பசுபதிநாயகி, மோகனாம்பாள், பணைமுலை
தல விருட்சம்	மூங்கில்
தீர்த்தம்	சோம தீர்த்தம், மங்கள தீர்த்தம்
விழாக்கள்	வைகாசி பிரம்மோற்ஸவம், மார்கழி திருவாதிரை
மாவட்டம்	திருவள்ளுர்
திறந்திருக்கும் நேரம் / முகவரி	காலை 6 மணி முதல் 12 மணி வரை மாலை 5 மணி முதல் இரவு 8 மணி வரை அருள்மிகு வாசீஸ்வர சுவாமி திருக்கோயில், திருப்பாசூர் – 631 203, +91- 98944 – 86890
பாடியவர்கள்	அப்பர், சுந்தரர், திருஞான சம்மந்தர்
நிர்வாகம்
இருப்பிடம்	திருவள்ளூர் ரயில் நிலையத்தில் இருந்து – 7 கி.மி. திருவள்ளூர் நகர பேருந்து நிலையத்தில் இருந்து -3 கி.மி.
இதர குறிப்புகள்	தேவாரத் தலங்களில் 249 வது தலம் தொண்டை நாட்டுத் தலங்களில் இது 16 வது தலம். அம்பிகை, திருமால் மற்றும் சந்திரன் ஆகியவர்கள் வழிபட்ட தலம்

வாசீஸ்வரர்

தங்காதளி

பாடியவர் திருஞானசம்மந்தர்

திருமுறை 2ம் திருமுறை

பதிக எண் 060

திருமுறை எண் 8

பாடல்

தேசு குன்றாத் தெண்ணீ ரிலங்கைக் கோமானைக்
கூச வடர்த்துக் கூர்வாள் கொடுப்பார் தம்மையே
பேசிப் பிதற்றப் பெருமை தருவா ரூர்போலும்
பாசித் தடமும் வயலுஞ் சூழ்ந்த பாசூரே.

பொருள்

புகழ் குறையாத, தெளிந்த நீரை உடைய கடலால் சூழப்பட்ட இலங்கை மன்னன் இராவணனை அவன் மனம் கூசுமாறு செய்து அவனுக்கு வாளைப் பரிசாகக் கொடுத்தவர். தம்மைப் பற்றி பேசி, பிதற்றும் அடியவர்களுக்கு அருள் தருபவர். அது மூங்கில் மரங்களும் வயல்களும் சூழ்ந்த பாசூர் ஆகும்.

கருத்து

· தவறு செய்தாலும் அவற்றை விலக்கி அருள் செய்பவர் என்பது இராவணனுக்கு அருளிய நிகழ்வு உணர்த்தும்.

· குன்றா – குறையாத

· தம்மைப்பற்றி பேசுதல் என்பது இழிவானது. அது அதிகமாகும் போது பிதற்றல் ஆகிறது. அதாவது பொருள் அற்றதாகிறது. அவர்களுக்கும் அருள்பவர் சிவன்.

· பாசித்தடம் – நீர்ப்பாசியை வைத்து நீர் நிறைந்த குளங்களை உடைய என்று பல விளக்கங்களிலும் எடுத்தாளப்பட்டிருக்கிறது. பாசு என்பது மூங்கிலைக் குறிப்பதால் மூங்கில் காடுகளை உடைய என்று இப்பாடலில் என் பொருளாக விளக்கப்பட்டிருக்கிறது.

பாடல்

பாடியவர் அப்பர்

திருமுறை 6ம் திருமுறை

பதிக எண் 083

திருமுறை எண் 1

விண்ணாகி நிலனாகி விசும்பு மாகி
வேலைசூழ் ஞாலத்தார் விரும்பு கின்ற
எண்ணாகி எழுத்தாகி இயல்பு மாகி
ஏழுலகுந் தொழுதேத்திக் காண நின்ற
கண்ணாகி மணியாகிக் காட்சி யாகிக்
காதலித்தங் கடியார்கள் பரவ நின்ற
பண்ணாகி இன்னமுதாம் பாசூர் மேய
பரஞ்சுடரைக் கண்டடியேன் உய்ந்த வாறே.

பொருள்

பாசூரில் உறையும் இறைவன் விண்ணாகவும், நிலமாகவும், மேகமாகவும், கடல் சூழ் உலகில் உள்ள பூமியில் உள்ளவர்கள் விரும்பும் எண்ணாகவும், எழுத்தாகவும், இவை அனைத்தும் இயல்பாகவும், ஏழ் உலகத்தில் இருப்பவர்களாலும் வணங்கப்படுவனாகவும், காட்சிக்கு உரிய கண்ணாகவும், அக் கண்ணுள் இருக்கும் மணியாகவும், அதனால் உணர்த்தப்படும் காட்சியாகவும், காதல் கொண்டு அடியார்கள் பாடும் பண் நிறைந்த பாடலாகவும், இனிய அமுதமாகவும் இருக்கிறான். இப்படிப்பட இறைவனை கண்டு அடியேன் உய்ந்தேன்.

கருத்து

விசும்பு – மேகம்,

வேலை – கடல்

காட்சி, காண்பவர், காணப்படும் பொருள் என்ற சைவ சித்தாந்தக் கருத்து இப்பாடலோடு ஒப்பு நோக்கக் கூடியது.

புகைப்பட உதவி : Internet

சமூக ஊடகங்கள்

சைவத் திருத்தலங்கள் 274 – திருவிற்கோலம்

தல வரலாறு(சுருக்கம்)/சிறப்புகள் – கூவம்

· சிவன் சுயம்பு மூர்த்தி

· மூலவர் – தீண்டா திருமேனி

· இறைவன் மேருவை கையால் வில்லாக பிடித்த தலம் – திரு+வில்+கோலம்

· சிவன் – காளிக்காக ரக்க்ஷா(காத்தல்) நடனம் ஆடிய இடம்

· சிவனால் வதம் செய்யப்பட்ட தாரகன், வித்யுன்மாலி – துவார பாலகர்கள்

· கஜபிருஷ்ட விமானம்

· இயற்கை பேரழிவுகளான மழை, வெள்ளம் வரும் போது சுவாமி வெண்மையாகவும், போர்நிகழும் காலத்தில் செம்மை நிறம் உடையதாகவும் மாறும் அதிசயம் நிகழும்..

· அம்பாளுக்கு முன் புறத்தில் ஸ்ரீசக்கரம்

· கூரம்(ஏர்க்கால்) முறிந்த இடமாதலால் இது கூரம். பின்னாளில் மருவி கூவம் என்றானது.

· பைரவர் – நாய் வாகனம் இல்லாமல் காட்சி

தலம்	கூவம்
பிற பெயர்கள்	கூவரம், திருவிற்கோலம், கூபாக்னபுரி
இறைவன்	திரிபுராந்தகர், சோமாஸ்கந்தர், புராந்தகேசுவரர்
இறைவி	திரிபுராந்த நாயகி, புராந்தரியம்மை
தல விருட்சம்	தனியாக ஏதுமில்லை. நைமிசாரண்ய ஷேத்திரம்
தீர்த்தம்	அக்னி, அச்சிறுகேணி மற்றும் கூபாக்கினி தீர்த்தம்
விழாக்கள்	· சித்திரை – பிரம்மோற்ஸவம் · ஆடி – பூ பாவாடை திருவிழா · சிவராத்திரி · ஆருத்ரா தரிசனம்
மாவட்டம்	திருவள்ளுர்
திறந்திருக்கும் நேரம் / முகவரி	காலை 6 மணி முதல் 12 மணி வரை மாலை 5 மணி முதல் இரவு 7 மணி வரை அருள்மிகு திரிபுராந்தகேஸ்வரர் திருக்கோயில், கூவம் – . பேரம்பாக்கம் வழி,திருவள்ளூர் மாவட்டம்.
பாடியவர்கள்	திரு ஞான சம்பந்தர், கூவப்புராணம்
நிர்வாகம்	திரு ராஜேந்திரன் – 93818-65515
இருப்பிடம்	சென்னையில் இருந்து அரக்கோணம் செல்லும் வழியில் கடம்பத்தூர் ரயில் நிலையத்தில் இருந்து 9 கி,மீ தூரத்தில் உள்ளது
இதர குறிப்புகள்	தேவாரத் தலங்களில் வது தலம் தொண்டை நாட்டுத் தலங்களில் இது 14 வது தலம்.

திரிபுராந்தகர்

திரிபுராந்த நாயகி

(இப்பதிகத்தில் 8வது பாடல் இல்லாததால் 5வது பாடலும், 9வது பாடலும் எடுத்துக் கொள்ளப்பட்டுள்ளது)

பாடியவர் திருஞானசம்மந்தர்

திருமுறை 3ம் திருமுறை

பதிக எண் 023

திருமுறை எண் 5

பாடல்

முந்தினான் மூவருள் முதல்வன் ஆயினான்
கொந்துலா மலர்ப்பொழிற் கூக மேவினான்
அந்திவான் பிறையினான் அடியர் மேல்வினை
சிந்துவான் உறைவிடம் திருவிற் கோலமே

பொருள்

இறைவன் எல்லாவற்றிக்கும் முற்பட்டவன்.படைத்தல், காத்தல் மற்றும் அழித்தல் தொழிகளை உடைய மூவருக்கு முதலாவது ஆனவன். கொத்தாக பூக்கும் சோலைகளை உடைய கூகம் என்ற ஊரில் உறைபவன். அந்தி வானத்தில் தோன்றும் பிறை சந்திரனை தன் தலையில் சூடியவன். அடியவர்களுடைய வினைகளை முழுவதுமாக நீக்குபவன். அவன் உறையும் இடம் திருவிற்கோலம் ஆகும்.

* * * * * * * * * * * * * * * * * * * *

பாடியவர் திருஞானசம்மந்தர்

திருமுறை 3ம் திருமுறை

பதிக எண் 023

திருமுறை எண் 9

பாடல்

திரிதரு புரம்எரி செய்த சேவகன்
வரியர வொடுமதி சடையில் வைத்தவன்

அரியொடு பிரமனதாற்ற லால் உருத்
தெரியலன் உறைவிடம் திருவிற் கோலமே

பொருள்

இறைவன் முப்புரங்களை அழித்து தேவர்களைக் காத்தவன். வரிகள் உடைய பாம்பினையும் சந்திரனையும் தலையில் தரித்தவன். தங்களது கர்வத்தால் தங்களை பெரிதாக்கிக் கொண்டதால் ப்ரம்மா மற்றும் திருமால் இவர்களால் காணமுடியாதவன். இப்படிப்பட்ட இறைவன் வீற்றிருக்கும் இடம் திருவிற்கோலம்.

கருத்து

திருதரு – வானத்தில் பறந்து திருந்து கொண்டிருந்த; அட்டவீரட்டானத்தில் ஒன்று – திரிபுர தகனம்

சேவகன் – சிவன் எளிமையானவன் என்பதைக் குறிக்கிறது.

வரி அரவோடு – வரிகள் உடைய பாம்பு(மிகுந்த நஞ்சு உடையது)

புகைப்பட உதவி : தினமலர்

சமூக ஊடகங்கள்

அபயாம்பிகை சதகம்

சுமார் 200 ஆண்டுகளுக்கு முன், பெற்றோர் செய்த புண்ணியத்தால் ஒரு குழந்தை பிறந்தது. அதற்கு கிருஷ்ணசாமி என்று பெயர் இட்டனர்.

சிறு வயதிலே பெற்றோரை இழந்தார் கிருஷ்ணசாமி.

ஒரு முறை அவரது அழுகுரல் கேட்டு அம்பிகை வந்தாள். அமுது ஊட்டினாள். ஆறுதல் படுத்தினாள். அவ்விடம் அகன்றாள்.

ஒருமுறை கோவிலில் தன் சன்னதிக்கு அழைத்து சென்று மறைந்தாள்.

ஒரு முறை அர்த்த ஜாம வழிபாட்டை முடித்து வரும் போது, கால் இடறி விழுந்தார். விழும் போது ‘அம்மா அம்மா’ என்று அலறினார்.

அன்று முதல் அர்த்த ஜாம வழிபாடு முடிந்த உடன், யாரும் இல்லாமல் கைவிளக்கு மட்டும் தொடந்து வந்து கொண்டிருந்தது. இதனை கண்ட ஊர் மக்கள் ஆச்சரியப்பட்டனர்.

தன் நிலை குறித்து வருந்தி ‘உன்னை எப்படிப் பாடுவது’ என்று புலம்பினார்.
‘நீ பாடு, பாட்டு தன்னால் வரும் ‘ என்று உத்திரவிடுகிறாள் அம்பிகை.
உள்ளம் உருகி பாடிய பாடல்களே ‘அவயாம்பிகை சதகம்’. மொத்தம் 100 பாடல்கள்.

இவருக்கு திருமணம் நடைபெற்றது, ஆனால் இல்லறம் ஆன்மீகம் சார்ந்த சாக்த வழிபாடாகவே இருந்தது. ஊர் மக்கள் இதனை ஏற்றுக் கொள்ளவில்லை.

ஒரு அர்த்த ஜாம வழிபாட்டிற்குப் பின் ஜோதியில் கலந்தார்.

கனிந்து கனிந்துன் றனைப்பாடிக் கசிந்தே இருகண் புனல்பெருகக்
காது உபயம் உனதருளாம் கதையைக் கேட்க உனதடியார்
இனந்தான் உறவாய் மனம்புதைய எந்த நாளும் அவர் இருந்த
இடத்தை இருதாள் சுற்றிவர இரவும் பகலும் நினதருளை
நினைந்த படியே சிந்தைசெயும் நெறியை உதவி எனைக்காப்பாய்
நித்யா னந்தப் பழம் பொருளே நிமலி அமலை புகழ்விமலி
வனைந்த சடலத் தொழில்உனது அடிக்கே இதமாய் அருள்புரிவாய்
மயிலா புரியில் வளரீசன் வாழ்வே அபயாம் பிகைத்தாயே.

பச்சை முழுப்பொன் னிறமுடனே பளிங்கு பவள முடன்நீலம்
பருத்த மேக முடன்ஆறாய்ப் பரவி யிருக்கும் பசுங்கிளியே
அச்ச மறவே அதன்மீதில் அருண வுதய ரவிகோடி
அகண் டாகார ரூபமதாய் அமர்ந்த சிவமோ கனமாதே
செச்சை யதன்மேல் அணிச்சிலம்புஞ் சிறுகிண் கிணித்தண் டைகளொலிக்கச்
சிவனோ டிருக்குங் கொலுமுகத்தைச் சிறியேன் காண அருள்புரிவாய்
வச்ச உனது பொருள்எனக்கு வரத்தாற் கருத்தில் உரைத்தருள்வாய்
மயிலா புரியில் வளரீசன் வாழ்வே அபயாம் பிகைத் தாயே

பாடல்கள் மிக அழகான தமிழில் இருக்கின்றன. சுமார் 200 ஆண்டுகளுக்கு முற்பட்ட தமிழ் என்பதால் மிகப் பெரிய விளக்க உரைகள் தேவை இல்லை. ஆனால் அப்பாட்டின் கருத்துக்கள் மிக ஆழமானவை.

பாடல்கள் அனைத்தும் ‘மயிலா புரியில் வளரீசன் வாழ்வே அபயாம் பிகைத் தாயே’ என்றே முடிகின்றன.

உலக அன்னையின் அனுபவங்களை உணர்ந்தவர்கள் எவ்வாறு மீள முடியும்.

சமூக ஊடகங்கள்

அரைஞாண் கயிறு அணிவது ஏன்?

ஆன்மீகம் – எல்லாரும் கட்டும் போது உனக்கு மட்டும் என்ன கேள்வி?

அறிவியல் :

1. பொதுவாக ஆண்களுக்கு குடல் இறக்கம் ஏற்படும். இதை தடுப்பதில் அரைஞாண் கயிற்றின் பங்கு மிக அதிகம்.

2. ஆண்களுக்கு கால மாற்றத்தால் பொதுவாக விதைப் பைகள் இறக்கம் ஏற்படும். அரைஞாண் கயிறு கட்டி கோமணம் (அ) லங்கோடு கட்டும் போது இது தடுக்கப்படுகிறது. இதனாலே மலட்டுத் தன்மை என்பது போன தலைமுறையில் மிகக் குறைவாகவே இருந்தது.

சமூக ஊடகங்கள்

சைவத் திருத்தலங்கள் 274 – திருவாலங்காடு

தல வரலாறு(சுருக்கம்)/சிறப்புகள்

· சிவன் சுயம்பு மூர்த்தி

· பஞ்ச சபைகளில் ரத்ன சபை

· இறைவனால் அம்மையே என்று அழைக்கப்பட்ட காரைக்கால் அம்மையார், தனது திருவடிகளால் நடந்து நடராஜர் திருவடியில் இருக்கும் இடம்.(பேய் வடிவம் கொண்டு இருக்கும் இடம்)

· 51 சக்தி பீடங்களில் காளி சக்தி பீடம்

· முன்காலத்தில் இங்கு இருந்த ஆலமரக் காட்டில் சிவன் சுயம்பாக தோன்றி நடனம் புரிந்தததால் வடாரண்யேஸ்வரர்

· காரைக்கால் அம்மையாரால் மூத்த திருப்பதிகம் பாடப் பெற்ற இடம்

· கமலத் தேர் அமைப்பு

· சிவனும் காளியும் ஊர்த்துவ தாண்டவம் ஆடிய இடம்

· விமானம் செப்புத் தகட்டால் செய்யப்பட்டுள்ளது.

· வேளாளர்கள் பழையனூர் நீலிக்குக்கொடுத்த வாக்குப்படி உயிர் கொடுத்து, உண்மையை நிலை நாட்டிய இடம்.

தலம்	திருவாலங்காடு
பிற பெயர்கள்	வடாரணியம், பழையனூர் ஆலங்காடு
இறைவன்	வடாரண்யேஸ்வரர், தேவர்சிங்கப்பெருமான், ஆலங்காட்டுஅப்பர்
இறைவி	வண்டார்குழலி, மகாகாளி
தல விருட்சம்	பலா
தீர்த்தம்	சென்றாடு தீர்த்தம், முக்தி தீர்த்தம்.
விழாக்கள்	மார்கழி – திருவாதிரை
மாவட்டம்	திருவள்ளுர்
திறந்திருக்கும் நேரம் / முகவரி	காலை 7 மணி முதல் 12 மணி வரை மாலை 4.30 மணி முதல் இரவு 8.30 மணி வரை அருள்மிகு வண்டார்குழலி உடனுறை வடாரண்யேஸ்வரர் திருக்கோயில், திருவாலங்காடு-631 210, திருவள்ளூர் மாவட்டம். 044 – 27872443
பாடியவர்கள்	மூவர் முதலிகளான திருநாவுக்கரசர், சம்பந்தர், சுந்தரர்,அருணகிரி நாதர், கச்சியப்ப சிவாச்சாரியார், இராமலிங்க அடிகள்
நிர்வாகம்	இந்து சமய அறநிலையத்துறை
இருப்பிடம்	சென்னையில் இருந்து அரக்கோணம் செல்லும் வழியில் உள்ளது
இதர குறிப்புகள்	தேவாரத் தலங்களில் 248வது தலம் தொண்டை நாட்டுத் தலங்களில் இது 15 வது தலம். வழிபட்டவர்கள் – கார்க்கோடகன், சுநந்த முனிவர்

வடாரண்யேஸ்வரர்

வண்டார்குழலி

பாடியவர் திருநாவுக்கரசர்

திருமுறை 6ம் திருமுறை

பதிக எண் 78

திருமுறை எண் 10

பாடல்

மாலைப் பிறைசென்னி வைத்தார் தாமே

வண்கயிலை மாமலையை வந்தி யாத

நீலக் கடல்சூ ழிலங்கைக் கோனை

நெரிய விரலா லடர்த்தார் தாமே

பாலொத்த மேனி நிறத்தார் தாமே

பழனை பதியா வுடையார் தாமே

சீலத்தா ரேத்துந் திறத்தார் தாமே

திருவாலங் காடுறையுஞ் செல்வர் தாமே.

பொருள்

திருவாலங்காட்டுடை சிவன் எப்படிப்பட்டவர் என்றால் மாலைக்காலத்து சந்திரனை அணிந்தவர், வளம் மிக்க கயிலையை வணங்காதவனும், நீல நிற கடலால் சூழப்பட்ட இலங்கையின் வேந்தனாகிய இராவணனை தனது பெரு விரலால் அழுத்தி துன்பம் அடையச் செய்தவர், வெண்மையான நிறமுடையவர், பழையனுரை தனது உறைவிடமாகக் கொண்டவர், உயர்ந்த ஒழுக்கங்களை உடையவர் போற்றும் திறமுடையவர்.

பாடியவர் சுந்தரர்

திருமுறை 7ம் திருமுறை

பதிக எண் 52

திருமுறை எண் 2

பண் பழம்பஞ்சுரம்

பாடல்

பொய்யே செய்து புறம்புறமே திரிவேன் றன்னைப் போகாமே 7.52.2

மெய்யே வந்திங் கெனையாண்ட மெய்யா மெய்யர் மெய்ப்பொருளே

பையா டரவம் அரைக்கசைத்த பரமா பழைய னூர்மேய

ஐயா ஆலங் காடாஉன் அடியார்க் கடியேன் ஆவேனே.

பொருள்

மனம், வாக்கு மற்றும் காயங்களால் அவற்றுக்கு பொருந்தாத செயல்களைச் செய்து, உன்னிடத்தில் நிலைபெறும் எண்ணங்களைப் பெறாமல் திரிபவனாகிய என்னை, அவ்வாறு போகவிடாமல் தடுத்து என்னை ஆண்ட மெய்பொருளே, உண்மை நிலையினை உணர்ந்தரால் அறியப்பட்ட மெய்ப்பொருளே, ஆடும் நாகத்தினை இடையினில் அணிந்து பழையனுரில் உறைபவனே, திருவாலங்காட்டில் உறைபவனே, அடியேன் என்றும் உன் அடியவர்க்கு அடியவன் ஆவேன்.

கருத்து

பொய் பேசுதல் என்பது தாண்டி பொய்யே செய்து என்பதால் மனம், வாக்கு மற்றும் காயங்களால்

போகாமே என்பதால் தடுத்து நிறுத்தப்பட்ட

புகைப்படம் உதவி – தினமலர்

சமூக ஊடகங்கள்

சைவ சித்தாந்தம் – சில சிந்தனைகள்

கர்மத்தை அனுஷ்டிப்பதால் ஒருவன் சொர்க்கத்தையும், ஞானத்தை அனுஷ்டிப்பதால் ஒருவன் மோட்சத்தையும் அடைய முடியும்.

இதை போதிப்பதில் உண்டாகும் வேறுபாடுகளூம் பிரிவுகளும் என்ன?

கர்மத்தை போதிப்பது வேதம்

ஞானத்தை போதிப்பது வேதாந்தம்

வியாசரின் சிஷ்யரான ஜைமினி செய்தது கர்ம சூத்திரம். இது கர்மம் என்பது பிரதானம். அதை மறுத்து வியாசர் செய்தது வேதாந்த சூத்திரம். இது ஞானம் என்பது பிரதானம்.

வியாசரது சூத்திரத்திற்கு பலர் விளக்கம் தந்திருக்கிறார்கள். ஸ்ரீகண்டாச்சாரியார், சங்கராச்சாரியார், பண்டிதாச்சாரியார், இராமானுஜாச்சாரியார் மற்றும் மத்துவச்சாரியார்.

இவர்களில் முதல் மூவரும் சிவனை சிவபிரமானம் உள்ளவர்கள். மற்றவர்கள் விஷ்ணு பிரமானம் உள்ளவர்கள்.

இவர்களின் விளக்கங்கள்

ஸ்ரீகண்டாச்சாரியார் – சமவாதி

சங்கராச்சாரியார் – விவர்த்தவாதி

பண்டிதாச்சாரியார் – ஐக்கியவாதி

இராமானுஜாச்சாரியார் – விசிஷ்ட்டாத்துவைதி

மத்துவச்சாரியார் –துவைதி

இதில் முதல் மூவரும் பதி, பாச விசாரணையில் பேதப்பட்டாலும் சிவனைப் பரம்பொருள் என்று கொண்டதால் அவர்கள் சைவர்கள் என்று பேசப் படுகிறார்கள். என்றாலும் ஸ்ரீகண்டாச்சாரியார் ஸ்வாமிகளே சைவச்சாரியார் என பிரசித்தி பெற்றிருக்கிறார்கள்.

இது தவிர ஆயுர் வேதம், அர்த்த வேதம், தனுர் வேதம் மற்றும் காந்தர்வ வேதம் என்ற வகைகளும் உண்டு. இவைகள் கர்ம காண்டங்களோடு கூடி பயன் தரத் தக்கவை ஆகும்.

சமூக ஊடகங்கள்

சைவ சித்தாந்தம் – சில சிந்தனைகள்

வேதசிவாகமவியல்

பதியினது உபதேசம் பற்றி விளக்கும் வகையில் இருக்கும் உபதேசங்கள். இது உலகத்தின் இயல்புகளையும், ஆன்மாக்களையும் அது பற்றி நிற்கும் பாசத்தை பற்றியும் விளக்கும். பிறகு அப்பாச இயல்பில் இருந்து விலகுவதற்கான வழியையும் கூறும்.

இவைகள் ரிக், யஜுர், சாமம், அதர்வணம் என்று வகைப்படுத்தப்படுகிறது. (இவற்றிற்கான விளக்கங்களுக்கு நாம் செல்லவில்லை)

இவ்வேதங்கள் இரண்டு காண்டங்கள் உடையது. கர்ம காண்டம் மற்றும் ஞான காண்டம்.

இவற்றுள் கர்ம காண்டம்(செய்த வினையின் விளைவு) அவற்றை மாற்ற ஜோதிடம் போன்ற புண்ணிய கர்மங்களை அறிந்து சொர்க்கத்தை விரும்பி செய்யப்படுவது)

ஞானகாண்டம் – உலகம், உடல், உயிர் போன்ற நிலையாமைத் தத்துவங்களை கண்டு, தன்பற்று நீங்கி முக்தி அடைதலுக்கு உரிய உண்மை ஞானத்தை உணர்த்துவது.

சமூக ஊடகங்கள்

சைவ சித்தாந்தம் – சில சிந்தனைகள்

இவ்வாறு அந்த ஈஸ்வரன் சர்வ சுதந்திரத்துடன் இருக்கிறார். இதனை விளக்குவோம்.

சுதந்திரம் என்பது தன்னாலும் பிறராலும் தனக்கும் தடை இல்லாமல் இருத்தல். சீவன்கள் கன்மானுபவம் கூடி அதை அனுபவிக்க உரியவர்கள். வரம்பிற்கு உட்பட்ட அறிவு தொழில் உடையவர்கள். இவ்வாறு அவர்களுக்கு விதிக்கப்பட்டவைகளை முடித்தும், அவைகளை கெடும்படியாக தடுத்தும் செய்வதால் தனக்கு மேல் கர்த்தா இல்லாமல் அவர் சுதந்த்ரத்துடன் செயல்படுகிறார்.

அவ்வாறு செயல்படும் ஆன்மாக்கள் தனது குற்றம் நீங்கி குணப்படுதல் நிகழும். இதனை விளக்குவோம்.

சித்துப் பொருளாகிய ஆன்மாக்கள் தனது குற்றத்தை தானே நீக்குதல் ஆகா. தனுக் கரணங்களைக் கொடுத்து ஈஸ்வரன் தனது குற்றங்களை உணர வைக்கிறான். இவ்வாறு சிவாகமங்களை அறியும் ஆன்மாக்கள் அதிலிருந்து குற்றம் விலகி சுகிக்கும்.

இத்துடன் சித்தியல் நிறைவு பெறுகிறது.

சமூக ஊடகங்கள்

சைவ சித்தாந்தம் – சில சிந்தனைகள்

சைவசித்தாந்தம் – சில சிந்தனைகள்

சர்வ வியாபகம்

எல்லா பொருள்களிலும் நீக்கமற நிறைவுற்று இருத்தல்.

எல்லா பொருள்களிலும் நீக்கமற நிறைவுற்று இருத்தல் முதல் தன்மை. அதோடு தளைகளை அறிவிக்கவும் அதோடு ஆன்மாக்களை தளைகளில் இருந்து விடுவிக்கும் பொருளாகவும் இருத்தல். அஃது பிரபஞ்சம் முழுவதும் நிறைந்தது.

இதைஉண்மை என்பதை பிட்டுக்கு மண் சுமந்து பிரம்படி பட்ட திருவிளையாடல் புராணம் உணர்த்தும்.

நித்யதத்துவம்

அழிவில்லாது.

தனக்கான செயல்களை வினைகளில் வழியே கூட்ட பதி ஒன்று வேண்டும். அவ்வாறு செயவதற்கு தனக்கு மேல் ஒரு பதி இல்லாத பரம் பொருள்.

சுவையினை உணரும் பசுக்கள் அவற்றின் தன்மைக்கு ஏற்ப அவற்றை அனுபவிப்பது போல், ஈஸ்வர அனுபவிப்பதை அனுபவிப்பதால் அவன் நித்ய ஆனந்தராக இருத்தல் வேண்டும்.

சமூக ஊடகங்கள்