பாடல்
அயிலாரு மம்பத னாற்புர மூன்றெய்து
குயிலாரு மென்மொழி யாளொரு கூறாகி
மயிலாரு மல்கிய சோலை மணஞ்சேரிப்
பயில்வானைப் பற்றிநின் றார்க்கில்லை பாவமே
இரண்டாம் திருமுறை – தேவாரம் – திருஞானசம்பந்தர்
கருத்து – அன்னையினை பாகம் கொண்டு எழுந்து அருளும் திருமணஞ்சேரி திருத்தலம் பற்றி உரைக்கும் பாடல்.
பதவுரை
கூர்மையாக முப்புரங்களையும் அழித்தும், குயில் போலும் இனிய மென்மையான மொழிபேசும் உமை அம்மையை தன்னுடைய ஒரு பாகத்தில் உடையவனாகியும், மயில்கள் வாழும் நிறைந்த சோலைகள் சூழ்ந்ததும் ஆன திருமணஞ்சேரியில் எழுந்து அருளும் இறைவனைப் பற்றி நின்றவர்களுக்கு பாவம் இல்லை.
விளக்க உரை
- அயில் – கூர்மை
- குயில் வாய்மொழியம்மை – அம்பிகை திருநாமம்
- பயில்வான் – கோயில்கொண்டு இருப்பவன்
- பற்றி நிற்றல் – பற்று விடுமாறு பற்றி வழிபடல்
