அறிவோம் அழகுத் தமிழ் வார்த்தை – துன்னுதல்
பொருள்
- அடைதல்
- பொருந்துதல்
- மேவுதல்
- அணுகுதல்
- செறிதல்
- செய்தல்
- அடைதல்
- ஆராய்தல்
- தைத்தல்
- உழுதல்
குறிப்பு உதவி / இலக்கிய பயன்பாடு
பாடல்
மன்னிய நின்அருள் ஆரமு தம்தந்து வாழ்வித்துநான்
உன்னிய உன்னிய எல்லாம் உதவிஎன் உள்ளத்திலே
தன்இயல் ஆகிக் கலந்தித் தருணம் தயவுசெய்தாய்
துன்னிய நின்அருள் வாழ்க அருட்பெருஞ் சோதியனே!
திருஅருட்பா – ஆறாம் திருமுறை – வள்ளலார்
விளக்க உரை
அருட் பெருஞ் சோதியையுடைய ஆண்டவனே! நிலை பெற்ற நினது திருவருளாகிய அருமையான ஞானாமுதத்தை எனக்குத் தந்து என்னையும் நின் திருவருளில் வாழ்வித்து நான் எண்ணிய எல்லாவற்றையும் அடைய உதவி செய்து என் உள்ளத்தில் சிவமாய்க் கலந்து இப்பொழுது எனக்கு நினது அருளைச் செய்தாய்; என்னையடைந்த நினது திருவருள் வாழ்க.
கருத்து உரை
- உன்னிய உன்னிய எல்லாம் உதவல் – எண்ணிய எல்லாம் எண்ணியவாறு உதவுதல்.
- என் உள்ளத்திலே தன்னியலாகிக் கலந்து தயவு செய்தாய் – உள்ளத்தில் ஞானமாய்க் கலந்து கொள்ளுதல் சிவத்தின் இயல்பு
