அறிவோம் அழகுத் தமிழ் வார்த்தை – ஆசு

ஓவியம் : இணையம்

‘அறிவோம் அழகுத் தமிழ் சொல் / வார்த்தை ‘ –  ஆசு

பொருள்

• விரைவு
• ஆசுகவி
• குற்றம்

குறிப்பு உதவி / இலக்கிய பயன்பாடு

பாடல்

ஆசு இல் பர தாரம்அவை அம் சிறை அடைப்பேம்;
மாசு இல் புகழ் காதலுறுவேம்; வளமை கூரப்
பேசுவது மானம்; இடை பேணுவது காமம்;
கூசுவது மானுடரை; நன்று, நம் கொற்றம்!

கம்பராமாயணம் – யுத்த காண்டம்

கருத்து உரை

ஒரு குற்றமும் இல்லாத ஒருவன் மனைவியை அழகிய சிறையில் அடைத்து  வைப்போம்; குற்றமற்ற  புகழ் அடையவும் விரும்புவோம்; மற்றவர்கள் பெருமைப்படும் படியாக  பேசுவதோ  வீர உரைகள்; அதற்கிடையிலே விரும்புவது காமம்; மானிடர்களைப் கண்டு அஞ்சுகிறோம்; நமது வெற்றி நன்றாய் இருக்கிறது.

விளக்க உரை

• இராவணனைப் பார்த்து கும்பகர்ணன் கூறியது இப்பாடல். ‘நாம் உள் ஒன்று வைத்துப் புறம் ஒன்று பேசுவதே நம் பெருமை, என்ன ஓர் ஆட்சி!’ என இடித்துரைக்கிறான்.
• வாக்கிய அமைப்பில் எதிரும் புதிருமான கருத்துக்கள் வருமாறு அமைக்கப்பட்டுள்ளது. ஆட்சியாளர்களின் / மனிதர்களின் மனநிலையை எடுத்துக்காட்டும் பாடல்
• ‘நன்று’ இகழ்ச்சி குறித்தது

துக்கடா – சைவ சித்தாந்தம் வினா விடை

பிரபஞ்சத்தின் நிமித்த காரணம் எது?
இறைவன்